PENGINA'AN 16 - PEJANJIAN EMPAI CERITAU ILUAK

Tujua sengsarau

¹ La udim itu aku ndengagh suarau bias jak di dalam Ghuma Allah ngiciak ngan tujua malaikattu, kataunyau, “Pegila, tuangkala pan mara Allahtu ke deniau.”

² Mangku pegi malaikat diau dulu sekali, dituangkanyau ke deniau isi pan itu, mangku nimbul bisul diau besak-besak lagi mengut diau mbayauka di gegalau jemau diau adau tandau benatangtu ngan nyemba patungau.

³ Udim itu malaikat diau keduau nuangka isi panautu ke laut, mangku ayiak laut njadi luak dagha jemau mati, mangku mati galau benatang diau idup di laut.

⁴ Udim itu malaikat diau ketigau nuangka isi panau ke ayiak batang-aghi ngan matau ayiak, mangku gegalau ayiak njadi dagha.

⁵ Mangku aku ndengagh malaikat diau nguasaui ayiak bekatau, “Dighi Allah diau suci. Dighi adau jak di senitu enggut mbak kini. Ukuman diau Dighi ukumkatu adil.

⁶ Ughangtu la numpaka dagha umat Allah ngan dagha nabi-nabi. Mbak kini Dighi mbuat ughangtu minum dagha, karnau titu pantas batan endak ughangtu.”

⁷ Mangku aku ndengagh suarau jak di bada bekerbantu, kataunyau, “Tuhan Allah diau Mahakuasau, ukuman diau Dighi ukumkatu benagh ngan adil.”

⁸ Udim itu malaikat diau keempat nuangka isi panau ke matau-aghi, dienjuakka kuasau endak mutungka jemau ngan api.

⁹ Mangku jemau mutung karnau api diau angat kematila. Ughangtu nggelakka namau Allah diau nguasaui sengsarau itu tadi, enggup ngubai jak di peremba'au, nidau endak ngagungka Allah.

¹⁰ Udim itu malaikat diau kelimau nuangka panau ke kerusi rajau benatang itu, mangku gegalau nenggeriau njadi keleman. Mangku jemaunyau nggigit lida karnau kesakitan.

¹¹ Ughangtu ndawaika Allah diau di sergau karnau bisul tadi ngan kesakitan. Anyautu ughangtu nidau kila ngubai jak di peremba'au diau ja'at.

¹² Udim itu malaikat keenam nuangka isi panau ke ayiak Iprat diau besaktu. Ayiaktu njadi keghing, mangku rajau diau datang jak di sebela matau-aghi idup pacak lalu.

¹³ Mangku aku nginak tigau rua ja'at ngeluagh jak di mulut nagau ngan jak di mulut benatang ngan jak di mulut nabiautu. Rua ja'attu luluak bekatak.

¹⁴ Ruatu rua sitan diau mbuat tandau nyelia. Tigau ruatu pegi njenguak gegalau rajau di deniau ngajung betunggal endak beperang masau aghi besak, masau Allah nyatauka kuasauNyau.

¹⁵ “Kina'ila, aku datang luak pemaling. Riangla jemau diau maju siagau ngan maju meratika kain bajuau, mangku jangan bejalan telanjang ngan nidau maluan di mukau jemau.”

¹⁶ Mangku ditunggalka ughangtu di bada diau dikiciakka basau Ibrani, Harmagidun.

¹⁷ Udim itu malaikat diau ketujua nuangka isi panau ke awang-awang, mangku adau suarau nyaghing jak di dalam Ghuma Allah di guak kerusi rajautu, kataunyau, “La udim!”

¹⁸ Mangku nyelanyar kilat ngan gelugur gurua, mangku adau gempau diau besak luak lum kekela adau jak manusiau adau di deniau. Besak kematila gempautu.

¹⁹ Kuta besak itu tebela njadi tigau bagi. Kuta-kuta jemau diau nidau keruan Allah ancur. Mangku Allah teghingat ngan Babil diau besaktu endak ngenjuakka diau minum pan diau penua ngan anggur mara Allah.

²⁰ Mangku gegalau pulau lengit ngan gunung abis galau.

²¹ Mangku adau ujan es, beghat titi'au limau pulua kilu. Es itu umban jak di langit ninggang jemau, mangku jemau ndawaika Allah karnau sengsarau ujan estu, karnau ughangtu nanggung kematila.