PENGINA'AN 15 - PEJANJIAN EMPAI CERITAU ILUAK

Nyanyian jemau diau menang

¹ La udim itu aku nginak tandau lain agi di langit diau besak ngan nyelia. Adau tujua malaikat ngan tujua sengsarau diau mendian. Inila pengabisan mara Allah.

² Mangku aku nginak adau laut luak kacau beundak api. Di tepi lauttu adau jemau diau la ngalaka benatang ngan patungau ngan angkau namaunyautu. Ughangtu adau kecapi jak di Allah.

³ Ughangtu benyanyi nyanyika nyanyian Musa, budak Allahtu, ngan nyanyian Anak Bebiri. Muniau luak ini, “Tuhan, Allah diau Mahakuasau. Gegalau kerjau Dighi besak nianan ngan nyelia. Dighitu Rajau gegalau bangsau. Carau Dighi adil ngan benagh galau.

⁴ Sapau nidau takut ngan Dighi, Tuhan? Sapau enggup ngagungka namau Dighi? Cuman Dighi ajau diau suci. Gegalau bangsau ka datang nunduak nyemba Dighi, karnau carau Dighi diau adiltu la kina'an ngan gegalau jemau.”

Tujua malaikat ngan tujua pan mara Allah

⁵ La udim itu aku nginak Ghuma Allah di sergau tebukak ngan kima tandau Allah adau di dalamau.

⁶ Tujua malaikat ngan tujua sengsarautu ngeluagh jak di Ghuma Allah. Bajuau kain putia diau beresia besinagh-sinagh. Dadaunyau dililit emas.

⁷ Mangku sikuak jak di empat benatangtu ngenjuakka ngan malaikat tadi tujua pan jak di emas penua diisi ngan mara Allah, diautu Allah diau idup selelamaunyau.

⁸ Mangku Ghuma Allahtu penua ngan asap karnau keagungan Allah ngan kuasauNyau. Mangku selamau tujua sengsarau jak di tujua malaikattu lum mandak, nidau bediau sughang kiala diau pacak masuak ke dalam Ghuma Allahtu.