PENGINA'AN 14 - PEJANJIAN EMPAI CERITAU ILUAK

Anak Bebiri ngan anak-buaHau

¹ Mangku aku nginak, tekinak Anak Bebiri betegak di bukit Siun. Guak Diau adau seratus empat pulua empat ribu jemau. Di kening ughangtu ditulis namau Bebiritu ngan namau Bapa'Au.

² Mangku aku ndengagh suarau jak di langit luak muni ayiak besak diau tumban jak di cughup ngan muni gurua diau besak. Mangku suarau diau kudengaghtu luak muni pemain kecapi diau dang metiak kecapiau.

³ Ughangtu dang nyanyika nyanyian empai di adapan kerusi rajau ngan empat benatang ngan tuau-tuau. Mangku nidau bediau jemau diau pacak belajagh nyanyiantu lain jak di seratus empat pulua empat ribu jemau diau la ditebus jak di deniautu.

⁴ Ughangtu jemau diau nidau ncampur ngan tinau, masia beresia luak perawan. Ughangtu ngikut Anak Bebiritu ke manau kila Diau pegi. Ughangtu ditebus jak di manusiau njadi luak tandau beterimau-kasia diau dulu sekali dienjuakka batan endak Allah ngan Anak Bebiritu.

⁵ Ughangtu nidau pembu'ung, nidau nian becacat.

Tigau malaikat ngiciakka aghi kiamat

⁶ Mangku aku nginak sughang malaikat lain terbang tinggi di langit. Di diau adau ceritau iluak diau selelamaunyau batan endak dikiciakka ngan jemau diau adau di deniau, gegalau bangsau ngan jungku ngan basau ngan pemili.

⁷ Malaikattu tepekiak ngan suarau bias, “Takutla ngan Allah ngan agungka Diau, karnau la sampai masau Allah ngukum manusiau. Sembala Allah diau njadika langit ngan deniau ngan laut ngan gegalau matau-ayiak.”

⁸ Mangku sughang malaikat nyusul malaikat tadi sampai tepekiak, “Diau la rubua! Kuta Babil diau besaktu la ancur! Babiltu la mabuakka gegalau bangsau ngan anggurau, diautu serilau menaugawia.”

⁹ Mangku sughang malaikat lain agi nyusul duau malaikat tadi. Ngan suarau bias diau bekatau, “Amun jemau nyemba benatang ngan patungautu, mangku nerimau tandaunyau di tanganau madak di keningau,

¹⁰ mangku jemautu ka minum jak di anggur Allah, diautu anggur maraHau diau nidau beundak. Mangku jemautu ka disiksau dalam api ngan belirang di adapan malaikat suci ngan Anak Bebiritu.

¹¹ Asap api diau nyiksau jemautu nayiak ke atas enggut selelamaunyau. Mangku jemau diau nyemba benatang ngan patungau, mangku la nerimau tandau namaunyautu, nidau mandak-mandak disiksau siang malam.”

¹² Diau penting, supayau jemau umat Allah maju na'ati perintaHau ngan maju percayau ngan Yesus.

¹³ Mangku aku ndengagh suarau jak di sergau ngiciak, “Tuliskala! Mulai mbak kini riangla jemau mati diau mati la percayau ngan Tuhan.” “Nyela!” Katau Rua Allah, “Mangku ughangtu pacak gheghadu jak di kerjaunyau diau ngeriakatu, karnau asil kerjau ughangtu ka maju ngikut ughangtu.”

Ketaman di deniau

¹⁴ Udim itu aku nginak adau aban putia. Di pucuak abantu duduak Sughang luak Anak Manusiau. Di pala'Au adau gitar emas. Di tanganAu adau tuai diau tajam.

¹⁵ Mangku adau sughang malaikat ngeluagh jak di Ghuma Allah. Ngan suarau bias diau ngiciak ngan Jemau diau duduak di pucuak abantu, kataunyau, “Ayunkala tuai Dighi mangku ngetam. La sampai masaunyau endak ngetam, karnau ketaman di deniau la masak.”

¹⁶ Mangku Jemau diau duduak di pucuak abantu ngayunka tuaiau ke deniau, mangku deniautu diketam.

¹⁷ Udim itu adau sughang malaikat agi ngeluagh jak di Ghuma Allah di sergau. Diau adau pulau pisau tajam.

¹⁸ Mangku adau malaikat lain agi datang jak di mija bada bekerban. Diau nguasaui api. Diautu tegauk ngan suarau nyaghing ngiciak ngan malaikat diau adau pisau tajamtu, kataunyau, “Ayunkala pisau diau tajam tadi, tetakla bua anggur di deniau, karnau buatu la masak.”

¹⁹ Mangku malaikattu ngayunka pisaunyau ke deniau, diteta'au bua anggur di deniautu mangku disipatka ke kilangan besak. Kilangantu ibarat mara Allah.

²⁰ Mangku bua anggurtu dilincit di luagh kuta. Jak di kilangantu melilia dagha, tinggiau laka duau mitir sejawua tigau ratus kilu.