PENGINA'AN 10 - PEJANJIAN EMPAI CERITAU ILUAK

Kitab keciak diau tebukak

¹ Mangku aku nginak sughang malaikat agi diau kuat, tughun jak di sergau ditukupi aban. Di tipatan pala'au adau ghunia. Dayiau luak matau-aghi. Ketingau luak tiang api.

² Di tanganau adau gulungan kitab keciak diau tebukak. Keting kananau dipijakkanyau di laut, keting kidaunyau dipijakkanyau di daghat.

³ Diau tegauk ngan suarau nyaghing luak setuau diau ngaum. La udim tegauk kedengaghan muni gurua ngiciak tujua kali.

⁴ La udim muni guruatu, aku endak nuliska kici'annyau, anyautu adau suarau jak di sergau, kataunyau “Resiaukala tuapau diau dikiciakka guruatu. Jangan kaba tuliska!”

⁵ Mangku malaikat diau kukinak betegak di laut ngan di daghattu nginjungka tangan kananau ke langit.

⁶ Mangku diau besumpa demi Allah diau idup selelamaunyau diau la njadika langit ngan gegalau isiau, deniau ngan gegalau isiau, laut ngan gegalau isiau, kataunyau, “Masaunyau nidau ka dipundurka agi!

⁷ Anyautu amun malaikat ketujua ngembus terumpitau, mangku Allah ka ngerjauka rencanaunyau diau diresiaukatu, luak la dikiciakkaNyau ngan nabi-nabi, budak-buda'Autu.”

⁸ Mangku suarau diau la kudengagh jak di sergautu ngiciak agi ngan aku, kataunyau, “Pegila, ambiakla gulungan kitab diau tebukak di tangan malaikat diau betegak di laut ngan di daghattu.”

⁹ Mangku aku pegi njenguak malaikattu mintak ngan diau, supayau gulungan kitabtu dienjuakka ngan aku, kataunyau, “Ambiakla, makanla gulungantu. Di peghut kaba ka payit, anyautu di mulut teghasau manis luak pemanisan medu.”

¹⁰ Mangku kuambiak kitab jak di tangan malaikattu, mangku kumakan. Di mulut teghasau manis luak pemanisan medu, anyautu la udim kumakan, busungku njadi payit.

¹¹ Mangku dikiciakka agi ngan aku, “Kaba mesti ngiciakka katau Allah agi ceritau setu diau ka tejadi ceritau banyak bangsau, pemili, basau ngan rajau.”