MATIUS 6 - PEJANJIAN EMPAI CERITAU ILUAK

Ceritau sedeka

¹ “Ingatkala jangan kamu ngerjauka kewajiban agamau di mukau jemau banyak endak dikinak jemau. Amun kamu bebuat luak itu, kamu nidau ka dienju'i upa ngan Bapak di sergau.

² Amun kaba ngenjuak ngan jemau, jangan kaba siarka ngan jemau lain, luak diau dikerjauka jemau diau cak iluak di ghuma-ghuma sembayang ngan di jalan besak, mangku dipuji jemau. Keruanila, ughangtu la nerimau upahau.

³ Anyautu amun kaba ngenjuak ngan jemau, jangan tangan kidau kaba ngeruani setu diau dikerjauka tangan kanan.

⁴ Nengkela kerjau kaba nidau keruan ngan jemau, lain jak di Bapak di sergau. Diautu nginak kerjau kaba di bada tebuni, mangku ka mbalas ngan kaba.”

Ajaghan bedu'a

⁵ “Amun kamu bedu'a, jangan luak dikerjauka jemau cak alim. Ughangtu galak bedu'a sampai betegak di ghuma sembayang ngan di penyimpangan jalan endak dikinak jemau. Ingatkala ughangtu la nerimau upahau.

⁶ Anyautu amun kaba bedu'a, masuakla ke bilia, katupka duaghau, mangku bedu'ala ngan Bapak kaba diau nidau kina'an itu. Mangku Bapak kaba diau nginak kerjau kaba diau tebuni ka mbalas ngan kaba.

⁷ Lagi amun kamu bedu'a, jangan panjang-panjang nidau bediau tujuannyau luak jemau diau nidau keruan Tuhan. Ughangtu sangkau, du'a ughangtu ka didengagh karnau panjang ngan banyak katau itu.

⁸ Jangan luak ughangtu. Bapak kamu la keruan, setu diau kamu enda'au, antak ka kamu mintak ngan Diau.

⁹ Bedu'ala luak ini: ‘Bapak kami diau di sergau, kami endak namau Dighi diregaui, karnau Dighi suci.

¹⁰ Kami endak Dighi njadi rajau kami, mangku kendak Dighi dituruti di deniau luak di sergau.

¹¹ Enju'ila kami saghini makanan kami ngan secukupau.

¹² Ngabiska sala kami, luak kami ngabiska sala jemau ngan kami.

¹³ Jangan enangka kami dicubaui, anyautu ilakkala kami jak di diau ja'at. [Karnau Dighila rajau diau bekuasau ngan agung selelamaunyau. Amin.’]

¹⁴ Amun kamu ngabiska sala jemau ngan kamu, Bapak kamu di sergau ka ngabiska sala kamu pulau.

¹⁵ Anyautu amun kamu nidau ngabiska sala jemau, Bapak kamu di sergau nidau pulau ka ngabiska sala kamu.”

Ajaghan puasau

¹⁶ “Amun kamu puasau, dayi kamu jangan mangut luak jemau cak alim. Ughangtu cak litak, supayau jemau nginak diau dang puasau. Keruanila, ughangtu la bulia upahau.

¹⁷ Anyautu amun kaba puasau, suguila gumbak kaba ngan ghusapila dayi kaba,

¹⁸ supayau nidau bediau diau keruan, bansau kaba puasau, lain jak di Bapak kaba diau nidau kina'an. Mangku Diau nginak di bada diau tebuni ka mbalas ngan kaba.”

Retau di sergau

¹⁹ “Jangan kaba melungguakka retau bendau batan endak diri kaba di deniau. Di deniauni retautu ka dimakan gegat ngan karat ngan dimalingi jemau.

²⁰ Anyautu lungguakkala retau kaba di sergau. Di sergautu nidau ka dirusakka gegat ngan karat ngan pulau nidau dimalingi jemau.

²¹ Karnau di manau adau retau kaba, di situ pulau ati kaba.

²² Matau umpamau lampu ati. Amun matau kaba iluak, gegalau ati kaba terang.

²³ Amun matau kaba ja'at, gegalau ati kaba keleman nian. Mangku amun lampu di ati kaba keleman, alangka kelemanau.

²⁴ Nidau sughang kia pacak njadi anak-bua duau jemau, karnau amun luak itu, diau ka sayang ngan diau sughang diau sughang agi nidau. Diau ka setia ngan diau sughang ngan diau sughang agi nidau. Kamu nidau pacak bekerjau batan endak Allah ngan batan endak retau bendau pulau.”

Jangan ghegak

²⁵ “Karnau itu ingatkala jangan kamu ghegak ngan pengidupan kamu, tuapau diau endak kamu makan ngan minum ngan tuapau diau endak kamu pakai. Ukanau pentingla idup sangkan makanan ngan badan sangkan baju?

²⁶ Kina'ila burung di awang-awang. Diau nidau nanam, nidau ngetam, nidau bediau tengkiang. Empuak luak itu Bapak kamu di sergau ngenju'i diau makan. Beregaula kamu sangkan burung.

²⁷ Sapau jak di kamu karnau ghegak pacak manjangka idupau empuak dikit kiala?

²⁸ Mangku ngapau kamu ghegak ngan setu diau endak dipakai? Kina'ila bungau gheghumputan di padang. Diau tumbua nidau bekerjau ngan nidau pulau betenun.

²⁹ Anyautu Rajau Salumu diau makai baju rajau diau alap nianan nidau pulau sualap bungautu.

³⁰ Saghini ghumput di padang tumbua, pagi disilap abis. Empuak luak itu Allah ndandani ghumput itu alap nian, apau lagi kamu, ui jemau diau nidau percayau nian.

³¹ Karnau itu nidau nanti ghegak ngan bekatau, ‘Tuapau diau ka kami makan? Tuapau diau ka kami minum? Tuapau diau ka kami pakai?’

³² Gegalaunyautu didala'i jemau diau nidau keruan Allah. Anyautu Bapak kamu di sergau keruan, bansau kamu endak gegalaunyautu.

³³ Anyautu kamu beusahala, mangku Allah njadi rajau kamu, ngan kerjaukala kenda'Au, mangku gegalaunyautu ka dienjuakka ngan kamu.

³⁴ Karnau itu nidau nanti kamu ghegak aghi pagi, karnau aghi pagi ka adau agi rupu'an lain. Rupu'an saghi jadila batan endak saghi.”