MATIUS 4 - PEJANJIAN EMPAI CERITAU ILUAK

Yesus dicubaui

¹ Mangku Yesus dibata'i Rua Allah ke padang bungin endak dicubaui Iblis.

² Empat pulua aghi empat pulua malam Diau nidau makan, mangku Diau lapagh.

³ Mangku Iblis datang ngan bekatau, “Kabani Anak Allah. Ajungla batu-batu ini njadi ruti!”

⁴ Yesus nimbal, “Di Injil ditulis, ‘Manusiau idup ukan jak di makanan ajau, tapitu jak di bilang katau diau dikiciakka Allah.’ ”

⁵ Udim itu Iblis mbatak Yesus ke Yerusalim, kuta sucitu, mangku diajung betegak di pucuak mubungan Ghuma Allah.

⁶ Mangku diau bekatau, “Kabani Anak Allah. Tumbanka diri Kaba ke bawa, karnau di Injil ditulis, ‘Allah ka ngajung malaikat-malaikatAu njagaui Kaba. Ughangtu ka nyanggak Kaba, mangku keting Kaba endiak tuantuak ke batu.’ ”

⁷ Katau Yesus, “Di Injil ditulis pulau, ‘Jangan kaba ncubaui Tuhan, Allah kaba.’ ”

⁸ La udim itu Iblis mbatak Yesus agi ke gunung diau tinggi nianan, diancakkanyau ngan Diau gegalau kerajauan di deniauni ngan gegalau kekayauannyau

⁹ mangku bekatau, “Gegalaunyautu ka kuenjuakka ngan Kaba, amun Kaba nunduak nyemba aku.”

¹⁰ Mangku Yesus nimbal, “Kisitla kaba, Iblis! Di Injil ditulis, ‘Kaba mesti nyemba Tuhan, Allah kaba. Diau ajaula mesti kaba semba.’ ”

¹¹ Udim itu Iblis pegi jak di Diau, mangku malaikat-malaikat datang nepi'i Diau.

Yesus mulaika kerjauNyau di Galilia

¹² La ndengagh, bansau Yuhanis la dimasuakka ke jil, mangku Yesus pegi ke Galilia.

¹³ Diau ninggalka Nasarit, mangku mendam di Kapernaum di tepi danau Galilia, di daira Sibulun ngan Naptali.

¹⁴ Mangku la ditepati katau Allah diau dikiciakka nabi Yesaya,

¹⁵ “Tana Sibulun ngan tana Naptali, di jalan ke laut, di beghang ayiak Yurdan, Galilia tana jemau ukan Yahudi.

¹⁶ Jemau diau idup di keleman la nginak terang diau besinagh. Ngan jemau diau idup di nenggeri maut la tumbua sinagh terang.”

¹⁷ Jak masau itu Yesus mulai ngiciakka, “Ubaila jak di dusau-dusau kamu, karnau nidau lamau agi Allah ka merinta luak rajau.”

Yesus mantau empat ughang tukang ndalak ikan

¹⁸ Yesus dang ngerayau di tepi danau Galilia, Diau nginak jemau duau beghading, diautu Simun diau dinamauka pulau Pitrus ngan adingau Anderias. Ughang duautu dang ngipaska jalaunyau di danau itu, karnau ughangtu tukang ndalak ikan.

¹⁹ Yesus bekatau ngan ughangtu, “Mela, ngikut aku. Aku ka ngajagh kamu njadi tukang ndalak jemau.”

²⁰ Ughang duautu ninggalka jalaunyau mangku ngikut Yesus.

²¹ Yesus la bejalan agi, mangku nginak jemau duau beghading lainau, diautu Yakubus ngan Yuhanis, anak Sebedius. Ughang duautu serempak ngan ba'au dang ngilu'i jalau dalam perawu, mangku dipantauNyau pulau ughang duautu.

²² Ughang duautu ninggalka perawu ngan ba'autu mangku ngikut Yesus.

Yesus ngajagh ngan meghaduka banyak jemau

²³ Yesus ngidari gegalau daira Galilia. Diau ngajagh di ghuma-ghuma sembayang ngiciakka ceritau iluak, bansau Allah endak merinta. Diau pulau meghadui gegalau jemau buidapan ngan jemau cacat.

²⁴ Mangku ceritau Yesus la tesiar di gegalau perupinsi Siria, mangku banyak jemau datang njenguak Diau. Ughangtu mbatak jemau diau nanggungka serbau idapan ngan serbau mecam sengsarau. Adau jemau diau disaraui rua ja'at, adau diau buidapan gilau bangkai, adau diau lumpua. Gegalaunyautu dighaduka Yesus.

²⁵ Mangku jemau banyak nianan ngikut Yesus. Adau diau datang jak di Galilia, adau diau jak di Dikapulis, adau diau jak di Yerusalim, jak di Yudia ngan pulau jak di daira beghang ayiak Yurdan.