MATIUS 28 - PEJANJIAN EMPAI CERITAU ILUAK

Yesus ngulang idup

¹ Aghi Sabat la lalu. Aghi Minggu paghak siang Maria Magdalina ngan Maria diau lain pegi ngaruaka kuburan Yesus.

² Mangku adau gempau diau besak. Mangku sughang malaikat Tuhan tughun jak di sergau ngguliakka batu penukuptu ngan duduak di pucu'au.

³ Dayi malaikattu luak kilat, bajuau putia nianan.

⁴ Tentera diau njagaui kuburantu gemetagh ngan takut kematila njadi luak jemau mati.

⁵ Malaikattu bekatau ngan tinau tadi, “Nidau nanti penakut. Aku keruan kamu ndala'i Yesus diau la disalipka itu.

⁶ Diautu nidau bediau di sini. Diau la ngulang idup, luak setu diau la dikiciakkaNyau. Mela, kina'ila badaHau.

⁷ Mbak kini pegila cecepat, kiciakka ngan anak-buaHau Diau la ngulang idup. Diau ndului kamu ke Galilia. Di situ kamu ka betemu ngan Diau. Ingatkala katauku ini diau la kukiciakka ngan kamu.”

⁸ Tinau tadi cecepat ninggalka kuburantu ngan peghasauan takut ngan riang nian. Ughangtu belaghi-laghi endak ngiciakka ceritau itu ngan anak-bua Yesus.

⁹ Yesus datang nemui tinautu ngan bekatau, “Salam.” Mangku ughangtu masighi Diau ngan ngecakka ketingAu mangku nyemba Diau.

¹⁰ Mangku Yesus bekatau, “Nidau nanti penakut.” Katau Yesus ngan ughangtu, “Pegila, kiciakka ngan kantin-kantinKu, supayau ughangtu pegi ke Galilia. Di situ ughangtu ka nginak Aku.”

Ceritau penjagau

¹¹ Penarau tinau tadi dang pegi, adau jak di tentera diau njagau kuburantu diau pegi ke kuta. Ughangtu ngiciak ngan imam-imam setu diau la tejadi.

¹² Imamtu buijau ngan tuau-tuau jemau Yahudi, mangku ughangtu ngenjuakka tanci ngan tentera tadi.

¹³ Katau ughangtu, “Kamu mesti ngiciakka, bansau anak-buaHau datang aghi malam ngan maling mayatAu, penarau kamu dang tiduak.

¹⁴ Amun gubernur ndengagh ceritau itu, kami ka ngiciak ngan diau, mangku kamu nidau diukum.”

¹⁵ Tentera itu ngambiak tancitu ngan ngerjauka setu diau dikiciakka ngan ughangtu. Ceritau itu masia tesiar di guak jemau Yahudi enggut mbak kini.

Perinta ngiciakka ceritau iluak

¹⁶ Sebelas anak-bua Yesus itu pegi ke bukit di Galilia luak diau diajungka Yesus ngan ughangtu.

¹⁷ Ughangtu nginak Yesus di situ, mangku nunduak nyemba Diau. Anyautu adau pulau diau asau-asau.

¹⁸ Yesus masighi ughangtu ngan bekatau, “Gegalau kuasau di sergau ngan di deniau la diseraka ngan Aku.

¹⁹ Karnau itu, pegila ke gegalau bangsau di deniau, jadikala ughangtu anak-buaKu, baptiskala ughangtu ngan namau Bapak, Anak ngan Rua Allah,

²⁰ ajaghkala ughangtu ngerjauka gegalaunyau diau la Kukiciakka ngan kamu. Ingatkala, Aku ka maju adau guak kamu enggut aghi kiamat.”