MATIUS 27 - PEJANJIAN EMPAI CERITAU ILUAK

Yesus dibatak njenguak Pilatus

¹ Aghi gi akap nianan, gegalau imam bepangkat tinggi ngan tuau jemau Yahudi betunggal mutuska endak mbunua Yesus.

² Diau dighimpus, dibata'i endak diseraka ngan Pilatus, gubernur Rum itu.

Yudas mati

³ Yudas diau njualka Yesustu la nginak Yesus diukum mati, diau nyesal. Mangku mbaliakka tigau pulua tanci pirak itu ngan imam ngan tuau-tuau.

⁴ Diau bekatau, “Aku la bedusau, karnau njualka jemau diau nidau besala, mangku Diau diukum mati.” Ughangtu nimbal, “Ukan urusan kami. Itu urusan kaba.”

⁵ Yudas ncapakka tancitu dalam Ghuma Allah, mangku pegi bekujut.

⁶ Imam-imam itu ngambiak tancitu ngan bekatau, “Tanci ini tanci dagha. Nurut ukum Taurat nidau bulia dimasuakka dalam bada pesembahan di Ghuma Allah.”

⁷ Udim ughangtu buijau, digunaukanyau tancitu endak mbeli tana diau dikiciakka Tana Tukang Peghiyuak. Tana itu dipakai batan endak nguburka jemau asing.

⁸ Itula sebapau enggut mbak kini tana itu dinamauka tana dagha.

⁹ Luak itula ditepati setu diau la dikiciakka nabi Yeremia, “Ughangtu nerimau tigau pulua tanci pirak. Itu regau diau ditujui jemau Israil batan bayighan batan endak sughang jemau.

¹⁰ Mangku tanci itu dipakai endak mbeli tana tukang peghiyuak luak la diperintaka Tuhan ngan aku.”

Yesus di adapan Pilatus

¹¹ Mangku Yesus diadapka ngan Pilatus, gubernur nenggeri itu. Pilatustu betanyau, “Kaba rajau jemau Yahudi?” Yesus nimbal, “Dighitu la ngiciakkanyau.”

¹² Mangku imam-imam bepangkat tinggi ngan tuau-tuau jemau Yahudi ngiciakka Yesus ngan banyak buru'an. Anyautu Yesus nidau nimbal dikit kiala.

¹³ Mangku katau Pilatus, “Apu Kaba nidau ndengagh gegalau buru'an diau dikiciakka ughangtu?”

¹⁴ Anyautu Yesus nidau nimbal dikit kiala, mangku gubernurtu kemangan nian.

¹⁵ Idang taun masau aghi rerayau Paska biasaunyau gubernur mbibaska sughang kawalan nurut kendak jemau banyak.

¹⁶ Masau itu adau sughang kawalan diau tekenal, namaunyau Yesus Barabas.

¹⁷ Mangku jemau banyak la betunggal, Pilatus betanyau ngan ughangtu, “Sapau diau kamu endak kubibaska batan endak kamu, apu Yesus Barabas? Apu Yesus diau dikiciakka Keristus, Rajau Penyelamat?”

¹⁸ Pilatus ngiciak luak itu, karnau diau keruan, bansau pengulu jemau Yahudi nyeraka Yesus ngan diau, karnau ughangtu sengit.

¹⁹ Pilatus dang duduak di bada pengadilan, biniau bepesan ngan diau, “Jangan kamu ncampuri pekarau Jemau diau nidau besala itu. Di malam aku adau mimpi karut mangku nanggung nian karnau Jemau itu.”

²⁰ Anyautu imam-imam ngan tuau-tuau jemau Yahudi maju ngasung jemau banyaktu mintak ngan Pilatus, supayau Barabas dibibaska ngan Yesus diukum mati.

²¹ Mangku gubernurtu betanyau agi ngan ughangtu, “Jak di duau ughang itu sapau diau kamu endak kubibaska batan endak kamu?” Katau ughangtu, “Barabas!”

²² Mangku Pilatus betanyau ngan ughangtu, “Mangku tuapau diau mesti kubuat ngan Yesus diau dikiciakka Keristus?” Katau ughangtu, “Pakuka Diau di kayu salip!”

²³ Katau Pilatus, “Tuapau keja'atanNyau?” Ughangtu tegauk, “Bunuala Diau! Pakukala Diau di kayu salip!”

²⁴ Mangku Pilatus nyadari, bansau diau nidau pacak agi mbuat tuapau-apau, lagi jemau banyaktu la mulai kacau. Diau ngambiak ayiak, mbasua tanganau di mukau jemau banyak ngan bekatau, “Aku nidau betanggung-jawab ngan kematian Jemau ini. Itu urusan kamu!”

²⁵ Gegalau jemau banyaktu nimbal, “Au, nengkela kami ngan anak-cucung kami nanggungka ukuman kematianNyau.”

²⁶ Mangku diau ngajung Barabas dibibaska batan endak ughangtu ngan Yesus dibaduki mangku diseraka endak dipakuka di kayu salip.

Yesus dipusiakka

²⁷ Mangku tentera-tentera Pilatus mbatak Yesus masuak ke istana gubernur. Gegalau tenterahau betunggal di guak Yesus.

²⁸ Ughangtu ngelucungi baju Yesus mangku nyurumka baju rajau ngan Diau.

²⁹ Ughangtu mbuat gitar jak di ghanting bedughi, dikenaukanyau di palak Yesus. Udim itu dienjuakka sebatang bulua di tangan kananAu, mangku ughangtu nunduak di adapanNyau ngan nggelakka Diau, katau ughangtu, “Idup, ui rajau jemau Yahudi!”

³⁰ Ughangtu meludai Diau ngan ngambiak tungkattu mangku dibaduki pala'Au.

³¹ Udim dipusiakka, ughangtu ngelucungi baju rajau itu, dikenauka bajuAu agi ngan Diau, mangku dibata'i keluagh endak dipakuka di kayu salip.

Yesus dipakuka di kayu salip

³² Di tenga jalan ughangtu betemu Simun, jemau Kirini, mangku dipasau mikul salip Yesus.

³³ Mangku ughangtu sampai di bada diau benamau Gulguta, retiau bada kerungkang palak.

³⁴ Di situ ughangtu ngenju'i Yesus minum anggur undak empedu. Yesus la ngecap anggurtu, Diau enggup minumau.

³⁵ La udim itu Diau dipakuka di kayu salip, mangku tenteratu mbagi pekakasAu disuntinkanyau.

³⁶ Mangku ughangtu duduak di situ njagau Diau.

³⁷ Di pucuak pala'Au dipasang tulisan buru'an mburuakka Diau, bacauannyau, “Inila Yesus, Rajau jemau Yahudi.”

³⁸ Adau pulau duau ughang bandit diau disalipka serempak ngan Yesus, sughang di sebela kananAu, sughang di sebela kidauNyau.

³⁹ Jemau diau lalu di situ nggilingka palak ngan nggelakka Yesus.

⁴⁰ Katau ughangtu, “Ai, Kaba endak merubuaka Ghuma Allah ngan negakkanyau timpau tigau aghi. Amun Kaba ngenian Anak Allah, selamatkala nyawau Kaba, tughunla jak di kayu salip itu.”

⁴¹ Luak itu pulau imam-imam ngan guru-guru ukum Taurat ngan tuau-tuau nggelakka Yesus. Ughangtu bekatau,

⁴² “Diau nyelamatka jemau lain, anyautu diriAu nidau pacak Diau selamatka. Amun Diau Rajau Israil, iluakla Diau tughun mbak kini jak di kayu saliptu, mangku kami endak percayau ngan Diau.

⁴³ Diau ngaghapka Allah ngan bekatau, bansau Diau Anak Allah. Mela kitau nginak, apu Allah endak nyelamatka Diau mbak kini.”

⁴⁴ Bandit diau dipakuka serempak ngan Diau nggelakka Diau luak itu pulau.

Yesus mati

⁴⁵ Aghitu tengaghi daira itu keleman galau selamau tigau jam.

⁴⁶ Kekirau jam tigau petang Yesus tegauk, katauNyau, “Eli, eli, lama sabaktani!” Retiau, “AllahKu, AllahKu, ngapau Dighi ninggalka Aku?”

⁴⁷ Ndengagh titu adau jemau diau betegak di situ diau bekatau, “Diau mantau Elia.”

⁴⁸ Mangku sughang jak di ughangtu belaghi mbatak bungau karang, dimasuakkanyau dalam anggur masam, dicucuakkanyau ke kemughu, mangku dienjuakkanyau batan minuman Yesus.

⁴⁹ Anyautu jemau lain bekatau, “Tunggu kudai! Mela kitau nginak, apu Elia datang.”

⁵⁰ Udim itu Yesus tegauk agi, mangku nyawauNyau abis.

⁵¹ Tabir Ghuma Allah cebagh bela duau jak di pucuak enggut ke bawa. Adau gempau mangku bukit-bukit batu peca.

⁵² Kuburan-kuburan tebukak pulau ngan banyak umat Allah ngulang idup.

⁵³ Masau Yesus la ngulang idup, ughangtu ngeluagh pulau jak di kuburan, mangku masuak kuta Yerusalim. Banyak jemau nginak ughangtu di situ.

⁵⁴ Kumandan tentera ngan tenterahau diau dang njagaui Yesus nginak gempau ngan gegalau diau tejadi itu, mangku penakut nian ngan bekatau, “Nyela nian, Diauni Anak Allah.”

⁵⁵ Di situ adau pulau banyak jemau tinau diau dang nginak jak di jawua. Ughang itula diau ngikut Yesus jak di Galilia endak nulung Diau.

⁵⁶ Di antarau ughangtu adau Maria Magdalina ngan Maria, mak Yakubus, ngan pulau mak Yuhanis.

Yesus dikuburka

⁵⁷ Petang itu adau sughang jemau kayau jak di Arimatia diau benamau Yusup diau pulau anak-bua Yesus.

⁵⁸ Diau pegi ngadap Pilatus mintak mayat Yesus. Mangku Pilatustu ngajung, supayau mayat Yesustu dienjuakka ngan diau.

⁵⁹ Yusuptu ngambiak mayattu dibalutau ngan kain putia diau empai,

⁶⁰ mangku ditepiakka dalam kuburannyau diau empai dibuat dalam bukit batu, mangku diguliakka sebua batu besak nukupi lubang duaghau kuburan itu. Udim itu diau pegi.

⁶¹ Maria Magdalina ngan Maria diau lain mendam di situ duduak ngadapinyau.

Kuburan Yesus dijagau

⁶² Pagi di aghiau aghi Sabat imam-imam bepangkat tinggi ngan jemau Parisi pegi ngadap Pilatus.

⁶³ Ughangtu bekatau, “Tuan, kami teghingat, masau jemau penipu itu gi idup, Diau bekatau, ‘La udim duau malam Aku ka idup agi.’

⁶⁴ Karnau itu ajungla jemau njagau kuburan itu iluak-iluak enggut aghi ketigau, supayau anak-buaHau nidau pacak maling mayatAu, mangku ngiciakka ngan jemau, bansau Diau la diidupka jak di mati. Mangku tipuan diau mendian ka lebia ja'at jak diau senitu.”

⁶⁵ “Inila tentera-tentera.” Katau Pilatus, “Pegila, jagauila kuburantu iluak-iluak.”

⁶⁶ Mangku ughangtu pegi ke kuburan, ditandaui batu penukupau, mangku tenteratu njagauinyau.