MATIUS 22 - PEJANJIAN EMPAI CERITAU ILUAK

Ceritau jamuan nika

¹ Yesus ngiciak agi ngan ughangtu pakai cuntau, katauNyau,

² “Amun Allah merinta luak rajau, keadaannyau luak ceritau ini: Sughang rajau ngadauka jamuan nika anak lanangau.

³ Rajau itu ngajung anak-buahau pegi nepatka jemau diau la dijeghuminyau ke jamuan itu. Anyautu jemau diau dijeghumitu enggup datang.

⁴ Rajautu ngajung agi anak-buahau diau lain, kataunyau ngan ughangtu, ‘Kiciakkala ngan jemau diau dijeghumitu, Idangan jamu la siap. Sapi ngan anak sapi diau bunguak la disembelia. Gegalaunyau tigha kari. Datangla ke jamuan ini.’

⁵ Anyautu jemau diau dijeghumitu nidau nyanaukanyau. Gegalau ughangtu pegi ke bada kerjau sesughangan. Adau diau pegi ke umau. Adau diau pegi ke bada bedagang.

⁶ Adau pulau diau nangkap anak-bua rajautu, mangku dibaduki ngan dibunua.

⁷ Rajau itu mara kematila, mangku diau ngajung tenterahau mbunua pembunuatu ngan nyilap kuta ughangtu.

⁸ Udim itu diau mantau anak-buahau ngan bekatau, ‘Jamuan tigha kari, anyautu jemau diau dijeghumi tadi nidau pantas.

⁹ Mbak kini pegila ke jalan besak, ajakla jemau banyak diau adau di situ ke jamuan nika.’

¹⁰ Mangku anak-buahautu pegi. Ughangtu pegi ke jalan besak mangku nunggalka gegalau jemau diau betemu ngan ughangtu, empuak iluak empuak ja'at. Mangku bada njamutu penua ngan menda.

¹¹ Udim itu rajautu masuak endak nyambut mendahautu, mangku diau nginak adau sughang diau nidau makai baju alap.

¹² Diau betanyau ngan jemau itu, ‘Luak manau kaba pacak masuak ke sini, nidau makai baju alap?’ Jemautu nidau pacak ngiciakka tuapau-apau.

¹³ Mangku rajautu bekatau ngan anak-buahau, ‘Kebatla keting ngan tangan jemau ini, capakkala diau keluagh ke bada diau keleman. Di situ ka adau tangisan ngan penanggungan.’ ”

¹⁴ Mangku Yesus ngudimi ceritauNyau luak ini, “Banyak jemau diau dipantau, dikit ajau diau tepilia.”

Pembayighan cuki ngan Kaisar

¹⁵ Mangku jemau Parisi pegi buijau, luak manau ughangtu pacak nyalaka Yesus ngan tanyauan.

¹⁶ Mangku ughangtu ngajung anak-bua ughangtu njenguak Yesus serempak ngan bebeghapau anak-bua Herudis. Ughangtu bekatau ngan Yesus, “Pak Guru, kami keruan kici'an Dighi benagh. Dighi ngajaghka kendak Tuhan diau benagh. Dighi nidau ngirauka pendapat sapau kila, karnau Dighi nidau milia jemau.

¹⁷ Karnau itu cubau Dighi kiciakka ngan kami: Nurut peraturan agamau kitau, apu bulia mbayigh cuki ngan Kaisar apu nidau?”

¹⁸ Yesus keruan rencanau diau jedit itu, mangku Diau bekatau, “Ngapau kamu endak ncubau Aku, ui, jemau cak iluak?

¹⁹ Cubau kinakka ngan Aku sutiak tanci pirak.” Mangku dienjuakkanyau ngan Diau sutiak tanci pirak.

²⁰ Mangku Diau betanyau, “Gambaran ngan namau sapau adau di situ?”

²¹ Ughangtu nimbal, “Gambaran ngan namau Kaisar.” “Amun luak itu,” katau Yesus, “Enjuakkala ngan Kaisar setu diau pantas endak Kaisar. Mangku enjuakkala ngan Allah setu diau pantas batan endak Allah!”

²² Ughangtu kemangan ndengagh titu, mangku pegi ninggalka Yesus.

Jemau Saduki nanyauka jemau mati ka ngulang idup agi

²³ Jemau Saduki nidau percayau, bansau jemau mati ka ngulang idup agi. Mangku adau jemau Saduki datang njenguak Yesus ngan betanyau,

²⁴ “Pak guru, Musa ngajaghka luak ini: ‘Amun sughang jemau lanang mati lum adau anak, denga-sana'au mesti nika ngan randaunyau, mangku endak ngadauka jurai batan endak jemau diau la matitu.’

²⁵ Na, adau jemau lanang tujua beghading di sini. Diau tuau nika mangku mati, lum adau anak, mangku biniau ditinggalka batan endak adingau.

²⁶ Luak itu pulau diau keduau ngan diau ketigau enggut diau ketujua mati galau, endiak bediau anak.

²⁷ Udim-udimau tinau itu mati pulau.

²⁸ Luak manau ngan tinau itu masau aghi jemau mati ka diidupka agi? Bini sapau tinautu, karnau ughang tujuatu la nikainyau galau?”

²⁹ Yesus nimbal, “Kapu dighi sala, karnau kapu dighi nidau ngerti, empuak Injil empuak kuasau Allah.

³⁰ Amun jemau mati nanti ngulang idup agi, ughangtu nidau ka belaki bebini agi. Ughangtu ka idup luak malaikat di sergau.

³¹ Apu lum kapu dighi mbacau diau dikiciakka Allah ceritau jemau mati ka diidupka agi? Diau bekatau luak ini,

³² ‘Aku Allah Abraham, Allah Isak ngan Allah Yakub.’ Allahtu ukan Allah jemau mati, tapitu Allah jemau idup.”

³³ Jemau banyaktu ndengagh kici'an Yesus, mangku kemangan karnau ajaghanNyautu.

Perinta diau penting sekali

³⁴ Jemau Parisi la ndengagh, bansau Yesus mbuat jemau Saduki nidau pacak ngiciak tuapau-apau agi. Ughangtu betunggal,

³⁵ mangku adau sughang jak di ughangtu, sughang guru ukum Taurat, betanyau ngan Yesus endak nguji Diau, kataunyau,

³⁶ “Guru, perinta diau manau diau penting sekali dalam ukum Taurat?”

³⁷ Yesus nimbal, “Sayangila Tuhan, Allah kaba ngan sepenua ati kaba, ngan sepenua jiwa kaba, ngan gegalau akal-pikiran kaba.

³⁸ Itula perinta diau dulu sekali ngan diau penting sekali.

³⁹ Mangku perinta diau keduau, diau semegi ngan diau tadi: Sayangila jemau lain luak kaba nyayangi diri kaba.

⁴⁰ Gegalau ukum Taurat ngan ajaghan nabi-nabi bepaut ngan duau perinta itu.”

Rajau Daud ngan Rajau Penyelamat

⁴¹ Jemau Parisi gi betunggal di situ, Yesus betanyau ngan ughangtu,

⁴² “Tuapau pendapat kapu dighi ceritau Mesias, Rajau Penyelamattu? Pengadau sapau Diau?” “Pengadau Daud,” katau ughangtu.

⁴³ Katau Yesus agi, “Amun luak itu, ngapau Daud diau dikuasaui Rua Allah ngiciakka Diau ‘Tuhan’? Karnau Daud bekatau,

⁴⁴ ‘Allah bekatau ngan TuhanKu, Duduakla di sebela kananKu, enggut Aku mbuat musua Kaba tunduak ngan nyemba Kaba.’

⁴⁵ Mangku amun Daud ngiciakka Mesiastu Tuhan, manau ka adau Diau pengadau Daud?”

⁴⁶ Nidau bediau sughang kiala diau pacak nimbali Yesus, mangku jak aghi itu nidau bediau sughang kia diau beghani nanyauka tuapau-apau agi ngan Diau.