MATIUS 20 - PEJANJIAN EMPAI CERITAU ILUAK

Ceritau jemau upahan di kebun anggur

¹ Yesus bekatau, “Amun Allah merinta luak rajau, keadaannyau luak ini: Adau sughang diau ngempu kebun anggur. Akap-akap diau ndalak jemau upahan batan kebunau.

² La tetuju upa ughangtu saghi sutiak tanci pirak, diau ngajung ughangtu bekerjau di kebunau.

³ Kekirau kindang aghi diau pegi agi, dikina'i adau jemau dang nganggur di pekan.

⁴ Kataunyau ngan ughangtu, ‘Pegila kamu, bekerjaula di kebun anggurku. Aku ka ngupa kamu ngan upa diau pantas.’ Ughangtu pegi pulau.

⁵ Kekirau tengaghi ngan pulau lingsir tengaghi diau pegi ngan ngerjauka diau semegi luak tadi.

⁶ Aghi la petang diau pegi agi, mangku nginak gi adau jemau nganggur, mangku diau betanyau ngan ughangtu, ‘Ngapau kamu maju betegak di sini sesaghian, nidau ngerjauka tuapau-apau?’

⁷ Ughangtu nimbal, ‘Karnau nidau bediau jemau diau endak ngupa kami.’ ‘Amun luak itu,’ katau jemau tadi, ‘Pegila ke kebun anggurku.’

⁸ Matau-aghi la padam, jemau diau ngempu kebuntu bekatau ngan mandurau, ‘Pantaula jemau diau bekerjautu mangku mbayighi upa ughangtu, mulai ngan jemau diau bekerjau mendian mangku enggut jemau diau dulu bekerjau.’

⁹ Mangku datang jemau diau bekerjau la petang. Ughangtu nerimau padau sughang sutiak tanci pirak.

¹⁰ Udim itu datang pulau jemau diau bekerjau jak di akap. Ughangtu sangkau ka bulia lebia. Anyautu ughangtu nerimau pulau padau sughang sutiak tanci pirak.

¹¹ Satu nerimau tancitu, ughangtu bemumut mumuti jemau ngempu kebuntu,

¹² kataunyau, ‘Ughangtu datang mendian, cuman bekerjau sejam ajau. Kami bekerjau sesaghian kepanasan, mangku dighi mbayighi ughangtu semegi ngan kami.’

¹³ Jemau diau ngempu kebuntu nimbali sughang jak di ughangtu, ‘Kantin, aku nidau besala ngan kaba. Ukan kaba la tetuju nerimau upa sutiak tanci pirak bekerjau saghi?

¹⁴ Ambiakla upa kaba, pegila. Aku endak ngenjuakka ngan jemau diau bekerjau mendian itu upa diau semegi ngan diau kuenjuakka ngan kaba.

¹⁵ Apu aku nidau bulia bebuat sekendakku ngan hakku? Apu kaba sengit, karnau aku iluak?’ ”

¹⁶ Mangku Yesus bekatau agi, “Luak itula pulau jemau diau mendian ka njadi dulu, jemau diau dulu ka njadi mendian.”

Ketigau kaliau Yesus ngiciakka penanggunganNyau

¹⁷ Yesus dang pegi ke Yerusalim. Di tenga jalan Diau mantau duau belas anak-buaHau mangku ngiciak ngan ughangtu ajau,

¹⁸ “Dengaghkala, mbak kini kitau ngancamka Yerusalim, mangku Anak Manusiau ka diseraka ngan imam-imam bepangkat tinggi ngan guru-guru ukum Taurat. Ughangtu ka ngukum Diau ngan ukuman mati.

¹⁹ Diau ka diseraka ngan jemau diau nidau keruan Allah. Diau ka digelakka, dibaduki ngan dibunua. Mangku la duau malam Diau ka idup agi.”

Pinta'an mak Yakubus ngan Yuhanis

²⁰ Mangku mak Yakubus datang ngan duau ana'au njenguak Yesus, diau nunduak di adapanNyau, karnau adau setu diau endak dipintak.

²¹ Katau Yesus, “Dighi endak tuapau?” Diau nimbal, “Aku endak duau ughang anakku ini duduak di kidau ngan di kanan, amun Kaba njadi rajau nanti.”

²² Katau Yesus, “Kamu nidau keruan setu diau kamu pintak. Apu kamu pacak nanggungka sengsarau luak Aku tanggungka?” Katau ughang duautu, “Kami pacak.”

²³ Katau Yesus agi, “Nyela, kamu ka nanggungka pulau sengsarau luak Aku. Anyautu sapau diau ka duduak di sebela kidau ngan kananKu, itu ukan hakKu. Bada itu batan endak jemau diau ditetapka BapakKu.”

²⁴ Ndengagh titu, sepulua anak-buaHau diau lain mara ngan jemau duau beghading tadi.

²⁵ Karnau itu Yesus mantau gegalau ughangtu mangku katauNyau, “Kamu keruan, bansau penguasau bangsau diau nidau keruan Allah nyaraui jemaunyau. Pengulu-pengulu masau ughangtu.

²⁶ Anyautu kamuni jangan luak itu. Jemau diau endak njadi pengulu, jemautu mesti njadi luak anak-bua.

²⁷ Jemau diau endak njadi penting sekali mesti njadi luak budak kamu.

²⁸ Semegi luak Anak Manusiau pulau datang ukan endak ditulung, tapitu endak nulung mangku ngenjuakka nyawauNyau njadi tebusan batan endak banyak jemau.”

Yesus meghadui duau ughang jemau butau

²⁹ Yesus ngan anak-buaHau dang ngeluagh jak di Yiriku, jemau banyak ngikut Diau.

³⁰ Adau duau jemau butau duduak di tepi jalan. Satu ndengagh Yesus lalu, ughang duautu tegauk, kataunyau, “Ui, Tuhan, Anak Daud! Sialkala kamini!”

³¹ Mangku jemau banyak marai jemau butautu, diajungau diam. Anyautu ughang duautu tamba bias ajau tegauk, kataunyau, “Ui, Tuhan, Anak Daud! Sialkala kamini!”

³² Mangku Yesus mendam, dipantauNyau jemau butautu, mangku bekiciak, “Tuapau kendak kamu mantauku?”

³³ Katau ughang duautu, “Tuhan, kamini mintak matau kami ghadu, mangku pacak nginak.”

³⁴ Mangku Yesus sial ngan jemau butautu, ditatapAu mataunyau. Masau itula pulau ughang duautu pacak nginak, mangku ngikut Yesus.