MATIUS 17 - PEJANJIAN EMPAI CERITAU ILUAK

Yesus diagungka di gunung

¹ Enam aghi udim itu, Yesus mbata'i Pitrus, Yakubus ngan adingau Yuhanis ndaki gunung diau tinggi. Di situ ughangtu ajau.

² Di adapan ughang tigautu Yesus beghuba. DayiAu njadi terang luak matau-aghi ngan bajuAu njadi putia besinagh.

³ Mangku kina'an ughang duau, diautu Musa ngan Elia. Ughang duautu ngiciak ngan Yesus.

⁴ Pitrus ngiciak ngan Yesus, kataunyau, “Tuhan, lemak nian kitau di bada ini. Amun Dighi endak, aku negakka tigau bua punduk di sini, sebua batan endak Dighi, sebua batan endak Musa, sebua batan endak Elia.”

⁵ Diau gi ngiciak luak itu, adau aban terang tughun ngan mbayangi ughangtu, mangku jak di dalam aban itu tedengagh suarau diau bekatau, “Inila AnakKu diau Kusayangi. Diau melemakka atiKu. Dengaghkala Diautu.”

⁶ Ndengagh suarau itu, anak-bua Yesus nunduak sampai ke tana karnau penakut nian.

⁷ Anyautu Yesus njenguak ughangtu, dikecakkaNyau sampai bekatau, “Betegakla, nidau nanti penakut!”

⁸ Satu ncega, ughangtu nidau kina'an sughang kiala lain jak di Yesus.

⁹ Masau ughangtu tughun jak di gunung itu, Yesus ngiciak ngan ughangtu, “Jangan kamu kiciakka ngan sughang kia setu diau kamu kinak tadi, amun Anak Manusiau lum ngulang idup agi.”

¹⁰ Mangku anak-buaHau betanyau ngan Diau, “Amun luak itu, ngapau guru-guru ukum Taurat ngajaghka, bansau Elia mesti dulu datang?”

¹¹ Yesus nimbal, “Nyela, Elia datang, mangku diau nyiapka gegalaunyau.

¹² Keruanila, Elia la datang. Anyautu jemau nidau keruan diau. Ughangtu mbuati diau sekenda'au ajau. Luak itu pulau Anak Manusiau ka dibuati ughangtu.”

¹³ Mangku anak-bua Yesus ngerti, bansau Diau ngiciakka Yuhanis Pembaptis.

Yesus meghadui budak keciak diau buidapan gilau bangkai

¹⁴ Yesus ngan anak-buaHau la ngulang guak jemau banyak, adau sughang datang nunduak nyemba Yesus,

¹⁵ kataunyau, “Pak, sialkala anakku. Diau buidapan gilau bangkai, la pansan nian. Diau rajin rubua temasuak di api ngan di ayiak.

¹⁶ Aku la mbata'i diau njenguak anak-bua Dighi, anyautu ughangtu nidau pacak meghadukanyau.”

¹⁷ Katau Yesus, “Ui, kamuni jemau nidau percayau lagi sesat. Lamau beghapau agi Aku mesti guak kamu? Lamau beghapau agi Aku mesti ngaligh ngan kamu? Batakla anak itu ke sini!”

¹⁸ Yesus mbentak diau, mangku rua ja'attu keluagh jak di diau. Masau itu pulau anak itu ghadu.

¹⁹ Udim itu anak-buaHau datang njenguak Yesus sughang ngan betanyau ngan Diau, “Tuapau sebapau kami nidau pacak melaratka iblis tadi?”

²⁰ Diau nimbali ughangtu, “Karnau kamu nidau percayau nian. Ingatkala, amun kamu adau iman sebesak ijat sawi ajau, kamu pacak ngajung gunung ini, ‘Ngaliala jak di sini ke situ.’ Cetau gunung ini ka ngalia. Nidau bediau setu diau nidau pacak kamu buat.

²¹ Anyautu iblis diau luak itu cuman pacak dilaratka karnau du'a ngan puasau.”

Yesus ngiciakka agi penanggunganNyau

²² Masau Yesus ngan anak-buaHau betunggal di Galilia, Diau ngiciak ngan ughangtu, katauNyau, “Anak Manusiau laka diseraka dalam tangan manusiau.

²³ Diau ka dibunua, mangku udim duau malam Diau ka idup agi.” Mangku anak-buaHau bingung nian.

Yesus mbayighi cuki Ghuma Allah

²⁴ Yesus ngan anak-buaHau la sampai di Kapernaum, mangku tukang tagia cuki Ghuma Allah datang njenguak Pitrus ngan betanyau, “Apu guru kaba ukan mbayighi cuki Ghuma Allah?”

²⁵ Diau nimbal, “Nyela!” Pitrus la baliak ke ghuma, Yesus betanyau, “Luak manau pendapat kaba? Sapau diau mbayighi cuki ngan rajau di deniau ini, apu anak-buahau, apu jemau lain?”

²⁶ Timbal Pitrus, “Jemau lain.” Mangku katau Yesus, “Amun luak itu, anak-buahau nidau mbayigh.

²⁷ Tapitu jangan kitau nyinggung jemau. Pegila mancing ke danau. Mangku ikan diau bulia dulu sekali, ambiakla, bukakla mulutau. Di mulutautu kaba ka bulia tanci batan endak mbayighi cuki kitau duau. Ambiakla tancitu ngan bayighla cuki kitau duau batan endak Ghuma Allah.”