MARKUS 9 - PEJANJIAN EMPAI CERITAU ILUAK

¹ Katau Yesus agi, “Keruanila, adau jak di kamu di sini diau nidau ka mati, amun lum nginak Allah merinta ngan kuasau.”

Yesus diagungka di gunung

² Enam aghi udim itu, Yesus mbata'i Pitrus, Yakubus ngan Yuhanis ndaki gunung diau tinggi. Di situ nidau bediau jemau lain. Di adapan ughangtu Yesus beghuba.

³ BajuAu njadi putia besinagh. Nidau bediau sughang kia di deniauni pacak nesa seputia luak itu.

⁴ Mangku kina'an ughang duau, diautu Musa ngan Elia. Ughang duautu ngiciak ngan Yesus.

⁵ Pitrus ngiciak ngan Yesus, kataunyau, “Pak Guru, lemak nian kitau di sini. Kami endak negakka tigau bua punduk, sebua batan endak Dighi, sebua batan endak Musa, sebua batan endak Elia.”

⁶ Diau ngiciak luak itu karnau nidau keruan setu diau mesti dikiciakka, karnau ughangtu takut kematila.

⁷ Mangku adau aban mbayangi ughangtu, mangku jak di dalam aban itu tedengagh suarau diau bekatau, “Inila AnakKu diau Kusayangi. Dengaghkala Diautu.”

⁸ Ughangtu gasip nginak di ngepungannyau, anyautu nidau kina'an sughang kiala lain jak di Yesus.

⁹ Masau ughangtu tughun jak di gunung tadi, Yesus ngiciak ngan ughangtu, “Jangan kamu kiciakka ngan sughang kiala setu diau kamu kinak tadi, amun Anak Manusiau lum ngulang idup agi.”

¹⁰ Ughangtu nurut kici'anNyautu, anyautu di antarau ughang tigau itu ughangtu mulai ngiciakka retiau ‘ngulang idup agi’.

¹¹ Mangku anak-buaHau betanyau ngan Diau, “Ngapau guru-guru ukum Taurat ngajaghka, bansau Elia mesti dulu datang?”

¹² Yesus nimbal, “Nyela, Elia datang mangku nyediauka gegalaunyau. Anyautu luak manau ngan ceritau diau ditulis di Injil ngiciakka Anak Manusiau ka banyak sengsarau ngan digelakka jemau?

¹³ Keruanila, Elia la datang. Anyautu jemau mbuati diau sekenda'au ajau, luak la ditulis ceritau diau.”

Yesus melaratka iblis jak di sughang budak keciak

¹⁴ Masau Yesus empat beghading la ngulang guak anak-bua lainau, ughangtu nginak jemau banyak di situ. Mangku adau bebeghapau guru ukum Taurat dang bebala ngan anak-buaHautu.

¹⁵ Jemau banyak nginak Yesus mangku kemangan. Ughangtu belaghi ndepatka Diau.

¹⁶ Mangku Yesus betanyau, “Tuapau diau dibalaka?”

¹⁷ Sughang jak di jemau banyak nimbal, “Pak Guru, aku mbatak anakku njenguak Dighi. Diau bisu, karnau diarung iblis.

¹⁸ Amun iblistu nyerang diau, diau dibantingka ke tana, mulutau bebuwia, gigiau tekancing ngan badanau keghas galau. Aku la mintak anak-bua Dighi melaratka iblis itu, anyautu ughangtu nidau pacak.”

¹⁹ Mangku Yesus bekatau ngan ughangtu, “Ui, kamu jemau diau nidau percayau nian. Lamau beghapau agi Aku mesti guak kamutu? Lamau beghapau agi Aku mesti ngaligh ngan kamutu? Batakla diautu ke sini!”

²⁰ Mangku ughangtu mbatak budak keciak itu njenguak Yesus. Satu iblis itu nginak Yesus, diau nyerang budak keciaktu. Mangku diau rubua ke tana, diguliak-guliakka mangku mulutau bebuwia.

²¹ Yesus betanyau ngan ba'au, “La lamau beghapau diau luak ini?” “Jak di keciak.” katau ba'au.

²² “La rajin iblistu endak mbunua diau ngan merubuaka diau di api ngan di ayiak. Amun Dighi pacak, tulungla nian kamini.”

²³ Timbal Yesus, “Tuapau kici'an kaba, amun pacak? Gegalaunyau pacak, amun percayau.”

²⁴ Bak itu tegauk, “Aku percayau. Tulungla aku diau nidau percayau.”

²⁵ Yesus nginak jemau banyak datang ngelilingi Diau, Diau ngajung iblistu kisit, katauNyau, “Ui kaba, iblis diau mbuat bisu ngan tuli, kisitla jak di budak keciak ini. Jangan ngarung diau agi!”

²⁶ Mangku iblistu ngeluagh sampai tegauk ngan nyerang budak keciaktu nian. Diautu kina'an luak jemau mati. Mangku banyak jemau bekatau, “Diau la mati.”

²⁷ Anyautu Yesus ngecakka tangan budak keciaktu nulung diau bangun. Mangku diau bangun.

²⁸ Yesus la di ghuma, anak-buaHau datang njenguak Yesus sughang ngan betanyau, “Tuapau sebapau kami nidau pacak melaratka iblis tadi?”

²⁹ Yesus nimbal, “Iblis diau luak itu nidau pacak dilaratka, amun ukan bedu'a.”

Yesus ngiciakka agi penanggunganNyau

³⁰ Yesus ngan anak-buaHau pegi jak di bada itu, mangku Diau lalu di Galilia. Diau enggup keruan ngan jemau, bansau Diau adau di situ,

³¹ karnau Diau dang ngajagh anak-buaHau. KatauNyau, “Anak Manusiau ka diseraka ngan manusiau. Diau ka dibunua, mangku udim duau malam Diau ka idup agi.”

³² Ughangtu nidau terti kici'anNyautu, anyautu nidau beghani nanyaukanyau.

Sapau diau lebia tinggi pangkatau

³³ Yesus ngan anak-buaHau sampai di Kapernaum. La sampai di ghuma, Yesus betanyau ngan anak-buaHautu, katauNyau, “Tuapau diau kamu kiciakka di jalan tadi?”

³⁴ Anak-buaHautu diam ajau, karnau ughangtu la bebala di jalan, mbalaka sapau diau lebia tinggi pangkatau.

³⁵ Mangku Yesus duduak, dipantauNyau duau belas anak-buaHautu, katauNyau, “Jemau diau endak dulu sekali, diau mesti endak njadi kendian jak di gegalaunyau ngan njadi babu gegalau jemau.”

³⁶ Udim itu Yesus ngambiak sughang budak keciak, diajungAu betegak di adapan gegalau ughangtu, dipelu'Au budak keciaktu, katauNyau,

³⁷ “Jemau diau nerimau sughang budak keciak luak diauni karnau Aku, semegi ajau ngan nerimau Aku. Mangku jemau diau nerimau Akuni, ukan nerimau Aku ajau, tapitu nyambut pulau diau ngajung Aku.”

Jemau diau nidau melawan diautu kawan

³⁸ Katau Yuhanis, “Guru, kami nginak sughang diau ukan anak-bua Dighi ngisitka iblis pakai namau Dighi. Kami nidau ngajung diau, karnau diau ukan jak di kitau.”

³⁹ Yesus bekatau, “Jangan negahi diau, karnau nidau sughang kiala diau mbuat tandau nyelia pakai namauKu pacak ngarutka Aku.

⁴⁰ Jemau diau nidau melawan kitau mihak ngan kitau.

⁴¹ Keruanila, jemau diau ngenjuak minum ayiak semangkuak ngan kamu, karnau kamu jemau Keristen, jemautu cengki ka nerimau upahau.”

Setu diau mbuat jemau bedusau

⁴² “Jemau diau nyesatka sala sughang jak di budak keciak diau percayau ini, iluakla amun batu besak dikebat di liaghau mangku dicapakka ke laut.

⁴³ Amun tangan kaba mbuat kaba bedusau, tetakla tangan kabatu. Iluakla kaba idup ngan Allah ngan tangan sebela, sangkan masuak nerakau ngan duau bela tangan, di api diau nidau ka padam-padam. [

⁴⁴ Di situ ulat nidau ka mati, api nidau ka padam.]

⁴⁵ Amun keting kaba mbuat kaba bedusau, tetakla keting kabatu. Iluakla kaba idup ngan Allah ngan keting sebela, sangkan masuak nerakau ngan keting duau. [

⁴⁶ Di situ ulat nidau ka mati, api nidau ka padam.]

⁴⁷ Mangku amun matau kaba mbuat kaba bedusau, cungkilla matau kabatu. Iluakla kaba di sergau ngan matau sebela, sangkan dicapakka ke nerakau ngan matau duau.

⁴⁸ Di situ ulat diau makan buntang nidau ka mati, api nidau ka padam.

⁴⁹ Bilang jemau ka diberesiaka ngan api, luak kerban diberesiaka ngan gagham.

⁵⁰ Gaghamtu iluak. Anyautu amun gagham nidau masin agi, apu pacak dimasinka? Kamu mesti njadi luak gagham. Idupla bedamai ngan gegalau jemau.”