MARKUS 8 - PEJANJIAN EMPAI CERITAU ILUAK

Yesus ngenju'i makan empat ribu ughang

¹ Masau itu adau pulau jemau banyak nianan. Ughangtu nidau bediau makanan, mangku Yesus mantau anak-buaHau ngan bekatau,

² “Aku sial nginak jemau banyak ini. La tigau aghi ughangtu ngikut Aku, mbak kini nidau bediau makanan.

³ Amun ughangtu la keliwatan lapagh kuajung baliak, ughangtu tebandam di jalan, apau agi adau diau datang jak di jawua.”

⁴ Anak-buaHau bekatau, “Luak manau di bada diau sudut ini jemau pacak dapat makanan cukup batan endak jemau banyak luak ini?”

⁵ Yesus betanyau, “Beghapau ruti adau di kamu?” “Tujua,” timbal ughangtu.

⁶ Mangku Yesus ngajung jemau banyaktu duduak di tana. Udim itu Diau ngambiak tujua rutitu, beterimau-kasia ngan Allah, dipiyak-piya'Au rutitu, dienjuakkaNyau ngan anak-buaHau, mangku anak-buaHautu ngagiakanyau ngan jemau banyak.

⁷ Ughangtu adau pulau bebeghapau ikan keciak. Yesus beterimau-kasia, mangku ngajung anak-buaHau ngagiaka ikantu pulau.

⁸ Gegalau ughangtu makan enggut kenyang. Mangku tigha ruti ditunggalka, tujua kinjagh banya'au.

⁹ Ughangtu kekirau empat ribu ughang. Mangku Yesus ngajung jemau banyaktu baliak.

¹⁰ Diau ngan anak-buaHau nayiak perawu pegi ke daira Dalmanuta.

Jemau Parisi mintak Yesus mbuat tandau nyelia

¹¹ Adau bebeghapau jemau Parisi datang sangi tanyaui ngan Yesus. Ughangtu endak ncubaui Diau mangku mintak Diau mbuat tandau nyelia batan endak mbuktika, bansau Diau datang jak di Allah.

¹² Yesus nyintak nyawau panjang mangku bekatau, “Ngapau jemau mbak kini mintak Aku mbuat tandau nyelia. Keruanila, sutiak kiala Aku enggup nunjuakka tandau nyelia ngan ughangtu.”

¹³ Mangku Yesus ninggalka ughangtu. Diau nayiak perawu pegi ke sebeghang.

Ceritau ghagi jemau Parisi ngan Herudis

¹⁴ Anak-bua Yesus kelingauan mbatak ruti. Ughangtu cuman adau sebua ruti di perawu.

¹⁵ Yesus bekatau ngan ughangtu, “Sepepadaula nian ngan ghagi jemau Parisi ngan ghagi Herudis.”

¹⁶ Mangku ughangtu mulai ngiciakka titu, kataunyau, “Diau ngiciak luak itu, karnau kitau nidau bediau ruti.”

¹⁷ Yesus keruan setu diau ughangtu kiciakka, Diau bekatau, “Ngapau kamu ngiciakka nidau bediau ruti? Apu kamu nidau keruan ngan lum terti? Ngapau kamu segau nian ngerti?

¹⁸ Kamu adau matau, ngapau nidau nginak? Kamu adau telingau, ngapau kamu nidau ndengagh? Apu kamu nidau teghingat,

¹⁹ masau Aku miyak-miya'i limau ruti batan endak limau ribu ughang, beghapau kinjagh tigha ruti diau kamu tunggalka?” “Duau belas,” katau ughangtu.

²⁰ Yesus betanyau agi, “Luak manau pulau ngan tujua ruti batan endak empat ribu ughangtu, beghapau kinjagh tigha kamu tunggalka?” “Tujua,” katau ughangtu.

²¹ Katau Yesus, “Lum kila kamu terti?”

Yesus meghadui jemau butau

²² La udim itu Yesus ngan anak-buaHau sampai di Betsaida. Di situ adau jemau mbatak sughang jemau butau njenguak Yesus, mangku mintak Diau nepiakka tanganAu di mataunyau.

²³ Yesus ngecakka tangan jemau butautu ngan mapahau keluagh dusun. Mangku Diau meludai matau jemautu, ditepiakkaNyau tanganAu di mataunyau ngan betanyau, “Tuapau diau la pacak kaba kina'i?”

²⁴ Jemautu nginak ke adapan, kataunyau, “Aku la nginak jemau bejalan, anyautu masia luak batang kayu bejalan.”

²⁵ Yesus ngulang nepiakka tanganAu di mataunyau. Udim itu jemautu nginakka mataunyau, mangku adau pengina'an. Diau la isat nginak gegalaunyau.

²⁶ La udim itu Yesus ngajung jemautu, “Baliakla ke ghuma kaba! Jangan kudai masuak ke dusun ini!”

Pitrus ngiciakka sapau Yesus

²⁷ La udim itu Yesus ngan anak-buaHau pegi ke dusun-dusun di ngepungan Kaisaria Pilipi. Ughangtu dang bejalan, Yesus betanyau ngan anak-buaHau, katauNyau, “Katau jemau, sapau Akuni?”

²⁸ Katau anak-buaHau, “Adau jemau ngiciakka Yuhanis Pembaptis. Adau diau ngiciakka Elia. Adau pulau diau ngiciakka sughang jak di nabi.”

²⁹ Yesus betanyau agi ngan anak-buaHau, “Anyautu pendapat kamu, sapau Akuni?” Katau Pitrus, “Dighila Almasih, Rajau Penyelamat.”

³⁰ Mangku Yesus negahi anak-buaHautu nian, katauNyau, “Jangan ngiciakka ngan sughang kiala, sapau Akuni!”

Yesus ngiciakka penanggunganNyau

³¹ La udim itu Yesus mulai ngajaghi anak-buaHau, bansau Anak Manusiau mesti meghasauka banyak penanggungan ngan nidau pulau diterimau tuau-tuau, imam-imam bepangkat tinggi ngan guru-guru ukum Taurat, mangku dibunua. La udim duau malam Diau ka ngulang idup agi.

³² Yesus ngiciakka titu ngan sebenaghau. Mangku Pitrus mbata'i Yesus ke peridingannyau, ngan nengul Diau.

³³ Anyautu Yesus njelinga'i ngan ngina'i anak-buaHau, dimaraiNyau Pitrus, katauNyau, “Laratla iblis! Rupu'an kabatu rupu'an manusiau, ukan rupu'an Allah!”

Sarat ngikut Yesus

³⁴ La udim itu Yesus mantau jemau banyak ngan anak-buaHau, mangku bekatau, “Bilang jemau diau endak ngikut Aku, jangan ndalak jalan idup batan endak diau sughang, anyautu diau mesti mikul salipau, mangku ngikut Aku.

³⁵ Karnau jemau diau endak ngilakka nyawaunyau ka kelengitan nyawaunyau. Anyautu jemau diau kelengitan nyawaunyau karnau Aku ngan ceritau Injil, diautu ka idup nian.

³⁶ Tuapau untungau, amun sughang ngempu gegalau deniau njadi retaunyau, anyautu nyawaunyau benasau?

³⁷ Tuapau diau pacak dienjuakka batan endak nggenti nyawaunyau? Nidau ka bediau!

³⁸ Kinak luak itu, amun jemau maluan ngaku'i Aku ngan kici'anKu di pugan jemau idup mbak kini diau nidau ta'at ngan bedusau, Anak Manusiau pulau ka maluan ngaku'i jemautu, masau Diau datang nanti ngan kuasau Bapa'Au dikantini malaikat-malaikat suci.”