MARKUS 5 - PEJANJIAN EMPAI CERITAU ILUAK

Yesus ngisitka iblis jak di sughang jemau Gerasa

¹ Mangku Yesus ngan anak-buaHau sampai di beghang danau Galilia, di daira jemau Gerasa.

² Yesus empai tughun jak di perawu, Diau didatangi sughang jemau lanang diau diarung iblis. Jemautu ngeluagh jak di perantuan.

³ Diautu mendam di situ. Nidau bediau jemau diau pacak ngebatau, empuak ngan rantai nidau.

⁴ La rajin tangan ngan ketingau dibeluk ngan dikebat ngan rantai, anyautu rantaitu diputuska ngan beluk dirusakkanyau, mangku nidau bediau jemau diau pacak na'anau.

⁵ Siang-malam diau bejalan di perantuan ngan di bukit sampai tegauk-gauk ngan mbaduki badanau ngan batu.

⁶ Satu nginak Yesus jak di jawua, diau belaghi njenguak Yesus, nunduak nyemba Diau,

⁷ mangku tegauk ngan suarau bias, “Ka Dighi apauka akuni, ui Yesus, Anak Allah diau Mahaagung? Demi Allah aku mintak, jangan Dighi nyaraui aku.”

⁸ Diau ngiciak luak itu, karnau Yesus la ngiciak ngan diau, “Ui, iblis, keluaghla jak di jemau ini!”

⁹ Yesus betanyau ngan diau, “Sapau namau kaba?” Timbalau, “Namauku Legiun, karnau kamini banyak.”

¹⁰ Mangku diau mintak nian ngan Yesus, supayau jangan dikisitka jak di daira itu.

¹¹ Pasigh itu banyak kaput ingunan dang ndalak makanan di bukit.

¹² Iblis itu mintak ngan Yesus, kataunyau, “Ajungla kami ngarung kaput itu.”

¹³ Yesus tetuju, mangku iblistu ngeluagh jak di jemau tadi ngarung kaput. Kaputtu belaghi galau tumban jak di tepi badas masuak ke danau mangku mati tebenak. Gegalau kaputtu kekirau duau ribu ikuak.

¹⁴ Tukang-tukang sayia kaput itu belaghi nyiarka ceritau itu di kuta ngan di dusun di ngepungannyau. Mangku jemau ngeluagh endak ngina'au ceritau itu.

¹⁵ Ughangtu datang njenguak Yesus mangku nginak jemau diau diarung iblis tadi dang duduak guak Yesus. Jemautu la bekain ngan rupu'annyau la waras, mangku ughangtu takut.

¹⁶ Ughang diau la nginak ceritau tadi ngiciakkanyau ngan ughangtu ceritau jemau diau diarung iblistu ngan ceritau kaput.

¹⁷ Mangku ughangtu mintak nian, supayau Yesus pegi jak di daira itu.

¹⁸ Yesus dang nayiak agi ke perawu, jemau diau diarung iblis tadi mintak, supayau diau bulia ngikut.

¹⁹ Anyautu Yesus nidau ngajung, katauNyau, “Baliakla ke dusun kaba, ceritaukala ngan adiak-sanak setu diau la dikerjauka Allah di kaba ngan gegalau keilu'anNyau.”

²⁰ Jemautu pegi ngiciakka di daira sepulua kuta gegalaunyau diau la dikerjauka Yesus di diau mangku gegalau jemau kemangan galau.

Anak Yairus ngulang idup ngan jemau tinau buidapan bedagha dighadui

²¹ Yesus la baliak agi ke sebeghang, jemau berumbung-rumbungan datang ngumbuliNyau. Yesus dang adau di tepi danau itu.

²² Mangku adau sughang kepalak ghuma sembayang, namaunyau Yairus. Diau datang ke situ. Satu nginak Yesus, diau nunduak sampai ke tana di adapanNyau,

²³ mangku mintak tulung nian, kataunyau, “Anakku buidapan, la pansan nian! Mela pegi ke ghuma kami kudai! Tepiakkala tangan Dighi di badan anakku, mangku diau ghadu, lum ka mati.”

²⁴ Mangku Yesus pegi ngan jemautu. Jemau rami-rami pegi ngikut Diau, sampai bererincitan di kidau kananAu.

²⁵ Adau pulau sughang tinau diau buidapan bedagha, la duau belas taun lamaunyau.

²⁶ Diau la rajin beubat ngan duktur, mangku gegalau retaunyau la abis galau. Anyautu nidau bediau diau pacak meghaduinyau, lagi tamba pansan idapannyau.

²⁷ Tinau itu la banyak ndengagh ceritau Yesus. Mangku di pugan jemau banyaktu diau masighi Yesus jak di belakang mbibit bajuAu.

²⁸ Diau berupuak, “Amun aku mbibit cuman bajuAu ajau, aku ka ghadu.”

²⁹ Masau itu pulau daghahau mandak melilia, mangku diau teghasau, bansau diau la ghadu.

³⁰ Masau itu pulau Yesus teghasau, bansau adau kuasau ngeluagh jak di Diau, mangku Diau nulia ke jemau banyak itu ngan betanyau, katauNyau, “Sapau mbibit bajuKu?”

³¹ Anak-buaHau bekatau, “Dighi la nginak jemau banyak ngincitka Dighi. Mangku Dighi masia betanyau, ‘Sapau mbibit Aku?’ ”

³² Yesus nginak di ngepungannyau endak ngeruani jemau diau mbibit Diau.

³³ Tinau tadi keruan setu diau la tejadi di diau, mangku diau gemetagh ketakutan, mangku nunduak di adapan Yesus, diceritaukanyau gegalaunyautu.

³⁴ Mangku katau Yesus ngan diau, “Kaba la dighadui, karnau kaba percayau. Baliakla ngan selamat. Idapan kaba la ghadu.”

³⁵ Yesus gi ngiciak, mangku adau jemau datang jak di ghuma Yairus, kataunyau, “Anak dighi la mati! Nidau nanti ngeriaka Pak Guru agi.”

³⁶ Yesus nidau nyanauka kici'an jemau itu, mangku ngiciak ngan Yairus, katauNyau, “Jangan takut! Percayaula ajau!”

³⁷ Yesus nidau ngajung sughang kia ngikut Diau, cuman Pitrus, Yakubus ngan adingau Yuhanis bulia ngikut.

³⁸ La sampai di ghuma Yairus, Yesus nginak jemau ganau nangis berandaian ngan suarau bias.

³⁹ Mangku Yesus masuak ngan bekatau, “Ngapau kamu ganau? Ngapau nangis? Budak keciak ini nidau mati! Diauni tiduak ajau!”

⁴⁰ Ughangtu nawauka Diau, mangku dilaratkaNyau galau ughangtu. La udim itu dibata'Au bak ngan mak budak keciaktu ngan anak-buaHau tadi masuak ke bili'au,

⁴¹ mangku dikecakkaNyau tanganau, katauNyau, “Talita kum!” Retiau, “Ui, anakKu, Aku ngajung kaba bangun. Bangunla!”

⁴² Masau itu pulau budak gadistu bangun betegak ngan bejalan. Umurau la duau belas taun. Jemau diau ngina'autu tegagau ngan kemangan galau.

⁴³ Yesus nidau ngajung nian sughang kia ngiciakka ngan jemau setu diau dibuatAutu, mangku bekatau, “Enju'ila budak gadis ini makan!”