MARKUS 4 - PEJANJIAN EMPAI CERITAU ILUAK

Cuntau ceritau jemau tani ngamburka benia

¹ Adau saghi Yesus mulai agi ngajagh di tepi danau Galilia. Banyak kematila jemau datang rami-rami guak Diau. Mangku Diau nayiak perawu diau mendam di tenga ayiak, mangku duduak di situ. Jemau banyaktu adau di daghat di tepi danautu.

² Yesus ngajaghka banyak ceritau ngan jemau banyaktu pakai umpamau. Luak inila Diau ngajaghi jemau, katauNyau,

³ “Dengaghkala! Adau jemau tani endak pegi ngamburka benia.

⁴ Dang diamburka, adau diau tumban di jalan. Mangku datang burung makani benia diau tumban di jalantu enggut abis.

⁵ Adau pulau diau tumban di tana bebatu-batu diau nidau banyak tanahau. Mangku beniatu gasip mekul, karnau tanahautu nipis.

⁶ Anyautu matau-aghi la tinggi, layula diau mangku mati, karnau akaghau nidau masuak dalam tana.

⁷ Adau pulau diau tumban di pugan ghumput bedughi. Diau tumbua serempak ngan ghumputtu, mangku diincitka enggut mati. Nidau lasung buasil.

⁸ Mangku separau tumban di tana diau iluak. Beniatu mekul, njadi besak mangku bebua. Asilau setangkai adau diau tigau pulua mughak, adau diau enam pulua, adau pulau diau seratus mughak.”

⁹ Mangku katauNyau, “Sapau diau betelingau endak ndengagh, ndengaghla!”

Sebapau Yesus makai cuntau ceritau

¹⁰ Yesus gi sughang, mangku pengikutAu ngan duau belas anak-buaHau datang nanyauka, tuapau retiau ceritau tadi.

¹¹ Katau Yesus, “Ngan kamu la dinyatauka resiau ngeruani Allah njadi rajau. Anyautu ngan jemau lain gegalaunyautu dikiciakka ngan cuntau ceritau,

¹² mangku ‘Ughangtu nginak tapitu nidau kina'an. Ughangtu ndengagh tapitu nidau terti, supayau ughangtu jangan ngubai jak di dusaunyau, mangku nidau diabiska dusaunyau.’ ”

Retiau ceritau tadi

¹³ La udim itu Yesus ngiciak ngan ughangtu, katauNyau agi, “Ngapau kamu nidau terti ceritau itu tadi? Amun luak itu, luak manau kamu pacak ngeruani gegalau ceritau diau lainau?

¹⁴ Jemau diau ngamburka benia tadi umpamau jemau diau ngiciakka ceritau Allah.

¹⁵ Benia diau tumban di jalan umpamau jemau diau ndengaghka ceritau tadi, mangku datang iblis ngambiak ceritau Allah diau empai dikiciakka ngan jemautu.

¹⁶ Benia diau tumban di tana bebatu-batu tadi umpamau jemau diau ndengaghka ceritau Allah, mangku nerimaunyau ngan riang.

¹⁷ Anyautu karnau ceritautu nidau tetanam dalam ati jemautu, diau nidau ta'an lamau. Amun dapat penanggungan ngan diluatka jemau karnau ceritau Allah tadi, jemautu gasip ngelipat.

¹⁸ Benia diau tumban di pugan ghumput bedughi tadi umpamau jemau diau ndengaghka ceritau Allah,

¹⁹ anyautu diau ghegak, kalu nidau dapat pengidupan, tetipu endak idup kayau ngan beribu peku serilau diau adau dalam ati jemau itu. Gegalaunyautu ngincitka ceritau Allah tadi, mangku nidau buasil.

²⁰ Mangku benia diau tumban di tana iluak tadi umpamau jemau diau ndengaghka ceritau Allah ngan nerimaunyau, mangku bebua banyak. Asilau adau diau tigau pulua, adau diau enam pulua, adau pulau diau seratus.”

Cuntau ceritau lampu

²¹ Mangku Yesus bekatau agi ngan ughangtu, “Apu adau jemau diau maghakka lampu, mangku ditukupinyau ngan capa, apu ditepiakka di bawa katil? Cengki nidau! Lamputu ditepiakkanyau di bada lampu.

²² Gegalaunyau diau tebuni ka kina'an ngan gegalau resiau ka dikeruani.

²³ Sapau diau betelingau endak ndengagh, ndengaghla!”

²⁴ Mangku Diau ngiciak agi, “Ingatkala setu diau kamu dengagh. Takaran diau kamu pakai ngan jemau ka dipakai pulau batan endak kamu, lagi ka ditamba ngan kamu.

²⁵ Karnau jemau diau buadau ka dienju'i, anyautu jemau diau nidau bediau, dikit diau adau di diau, ka diambiak pulau jak di diau.”

Cuntau ceritau benia diau tumbua

²⁶ Katau Yesus agi, “Amun Allah merinta, keadaannyau luak ini: Adau jemau diau ngamburka benia di umaunyau.

²⁷ Aghi malam diau tiduak, aghi siang diau bangun. Penarau itu benia tadi tumbua ngan njadi besak. Anyautu luak manau beniatu tumbua, jemau tadi nidau keruan.

²⁸ Tana itula diau mbuat beniatu tumbua, empai penembai tangkaiau, mangku putiak mangku buahau.

²⁹ Amun bua paditu la masak, jemautu ngetam, karnau la masaunyau.”

Cuntau ceritau mulan jawi

³⁰ KatauNyau agi, “Amun Allah merinta, ngan tuapau kitau pacak nyamaukanyau? Apu ngan ceritau manau kitau pacak ngiciakkanyau?

³¹ Amun Allah merinta, keadaannyau luak ini: Semughak jawi ditanam di kebun. Mughaktu keciak nian jak di gegalau mughak diau adau di deniauni.

³² Anyautu amun diau la ditanam, diau tumbua, besakla diau sangkan kayu lainau. Cangkahau rimbun, mangku burung pacak besaghang di cangkahautu.”

³³ Ngan banyak ceritau luak itu Diau ngiciakka katau Allah ngan ughangtu, inggan manau ughangtu pacak ngerti.

³⁴ Diau maju ngiciak makai cuntau, amun ngajagh jemau. Anyautu amun ngan anak-buaHau, Diau nerangka gegalaunyautu ngan ughangtu.

Angin nyaghu dighedamka

³⁵ Aghi la petang, mangku Yesus ngiciak ngan anak-buaHau, “Mela kitau nyembeghang ke beghang sanau.”

³⁶ Mangku anak-buaHautu masuak perawu. Yesus la adau di perawutu. La udim itu jemau banyak ditinggalkaNyau di tepi danau. Adau pulau perawu lain pegi serempak ngan Diau.

³⁷ Lum lamau udim itu adau angin nyaghu. Umbak besak kematila nempua perawutu, mangku ayiak masuak menui perawu tadi.

³⁸ Di buntut perawu Yesus dang tiduak bebantal. Anak-buaHau ngucakka Diau. “Guru!” kataunyau, “Apu Dighi nidau keruan, bansau kitauni laka mati tebenak?”

³⁹ Yesus bangun, mangku merintaka angintu, katauNyau ngan danau, “Redamla!” Mangku angintu mandak ngan danau diam nian.

⁴⁰ La udim itu Yesus bekatau ngan anak-buaHau, “Ngapau kamu penakut? Ngapau nidau percayau ngan Aku?”

⁴¹ Mangku anak-buaHautu takut lagi kemangan. Sughang ngiciak ngan diau lain, kataunyau, “Sapau sebenaghau Jemau ini? Sangkan angin ngan umbak na'ati perintaHau.”