MARKUS 2 - PEJANJIAN EMPAI CERITAU ILUAK

Jemau lumpua dighaduka

¹ La udim bebeghapau aghi Yesus ngulang ke Kapernaum, mangku tesiar ceritau, bansau Diau dang di ghuma.

² Mangku banyak jemau datang begumbul, enggut nidau bediau agi bada. Di mukau duaghau penua pulau ngan jemau. Mangku Yesus ngiciakka katau Allah ngan ughangtu.

³ Diau dang ngiciak, adau jemau datang mbatak sughang jemau lumpua, dijagang ughang empat.

⁴ Anyautu ughangtu nidau pacak lalu njenguak Yesus, karnau jemau banyak di situ. Mangku ughangtu mbukak atap di tipatanNyau. La dibukakka ataptu, ditughunka bada tidu'au.

⁵ Satu nginak ughangtu percayau nian ngan Diau, Yesus bekatau, “Ui, kantinKu, dusau kaba la diabiska.”

⁶ Anyautu adau pulau guru ukum Taurat duduak di situ ngan bekatau dalam ati,

⁷ “Beghani nian jemau ini ngiciak luak itu. Diau nggelakka Allah. Nidau bediau diau pacak ngabiska dusau, lain jak di Allah.”

⁸ Masau itu pulau Yesus ngeruani rupu'an ughangtu, mangku Diau bekatau, “Ngapau kapu dighi berupuak luak itu?

⁹ Manau diau mura, ngiciakka, ‘Dusau kaba la diabiska’, apu ngiciakka, ‘Bangunla kaba, katangka bada tiduak kaba ngan bejalanla’?

¹⁰ Anyautu Akuni ka ngajung jemau ini bangun, mangku kapu dighi keruan, bansau Anak Manusiau bekuasau ngabisi dusau di deniauni.” Mangku Yesus ngiciak ngan jemau lumpua tadi,

¹¹ “Bangunla kaba, katangkala bada tiduak kaba, mangku baliakla ke ghuma kaba!”

¹² Masau itula pulau jemautu bangun, ngatangka bada tidu'au mangku ngeluagh, dikina'i gegalau ughangtu. Gegalau jemautu kemangan galau, mangku ngunjungka Allah, kataunyau, “Lum kekela kitau nginak setu luak itu!”

Liwi ngikut Yesus

¹³ La udim itu Yesus pegi agi ke tepi laut Galilia. Gegalau jemau banyak datang nunggal ngan Diau, mangku Diau ngajagh jemau banyaktu.

¹⁴ La udim itu Yesus bejalan agi, mangku nginak sughang tukang tagia cuki, namaunyau Liwi, anak Alpius. Diau dang duduak di kantur cuki. “Mela, ngikut Aku!” katau Yesus. Liwi betegak, mangku ngikut Diau.

¹⁵ Mangku Yesus makan di ghumahau. Banyak nian kantinau tukang tagia cuki ngan jemau bedusau lainau ngikut makan serempak ngan Diau ngan anak-buaHau, karnau banyak jemau ngikut Diau.

¹⁶ Bebeghapau guru agamau ngan jemau Parisi nginak Yesus makan ngan tukang tagia cuki ngan jemau bedusau lainautu, mangku ughangtu betanyau ngan anak-buaHau, “Ngapau Diau makan ngan penagia cuki ngan jemau bedusautu?”

¹⁷ Yesus ndengagh tanyauan ughangtu mangku nimbal, “Jemau diau sihat nidau endak duktur, jemau diau buidapan ajau. Aku datang ukan endak mantau jemau diau benagh, tapitu jemau diau bedusau.”

Ngapau anak-bua Yesus nidau puasau?

¹⁸ Adau saghi masau anak-bua Yuhanis ngan jemau Parisi dang puasau, mangku adau jemau diau njenguak Yesus ngan betanyau, “Ngapau anak-bua Yuhanis ngan anak-bua jemau Parisi puasau, anyautu anak-bua Kaba nidau?”

¹⁹ Yesus nimbal, “Apu di jamuan nika menda pacak diajung puasau, selamau pengantinan gi adau? Amun pengantinan gi adau jeghuman nidau pacak puasau.

²⁰ Anyautu masaunyau ka sampai, pengantinantu ka diambiak jak di ughangtu. Masau itula ughangtu ka puasau.

²¹ Nidau bediau jemau diau ngambiak batan penampit jak di kain empai diau lum ngerutut endak nampiti baju diau bughuak, karnau amun luak itu, kain penampittu ka ncebaghkanyau. Diau empai ncebaghka diau la bughuak, tamba besak cebaghau.

²² Luak itu pulau nidau bediau sughang kia ngisika ayiak anggur diau empai ke dalam kantung bawak diau lamau, karnau ayiak anggur diau empaitu ka mecaka kantungtu, mangku anggurau tebuang ngan kantungtu rusak. Ayiak anggur diau empai mesti dimasuakka ke dalam kantung diau empai pulau.”

Anak-bua Yesus ngambiak padi masau aghi Sabat

²³ Adau saghi aghi Sabat Yesus lalu di umau. Diau dang bejalan anak-buaHau ngambiak padi dikit.

²⁴ Mangku adau jemau Parisi diau ngiciak, kataunyau, “Ngapau anak-bua Kaba ngerjauka setu diau nidau bulia dikerjauka aghi Sabat?”

²⁵ Mangku Yesus nimbal, katauNyau “Cengki kapu dighi la mbacau setu diau dikerjauka Daud, masau diau ngan anak-buahau lapagh ngan nidau bediau makanan.

²⁶ Diautu masuak Ghuma Allah, masau Abyatar njadi Imam Besak, mangku diau makan ruti diau dienjuakka ngan Allah, dienjuakkanyau ngan anak-buahau pulau, awuak ruti itu nidau bulia dimakan, amun ukan imam.”

²⁷ Mangku Yesus ngiciak agi, “Aghi Sabat diadauka batan endak manusiau, ukan manusiau batan endak aghi Sabat.

²⁸ Karnau itu Anak Manusiau nguasaui aghi Sabat pulau.”