MARKUS 16 - PEJANJIAN EMPAI CERITAU ILUAK

Yesus ngulang idup agi

¹ La udim aghi Sabat, Maria Magdalina ngan Maria, mak Yakubus, ngan Salumi pegi mbeli rerempahan ghum endak pegi ke kuburan minya'i mayat Yesus.

² Mangku akap aghi petamau minggu itu, satu matau-aghi empai tumbua, ughangtu pegi ke kuburan.

³ Di tenga jalan ughangtu ngiciak sughang ngan diau lain, “Sapau diau ka nulungi kitau ngguliakka batutu jak di tebuak kuburan?”

⁴ Anyautu la di guak kuburantu, tekinak batu diau besak nianan la teguliak.

⁵ Mangku tinautu masuak dalam kuburan, mangku tekinak sughang jemau mudau diau pakai baju lambing putia duduak di sebela kanan. Mangku tinautu tegagau nian.

⁶ Anyautu jemau mudau itu ngiciak ngan ughangtu, “Jangan takut,” kataunyau, “Kamuni ndala'i Yesus, jemau Nasarit, diau dipakuka di kayu saliptu. Diau nidau bediau agi di sini, la ngulang idup. Kina'ila, inila bada Diau ditepiakka!

⁷ Mbak kini pegila, kiciakkala ceritau ini ngan anak-buaHau temasuak Pitrus. Kiciakka Diau pegi ndului kamu ke Galilia. Di situ kamu ka nginak Diau, luak diau la dikiciakka ngan kamu.”

⁸ Mangku ughangtu ngeluagh jak di kuburantu, belaghi jak di situ karnau tegagau ngan takut. Ughangtu nidau ngiciakka tuapau-apau ngan sapau kila karnau takut. [Tinau itu ngiciakka gegalaunyau diau dikiciakka malaikat tadi ngan Pitrus ngan kantin-kantinau. Udim itu Yesus makai anak-buaHau endak ngiciakka ceritau diau suci ngan nidau pacak dimandakka, ceritau keselamatan selelamaunyau, dikiciakkanyau jak di sebela matau-aghi idup ke sebela matau-aghi tumban.] [

Anak-bua Yesus nidau endak percayau

⁹ La udim Yesus ngulang idup jak di mati, gi akap aghi Minggu itu, dulu sekali Diau ngancakka diriAu ngan Maria Magdalina. Jak di diautu Yesus la ngisitka tujua iblis.

¹⁰ Mangku tinautu pegi ngiciakka ceritau itu ngan anak-bua Yesus diau dang kebingungan ngan nangis.

¹¹ Ughangtu ndengagh ceritau, bansau Yesus idup ngan la betemu ngan Maria, anyautu ughangtu nidau percayau.

¹² Udim itu Diau ngancakka diriAu ngan duau ughang jak di anak-buaHau ngan carau diau lain, masau ughang duautu dang bejalan ke luagh kuta.

¹³ Ughangtu ngelipat ngiciakka ceritautu ngan kantin-kantin diau lain, anyautu ughangtu nidau pulau percayau.

Yesus ngancakka diriAu ngan anak-buaHau

¹⁴ Udim-udimau Yesus ngancakka diriAu ngan sebelas anak-buaHau, masau ughangtu dang makan. Diau nengul ughangtu, karnau ughangtu nidau percayau nian ngan nidau endak ndengagh kici'an jemau, karnau ughangtu nidau endak percayau ngan jemau diau la betemu ngan Diau, la udim Diau ngulang idup agi.

¹⁵ Mangku Diau bekatau ngan ughangtu, “Pegila ke gegalau deniau, kiciakkala ceritau iluak ngan gegalau isi deniau.

¹⁶ Jemau diau percayau ngan dibaptis ka selamat. Anyautu jemau diau nidau percayau ka diukum.

¹⁷ Jemau diau percayau ka mbuat tandau nyelia. Ughangtu ka ngisitka iblis ngan kuasauKu. Ughangtu ka ngiciak ngan basau diau nidau keruan ngan ughangtu.

¹⁸ Empuak ughangtu ngecakka ulagh ngan minum racun, ughangtu nidau ka celakau. Ughangtu ka nepiakka tanganau di jemau buidapan, mangku jemautu ka ghadu.”

Yesus tuangkat ke sergau

¹⁹ La udim Tuhan Yesus ngiciak ngan ughangtu, Diau tuangkat ke sergau. Di situ Diau duduak di sebela kanan Allah.

²⁰ Mangku anak-buaHautu pegi ngiciakka ceritau iluaktu ke manau-manau. Mangku Tuhan ngenjuakka kuasau ngan ughangtu ngerjauka titu. Ngan tandau nyelia Diau mbuktika, bansau setu diau dikiciakka ughangtu benagh.]