MARKUS 15 - PEJANJIAN EMPAI CERITAU ILUAK

Yesus di adapan Pilatus

¹ Paghak siang imam-imam bepangkat tinggi, tuau-tuau, guru-guru ukum Taurat ngan gegalau pengadilan agamau buijau ngambiak kesimpulannyau. Yesus dighimpus, dibatak mangku diserakanyau ngan Pilatus.

² Pilatus nanyaui Yesus, katauNyau, “Kaba nian rajau jemau Yahudi?” Timbal Yesus, “Au, luak kici'an diau la dighi kiciakkatu.”

³ Mangku imam-imam itu banyak mburuakka Yesus.

⁴ La udim itu Pilatus betanyau pulau, kataunyau, “Nidau Kaba ka nimbal? Kaba la ndengagh, alaka banyak buru'an ughangtu ngan Kaba.”

⁵ Anyautu Yesus nidau nimbal dikit kiala. Mangku Pilatus kemangan.

Yesus diukum mati

⁶ Idang taun masau aghi rerayau itu biasaunyau sughang kawalan dibibaska nurut pinta'an jemau banyak.

⁷ Masau itu adau sughang kawalan diau benamau Barabas. Diautu dijilka serempak ngan bebeghapau jemau diau melawan pemerinta. Ughangtu la mbunua jemau.

⁸ Mangku jemau banyak datang mintak, supayau sughang kawalan dibibaska luak biasaunyau.

⁹ Pilatus betanyau ngan jemau banyak, “Apu kamu tetuju, aku mbibaska rajau jemau Yahudi batan endak kamu?”

¹⁰ Diau la keruan nian, bansau Yesus diseraka, karnau imam-imam bepangkat tinggi sengit.

¹¹ Anyautu imam tadi ngasung jemau banyak, mangku ughangtu mintak Barabas dibibaska batan endak ughangtu.

¹² Pilatus bekiciak agi ngan ughangtu, kataunyau, “Amun luak itu, tuapau diau kamu endak aku buat ngan Jemau ini, diau kamu kiciakka rajau jemau Yahudi?”

¹³ Mangku ughangtu tegauk, “Pakukala Diau di kayu salip!”

¹⁴ La udim itu Pilatus betanyau agi, “Ngapau? Tuapau keja'atan Jemau ini?” Anyautu ughangtu tamba bias tegauk, “Pakukala Diau di kayu salip!”

¹⁵ Pilatus endak meriangka ati jemau banyaktu, mangku diau ngajung Barabas dibibaska batan endak ughangtu ngan Yesus dibaduki, mangku diserakanyau endak dipakuka di kayu salip.

Yesus dipusiakka

¹⁶ Mangku Yesus dibatak tentera masuak ke pengadilan di istana gubernur, mangku gegalau tentera di situ dipantau betunggal.

¹⁷ Ughangtu nyurumka baju rajau ngan Yesus, dibuat gitar jak di ghanting bedughi, dikenaukanyau di pala'Au.

¹⁸ Udim itu ughangtu mulai nunduak di adapanNyau, kataunyau, “Idup, ui Rajau jemau Yahudi!”

¹⁹ Ughangtu mbaduk pala'Au ngan tungkat, meludaiNyau mangku nunduak nyemba Diau.

²⁰ Udim musiakka Diau, ughangtu ngelucungka baju rajautu, dikenauka bajuAu agi ngan Diau. Mangku Yesus dibatak keluagh endak dipakuka di kayu salip.

Yesus dipakuka di kayu salip

²¹ Masau itu adau sughang jemau lalu, namaunyau Simun, jemau Kirini, bak Aliksandar ngan Rupus. Diau empai datang jak di luagh kuta, mangku diau dipasau mikul salip Yesus.

²² Mangku Yesus dibatak ke bada diau benamau Gulguta, retiau Bada Kerungkang Palak.

²³ Mangku Diau dienju'i anggur beundak mur, anyautu Diau enggup minumau.

²⁴ Udim itu Yesus dipakuka di kayu salip, mangku tentera-tentera ngagia pekakasAu, disuntinkanyau endak ngeruani bagian sesughangan.

²⁵ La kekindang aghi masau Diau dipakuka di kayu salip.

²⁶ Di pucuak kayu saliptu adau mirik diau ngiciakka sebapau Diau diukum, bacauannyau, “Rajau jemau Yahudi”.

²⁷ Serempak ngan Diau adau pulau duau bandit dipakuka di kayu salip, sikuak di kidauNyau, sikuak di kananAu. [

²⁸ Luak itula ditepati setu diau ditulis di Injil, bacauannyau, “Diau ka dikiciakka jemau ja'at.”]

²⁹ Jemau diau lalu di situ, nggilingka pala'au ngan nggelakka Diau, kataunyau, “Agh Kaba, endak meleghak Ghuma Allah mangku ditegakka timpau tigau aghi.

³⁰ Cubau, tughunla Kaba jak di kayu saliptu, ilakkala nyawau Kaba!”

³¹ Luak itu pulau imam-imam bepangkat tinggi ngan guru-guru ukum Taurat musiakka Yesus. Ughangtu ngiciak sughang ngan diau lain, “Jemau lain diselamatkaNyau, anyautu nyawauNyau sendighi nidau pacak diselamatkaNyau.

³² Amun Diau Rajau Penyelamat, Rajau Israil itu, cubaula Diau tughun jak di kayu saliptu, mangku kitau ngina'au ngan percayau ngan Diau!” Ughang duau diau dipakuka di kayu salip serempak ngan Yesustu nggelakka Diau pulau.

Yesus mati

³³ Masau tengaghi gegalau daira njadi keleman selamau tigau jam.

³⁴ Mangku la petang tegauk Yesus ngan suarau bias, kataunyau, “Elui, elui, lama sabaktani!” Retiau, “AllahKu, AllahKu, ngapau Dighi ninggalka Aku?”

³⁵ Ndengagh pantauanNyautu, jemau diau betegak di situ bekatau, “Dengaghkala, Diau mantau Elia!”

³⁶ Mangku sughang jak di ughangtu datang mbatak bungau karang, dighendamkanyau di anggur masam, dicucuakkanyau di kemughu, mangku dienjuakkanyau batan minuman Yesus, sampai bekatau, “Cubau kitau tunggu, apu Elia ka datang endak nughunkaNyau jak di kayu saliptu!”

³⁷ Mangku Yesus tegauk agi ngan suarau bias. La udim itu putus nyawauNyau.

³⁸ Mangku tabir di Ghuma Allah caghiak bela duau jak di pucuak sampai ke bawa.

³⁹ Kumandan tentera diau betegak buadapan ngan Yesus, nginak carau Diau mati, mangku bekatau, “Nyela nian, jemau ini Anak Allah.”

⁴⁰ Di situ adau pulau tinau-tinau diau nginak gegalaunyautu jak di jawua. Di rumbungan jemau tinautu adau Maria Magdalina, Maria mak Yakubus keciak ngan Yusias, ngan Salumi.

⁴¹ Gegalau tinautu ngikuti Yesus nepi'iNyau masau Diau di Galilia. Mangku adau pulau banyak tinau lainau diau datang ke Yerusalim serempak ngan Yesus.

Yesus dikuburka

⁴² Penarau itu aghi laka malam. Aghi itu aghi bedandan batan endak aghi Sabat.

⁴³ Ikak luak itu Yusup, jemau Arimatia, mbeghanika diri ngadap Pilatus mintak mayat Yesus. Yusuptu sughang angguta pengadilan agamau. Diautu jemau diregaui ngan pulau nantika Allah merinta luak rajau.

⁴⁴ Pilatus kemangan ndengagh Yesus la mati, mangku dipantaunyau kumandan tentera, ditanyaukanyau, apu Yesus la mati nian.

⁴⁵ La udim ndengagh kici'an kumandantu, Pilatus ngajung Yusup ngambiak mayattu.

⁴⁶ Mangku Yusup mbeli kain putia diau alap. La udim itu ditughunkanyau mayat Yesus jak di kayu salip, dibalutau ngan kain putia itu, ditepiakkanyau dalam kuburan diau digalika di bukit batu. Mangku diguliakkanyau sebua batu besak ke tebuak kuburan tadi.

⁴⁷ Maria Magdalina ngan Maria mak Yusias nginak di manau Yesus ditepiakka.