MARKUS 14 - PEJANJIAN EMPAI CERITAU ILUAK

Rencanau endak mbunua Yesus

¹ Duau aghi agi aghi rerayau Paska ngan aghi rerayau Ruti Nidau Beghagi ka mulai, mangku imam-imam bepangkat tinggi ngan guru-guru ukum Taurat ndalak jalan endak nangkap Yesus carau diam-diam endak mbunua Diau.

² Ughangtu bekatau, “Jangan titu dikerjauka masau aghi rerayau, mangku jemau banyak jangan ganau.”

Yesus diminya'i di Betania

³ Yesus adau di Betania, di ghuma Simun diau senitu buidapan ja'at. Mangku adau sughang jemau tinau datang mbatak sebua kacau buisi minyak ghum diau besak regaunyau. Yesus dang duduak makan, mangku tinau itu mecaka liagh kacautu, ditutuakka minyak ghumtu ke pucuak palak Yesus.

⁴ Adau jemau mara, mangku ngiciak ngan diau lain, “Tuapau gunaunyau minyaktu dighayakka?

⁵ Minyaktu pacak dijual ngan regau lebia tigau ratus tanci pirak, mangku pacak dienjuakka ngan jemau serik.” Mangku ughangtu maju marai tinau tadi.

⁶ Yesus bekatau, “Nengkela. Jangan kamu nyinggung tinau ini. Diau ngerjauka setu diau iluak batan endak Aku.

⁷ Jemau serik maju guak kamu, mangku kamu pacak nulung ughangtu, amun endak. Anyautu Akuni nidau maju guak kamu.

⁸ Diau la ngerjauka setu diau pacak dikerjaukanyau. Diau la nyediauka Aku ngan minyak ghum batan endak penguburanKu antak ka masaunyau.

⁹ Percayaula, di gegalau deniau di manau ceritau iluak jak di Allah diceritauka, setu diau dikerjauka tinau ini ka dikiciakka pulau endak ngingat diau.”

Yudas endak njualka Yesus

¹⁰ Mangku Yudas Iskariut, sughang jak di keduau belas anak-buaHautu, pegi njenguak imam-imam bepangkat tinggi, rencanaunyau endak nyeraka Yesus ngan ughangtu.

¹¹ Ndengagh kici'annyautu imam-imam tadi injiak nianan, mangku bejanji ka ngenjuakka tanci ngan Yudas. Mangku diau ndala'i jalan ngan masau diau iluak endak nyeraka Yesus.

Yesus makan jamuan Paska ngan anak-buaHau

¹² Masau aghi rerayau Ruti Nidau Beghagi, aghi petamautu, sikuak anak bebiri disembelia batan endak jamuan meringati Paska, aghi itula anak-buaHau betanyau ngan Yesus, “Ke manau bada, Dighi ngajung kami nyediauka jamuan Paska, mangku Dighi makan?”

¹³ Mangku Yesus ngajung anak-buaHau duau ughang, katauNyau, “Pegila masuak kuta. Di situla kamu ka betemu ngan jemau lanang mbatak guci buisi ayiak. Ngikutla diautu,

¹⁴ mangku ngiciakka ngan tuan ghuma diau dimasu'inyau: ‘Katau Guru, di manau bada diau la disediauka batan endak Aku makan Paska ngan anak-buaKu?’

¹⁵ Mangku ka ditunjuakkanyau ngan kamu bada di pucuak diau besak lagi la genap ngan dandanan. Di situla nyediauka jamuan Paska batan endak kitau.”

¹⁶ Mangku pegila anak-buaHautu masuak kuta, ditemuinyau gegalaunyau luak diau la dikiciakka Yesus, mangku disediaukanyau jamuan Paska.

¹⁷ Aghi la sangkup malam, Yesus datang ngan duau belas anak-buaHau.

¹⁸ Ughangtu dang duduak makan, mangku Yesus bekatau, “Dengaghkala kici'anKu, sughang jak di kamuni diau makan serempak ngan Aku ka nyeraka Aku.”

¹⁹ Ndengagh katau itu bingung anak-buaHautu, mangku bilang ughang ngiciakka ngan Diau, “Cengki, ukan aku.”

²⁰ Yesus nimbal, “Jemau itu sughang jak di duau belas kamuni, diau makan sepiring ngan Aku.

²¹ Nyela nian, Anak Manusiau ka ninggalka deniauni luak la ditulis di Injil ceritau Diau. Anyautu alaka celakau jemau diau nyeraka Anak Manusiautu. Iluakla jemautu nidau kekela adau di deniau.”

Jamuan Tuhan

²² Yesus ngan anak-buaHau dang makan, Yesus ngambiak ruti, bedu'a beterimau-kasia, dipiyak-piya'Au, dienjuakkaNyau ngan anak-buaHau, katauNyau, “Ambiakla, makanla! Inila badanKu.”

²³ La udim itu Yesus ngambiak mangkuak anggur, bedu'a beterimau-kasia, dienjuakkaNyau ngan anak-buaHautu, mangku gegalau anak-buaHau minum jak di mangkuak itu.

²⁴ Katau Yesus, “Inila daghaKu diau neguaka janji Allah, diau melilia batan endak banyak jemau.

²⁵ Percayaula, mulai mbak kini Aku nidau ka minum anggur ini agi, enggut Aku minum anggur diau empai di bada BapakKu merinta.”

²⁶ Ughangtu benyanyi ngagungka Allah. Udim itu ughangtu pegi ke Bukit Saitun.

Pitrus nidau ka ngaku'i Yesus

²⁷ Mangku Yesus bekatau ngan ughangtu, “Malam ini gegalau kamu ka belaghi ninggalka Aku. Karnau di Injil tetulis, ‘Aku ka mbunua tukang sayia, mangku bebiriau ka teceghai-beghai.’

²⁸ Anyautu udim Aku la idup agi, Aku ka pegi ndului kamu ke Galilia.”

²⁹ Pitrus bekatau ngan Yesus, “Empuak gegalau diau lainau ninggalka Dighi, aku nidau.”

³⁰ “Ingatkala,” katau Yesus, “Malam ini antak ka ayam bekukuak duau kali, kaba la tigau kali ngiciakka nidau keruan Aku.”

³¹ Pitrus nimbal ngan tegas, “Empuak aku mesti mati serempak ngan Dighi, aku nidau ka bekatau, bansau aku nidau keruan Dighi.” Gegalau anak-buaHau diau lainau ngiciak luak itu pulau.

Yesus bedu'a di Getsimani

³² Mangku Yesus ngan anak-buaHau pegi ke bada diau benamau Getsimani. Di situ Diau bekatau ngan ughangtu, “Duduakla kamu di sini, penarau Aku pegi bedu'a.”

³³ Diau ngajung Pitrus, Yakubus ngan Yuhanis ngantini Diau. Mangku Diau mulai meghasau sedia ngan gelisa.

³⁴ Diau bekatau ngan ughang tigau itu, “AtiKu madak nian, asaunyau luak ka mati. Mendamla kamu di sini, ngikut bejagau ngan Aku.”

³⁵ Udim itu Diau pegi njawua dikit, mangku Diau rubua ke tana ngan bedu'a, supayau amun bulia nidau nanti meghasauka sengsarau itu.

³⁶ KatauNyau, “Bak, gegalaunyau ka pacak, amun Dighi. Jawuakala sengsarau itu jak di Aku. Anyautu jangan nurut kendak Aku, tapitu kendak Dighi ajau.”

³⁷ La udim itu Diau ngulang guak tigau ughang tadi, dikina'iNyau dang tiduak, mangku Diau bekatau ngan Pitrus, “Simun, tiduak kaba? Kaba nidau pacak bejagau sejam?

³⁸ Bejagaula ngan bedu'ala, supayau kamu jangan bedusau, amun dicubaui. Nyela, dalam ati kamu endak ngerjauka setu diau benagh, anyautu kekuatan manusiau tebatas.”

³⁹ Yesus pegi bedu'a agi ndu'aka setu diau semegi ngan tadi.

⁴⁰ Udim itu Diau ngulang agi, dikina'iNyau ughangtu masia tiduak pulau, karnau ghungau nian. Mangku ughangtu nidau keruan setu diau pacak dikiciakka ngan Yesus.

⁴¹ La udim itu Diau ngulang agi diau ketigau kaliau ngan bekatau ngan ughangtu, “Masia kamu tiduak ngan gheghadu? Udimla. Kina'ila, la masaunyau Anak Manusiau diseraka ngan jemau bedusau.

⁴² Bangunla, mela kitau pegi. Jemau diau njualka Aku la datang.”

Yesus ditangkap

⁴³ Penarau Yesus gi ngiciak, Yudas sughang jak di duau belas anak-buaHau datang. Serempak ngan diau datang pulau jemau serumbungan besak mbatak pedang mbatak pembaduk. Ughangtu diajung imam-imam bepangkat tinggi, guru-guru ukum Taurat ngan tuau-tuau jemau Yahudi.

⁴⁴ Jemau diau nyeraka Yesus la ngiciakka tandau ngan jemau diau serempak ngan diau, kataunyau, “Jemau diau ka kucium itula Jemaunyau. Tangkapla Diau. Bata'ila ngan jagaui, jangan ka belaghi.”

⁴⁵ La sampai di situ Yudas gegasip masighi Yesus, kataunyau, “Pak Guru, diau kami regaui.” Mangku diciuminyau.

⁴⁶ La udim itu ughangtu nangkap Yesus, dikecakka ughangtu gegerut.

⁴⁷ Mangku sughang jak di anak-buaHau diau adau di situ ncabut pedangau, dikapakkanyau ngan anak-bua Imam Besak, mangku putus telingaunyau.

⁴⁸ Mangku Yesus bekatau ngan jemau banyak tadi, “Kamu sangkau Aku bandit, mangku mbatak pedang mbatak pembaduk endak nangkap Aku?

⁴⁹ Idang aghi Aku ngajagh di Ghuma Allah. Kamu enggup nangkap Aku. Nyela, gegalaunyautu mesti tejadi, mangku ditepati setu diau ditulis dalam Injil.”

⁵⁰ La udim itu gegalau anak-buaHau belaghi ninggalka Yesus.

⁵¹ Adau sughang budak bujang ngikut Yesus. Diautu cuman bekain selambagh. Ughangtu endak nangkap diau.

⁵² Anyautu diau lepaska kainautu, mangku belaghi nidau bekain.

Yesus di adapan pengadilan agamau

⁵³ La udim Yesus ditangkap, Diau dibata'i ngadap Imam Besak. Mangku gegalau imam bepangkat tinggi, tuau jemau Yahudi ngan guru ukum Taurat betunggal di situ.

⁵⁴ Pitrus ngikut jak di jawua sampai ke tengalaman Imam Besaktu. Mangku di situ diau duduak guak penjagau, bediang guak api.

⁵⁵ Imam-imam bepangkat tinggi ngan gegalau pengadilan agamau ndalak jemau diau ngiciak nyalaka Yesus, supayau pacak diukum mati, anyautu nidau dapat.

⁵⁶ Banyak jemau ngiciakka setu diau mbu'ung, anyautu kici'antu nidau pulau semegi.

⁵⁷ Mangku adau bebeghapau jemau betegak ngiciakka setu diau mbu'ung nyalaka Yesus.

⁵⁸ Ughangtu bekatau, “Kami ndengagh jemau ini bekatau, ‘Aku ka merubuaka Ghuma Allah diau dibuat manusiauni, mangku timpau tigau aghi ka Kutegakka agi diau lain diau ukan dibuat manusiau.’ ”

⁵⁹ Anyautu kici'an ughangtu pulau nidau semegi sughang ngan diau lain.

⁶⁰ Mangku Imam Besak betegak di pengadilantu ngan betanyau ngan Yesus, “Ngapau Kaba nidau nimbali kici'an diau mburuakka Kabatu?”

⁶¹ Anyautu Yesus diam ajau nidau ngiciak tuapau-apau. Mangku Imam Besak betanyau agi ngan Diau, “Apu Kaba Mesias, Rajau Penyelamat, Anak Allah diau suci?”

⁶² Yesus nimbal, “Akula Diau. Kapu dighi ka nginak Anak Manusiau duduak di sebela kanan Allah diau Mahakuasau mangku datang ngan aban jak di langit.”

⁶³ Mangku Imam Besak ncebaghka bajuau ngan bekatau, “Nidau nanti kici'an jemau lain agi.

⁶⁴ Gegalau kapu dighi la ndengagh Diau nggelakka Allah. Luak manau pendapat kapu dighi?” Mangku gegalau ughangtu mutuska, Diau pantas diukum mati.

⁶⁵ Mangku ughangtu mulai meludai dayi Yesus, ditukupi dayiAu ngan ditinjui, sampai bekatau, “Ui nabi, cubau dedakla sapau ninju Kaba?” Mangku penjagau pulau nampagh Yesus.

Pitrus nidau ngaku'i Yesus

⁶⁶ Masau itu Pitrus gi adau di bawa di tengalaman. Mangku adau sughang budak Imam Besak jemau tinau datang ke situ.

⁶⁷ Diau nginak Pitrus dang bediang guak api, diau ngengina'i dayiau ngan bekatau, “Kaba pulau maju seghundak ngan Yesus, jemau Nasarittu.”

⁶⁸ Anyautu diau nidau ngakuak, kataunyau, “Aku nidau keruan ngan nidau terti, tuapau kici'an dighi?” Mangku diau pegi ke duaghau masuak. [Masau itu ayam bekukuak.]

⁶⁹ Mangku tinau tadi nginak diau agi, diau bekatau ngan jemau diau adau di situ, “Jemau ini nyela nian sughang jak di ughangtu.”

⁷⁰ Pitrus nidau pulau ngaku'i. Nidau lamau udim itu adau jemau lain diau adau di situ ngiciak ngan Pitrus, “Nyela nian, kaba sughang jak di ughangtu. Kaba jemau Galilia!”

⁷¹ Mangku Pitrus besumpa, “Aku endiak keruan Jemau itu. Nengkela Allah ngukum aku, amun aku mbu'ung!”

⁷² Masau itu pulau ayam bekukuak keduau kaliau. Mangku Pitrus teghingat setu diau la dikiciakka Yesus ngan diau, “Antak ka ayam bekukuak duau kali, kaba la tigau kali nidau ngaku'i Aku.” Mangku Pitrus nangis sesedanan.