MARKUS 11 - PEJANJIAN EMPAI CERITAU ILUAK

Yesus masuak Yerusalim

¹ Yesus ngan anak-buaHau la pasigh ngan Yerusalim, la sampai di Betpagi ngan Betania di Bukit Saitun. Mangku Yesus ngajung duau ughang anak-buaHau

² ngan bekatau, “Pegila ke dusun diau di adapan kamutu. Amun kamu la masuak, kamu ka nginak sikuak anak keledai tetambang diau lum kekela dinayi'i jemau. Legha'ila tambangan keledaitu, mangku batak ke sini.

³ Amun adau jemau betanyau ngan kamu, tuapau sebapau kamu melegha'i keledaitu, kiciakkala ngan jemaunyau, ‘Tuhan endak makaiau, mangku gasip dibaliakka.’ ”

⁴ Duau ughang anak-buaHautu pegi, mangku betemu sikuak anak keledai dang tetambang di mukau duaghau di tepi jalan, mangku dilegha'inyau.

⁵ Jemau diau betegak di situ betanyau, “Ngapau kamu melegha'i keledai itu?”

⁶ Ughang duautu nimbal luak diau la dikiciakka Yesus, mangku jemau tadi ngenangka ughangtu mbatak keledaitu.

⁷ Ughang duautu mbatak keledaitu guak Yesus, dialasinyau ngan bajuau, mangku Yesus nayi'inyau.

⁸ Banyak jemau mbentangka bajuau di jalan. Adau pulau diau neta'i daun paku bindu jak di tepi umau, ditepiakkanyau di jalan.

⁹ Jemau diau bejalan dulu sekali ngan diau mendian tegauk-gauk, “Husana! Tepujila diau datang atas namau Tuhan.

¹⁰ Idupla pemerintahan diau ka datang, pemerintahan Daud, niniak puyang kitau. Tepujila Allah diau Mahatinggi!”

¹¹ Yesus la sampai di Yerusalim mangku masuak Ghuma Allah. Di situ Diau ngina'i gegalaunyau, anyautu aghi laka malam, mangku Diau pegi keluagh ke Betania ngan duau belas anak-buaHau.

Yesus ndawaika batang aghau

¹² Pagi di aghiau masau Yesus ngan duau belas anak-buaHau bejalan ninggalka Betania, Yesus lapagh.

¹³ Jak di jawua Diau nginak sebatang aghau, daunau rimbun. Diau pegi guak batang aghau itu endak nginak apu adau buahau. La sampai di batangtu, Diau nidau tekinak buahau, cuman daunau ajau, karnau masau itu lum pangkau bua aghau.

¹⁴ Mangku Diau bekatau ngan batang aghautu, “Kaba nidau ka bebua agi selelamaunyau.” Anak-buaHau ndengagh kici'an itu.

Yesus mberesiaka Ghuma Allah

¹⁵ Mangku Yesus ngan anak-buaHau la sampai di Yerusalim. Diau masuak ke Ghuma Allah mangku mulai ngisitka gegalau tukang ngulua di tengalaman Ghuma Allah. Mija-mija tukang nukar tanci ngan bangku tukang njual burung darau dikangkangkaNyau.

¹⁶ Nidau sughang kia diajungAu mbatak dandanan wuan tengalaman Ghuma Allahtu.

¹⁷ Mangku Diau ngajagh ughangtu, katauNyau, “Di Injil ditulis luak ini: Allah bekatau, ‘GhumaKu dikiciakka ghuma du'a batan endak gegalau bangsau.’ Anyautu kamuni la njadikanyau saghang bandit.”

¹⁸ Imam-imam bepangkat tinggi ngan guru-guru ukum Taurat ndengagh ceritau tadi, mangku ughangtu mulai ndalak jalan endak mbunua Yesus. Ughangtu takut ngan Diau, karnau gegalau jemau kemangan ndengagh ajaghanNyau.

¹⁹ Aghi laka malam mangku Yesus ngan anak-buaHau ngeluagh jak di kuta itu.

Pelajaghan jak di batang aghau

²⁰ Pagi di aghiau gi akap-akap, masau ughangtu lalu guak batang aghautu, tekinak batangtu la keghing enggut akaghau.

²¹ Mangku Pitrus teghingat ceritau aghi empaini, mangku diau bekiciak ngan Yesus, kataunyau, “Guru, kina'ila, batang diau Dighi dawaika la keghing.”

²² Yesus nimbal, “Percayaula ngan Allah.

²³ Ngenian katauKu ini: Amun kamu percayau nian ngan nidau asau-asau, kamu pacak nian bekatau ngan bukit ini, ‘Tuangkatla ngan tecapakla ke dalam laut!’ Mangku titu ka tejadi.

²⁴ Karnau itu ingatkala ini: Setu diau kamu pintak dalam du'a percayaula, bansau kamu la nerimaunyau, mangku titu ka dienjuakka ngan kamu.

²⁵ Mangku amun kamu bedu'a, anyautu ati kamu nidau riang ngan sughang jemau, abiskala sala jemautu kudai, supayau Bapak kamu di sergau pulau ngabisi dusau kamu.

²⁶ Amun kamu nidau ngabiska sala jemau, Bapak kamu di sergau pulau nidau ka ngabisi dusau kamu.”

Yesus ditanyaui jak di manau kuasauNyau

²⁷ La udim itu Yesus ngan anak-buaHau la sampai di Yerusalim. Diau dang bejalan di tengalaman Ghuma Allah mangku imam-imam bepangkat tinggi ngan tuau-tuau jemau Yahudi datang njenguak Diau

²⁸ ngan betanyau, “Pakai kuasau apau Kaba ngerjauka gegalaunyautu? Mangku sapau ngenjuakkanyau ngan Kaba?”

²⁹ Yesus nimbal, “Aku pulau endak betanyau ngan kapu dighi. Amun kapu dighi nimbal, Aku pulau ka ngiciakka ngan kapu dighi, ngan kuasau sapau Aku ngerjauka gegalaunyautu.

³⁰ Baptisan Yuhanis itu asalau jak di sergau apu jak di manusiau? Cubau nimbal.”

³¹ Ughangtu buijau, “Amun kitau kiciakka, ‘Asalau jak di sergau’ Diau ka bekatau, ‘Ngapau kapu dighi nidau percayau ngan diau?’

³² Baghia kitau kiciakka, ‘Asalau jak di manusiau.’ ” Ughangtu takut ngan jemau banyak, karnau gegalau ughangtu nganggap Yuhanistu sughang nabi.

³³ Mangku ughangtu nimbal, “Kami nidau keruan.” Mangku Yesus bekatau ngan ughangtu, “Amun luak itu, Aku enggup pulau ngiciakka ngan kapu dighi ngan kuasau sapau Aku ngerjauka gegalaunyautu.”