LUKAS 5 - PEJANJIAN EMPAI CERITAU ILUAK

Tukang ndalak ikan dijadika tukang ndalak jemau

¹ Yesus dang betegak di tepi danau Genesarit, jemau banyak bererincitan endak ndengaghka ceritau jak di Allah.

² Diau nginak duau bua perawu di tepi danau tadi. Tukang ndalak ikan la tughun jak di perawu mbasua jalaunyau.

³ Diau nayiak sebua perawu, perawu Simun, mangku ngajung diau nulakkanyau jawua dikit jak di tepi. Diau duduak mangku ngajagh jemau banyak tadi jak di perawutu.

⁴ La udim ngajagh, Diau ngiciak ngan Simun, “Bedayungla kaba ke guak dalam, kipaskala jalau kamu.”

⁵ “Pak,” katau Simun, “Semalam getau kami la keria bekerjau, nidau bulia tuapau-apau. Anyautu karnau Dighi ngajung, ka kukipaska agi.”

⁶ La udim dikerjaukanyau, banyak nian ughangtu bulia ikan, mangku jalaunyau laka cebagh.

⁷ Ughangtu mintak tulung ngan kantin-kantinau di perawu lain. Kantinautu datang, mangku diisi duau perawu penua ngan ikan, perawutu laka teghendam.

⁸ Nginak titu, Simun nunduak di adapan Yesus ngan bekatau, “Tinggalkala aku, Tuhan, karnau akuni jemau bedusau.”

⁹ Simun ngan kantinautu kemangan nginak pulian ikan banyak itu.

¹⁰ Luak itu pulau ngan kantinau Yakubus ngan Yuhanis, anak Sebedius. Yesus bekatau ngan Simun, “Nidau endak takut. Mulai mbak kini kaba njadi tukang ndalak jemau.”

¹¹ Ughangtu naghiak perawu ke daghat, gegalaunyau ditinggalkanyau, mangku ngikut Yesus.

Yesus meghadui jemau diau buidapan ja'at

¹² Yesus dang adau di kuta. Di situ adau sughang jemau lanang, badanau penua ngan idapan ja'at diau mbayauka. Satu nginak Yesus, diau nunduak di adapanNyau ngan mintak tulung, kataunyau, “Pak, amun Dighi endak, Dighi pacak meghadui aku.”

¹³ Yesus nyurungka tanganAu ngecakka jemau itu ngan bekatau, “Arau, ghadula kaba.” Masau itu pulau idapannyau ghadu.

¹⁴ Yesus nidau ngajung jemau itu ngiciakkanyau ngan sapau kila, mangku bekatau, “Pegila, kinakkala badan kaba ngan imam, enjuakkala kerban diau diperintaka Musa, buktiau ngan ughangtu, bansau kaba la ghadu.”

¹⁵ Ceritau Yesus tamba tesiar ke manau-manau, mangku banyak jemau datang endak ndengaghkaNyau ngan mintak dighaduka jak di idapannyau.

¹⁶ Anyautu Yesus rajin pegi ke bada diau suni endak bedu'a.

Jemau lumpua dighaduka

¹⁷ Yesus dang ngajagh, adau jemau Parisi ngan guru-guru ukum Taurat. Ughangtu datang jak di gegalau dusun di Galilia ngan Yudia, jak di Yerusalim pulau. Kuasau Tuhan adau di Yesus, mangku Diau pacak meghaduka jemau buidapan.

¹⁸ Adau jemau datang njagang sughang jemau mati sepiak di penjagang. Ughangtu ncubau mbata'au masuak endak nepiakka jemau mati sepiaktu di adapan Yesus.

¹⁹ Anyautu ughangtu nidau pacak mbata'inyau masuak, karnau jemau banyak di situ. Itula sangkanau jemau tadi nayiak atap ghuma, dibukakkanyau ataptu, ditughunkanyau jemau mati sepiak tadi ngan penjagangau di pugan jemau banyaktu tepat di adapan Yesus.

²⁰ Satu nginak ughangtu percayau nian ngan Diau, Yesus bekatau, “Ui, kantinKu, dusau-dusau kaba la diabiska.”

²¹ Mangku guru-guru ukum Taurat ngan jemau jak di rumbungan jemau Parisi berupuak, “Sapau jemau ini diau beghani nian nggelakka Allah? Nidau bediau diau pacak ngabisi dusau, selain Allah.”

²² Yesus ngeruani rupu'an ughangtu, mangku Diau bekatau, “Ngapau kapu dighi berupuak luak itu?

²³ Manau diau lebia mura, ngiciakka, ‘Dusau kaba la diabiska,’ sangkan ngiciakka, ‘Bangunla kaba bejalanla.’?

²⁴ Anyautu Akuni ka ngajung jemau ini bangun, mangku kapu dighi keruan, bansau Anak Manusiau bekuasau di deniau ngabiska dusau.” Mangku Yesus ngiciak ngan jemau mati sepiak itu, katauNyau, “Bangunla kaba, katangkala penjagang kaba, mangku baliakla ke ghuma kaba!”

²⁵ Masau itula pulau jemau itu bangun di adapan jemau banyaktu, dikatangkanyau penjagangautu, mangku baliak ke ghumahau ngan ngagungka Allah.

²⁶ Gegalau jemautu kemangan galau, mangku ngagungka Allah. Mangku ngan peghasauan takut ughangtu bekatau, “Saghini kitau la nginak setu diau nidau ka adau!”

Liwi dipilia njadi anak-bua Yesus

²⁷ Udim itu Yesus ngeluagh, mangku nginak sughang tukang tagia cuki. Namaunyau Liwi. Diau dang duduak di kanturau. “Mela, ngikut Aku.” katau Yesus.

²⁸ Liwi betegak, ninggalka gegalaunyau, mangku ngikut Yesus.

²⁹ Mangku Liwi mantau makan Yesus di ghumahau. Banyak nian kantinau tukang tagia cuki ngan jemau lain ngikut makan serempak ngan Diau.

³⁰ Jemau Parisi ngan guru-guru ukum Taurat bemumut mumuti anak-bua Yesus, kataunyau, “Ngapau kamu minum-makan ngan penagia cuki ngan jemau bedusau?”

³¹ Yesus nimbal, katauNyau, “Jemau diau sihat nidau endak duktur, jemau diau buidapan ajau.

³² Aku datang ukan endak mantau jemau diau benagh, tapitu jemau diau bedusau, mangku diau ngubai jak di dusaunyau.”

Ngapau anak-bua Yesus nidau puasau?

³³ Adau jemau diau bekiciak pulau ngan Yesus, kataunyau, “Anak-bua Yuhanis rajin bedu'a ngan puasau. Luak itu pulau anak-bua jemau Parisi. Anyautu anak-bua Kaba minum-makan.”

³⁴ Yesus nimbal, “Apu kapu dighi pacak ngajung kantin pengantin puasau di jamuan nika, selamau pengantinan gi adau? Cengki nidau!

³⁵ Masaunyau ka sampai, pengantinantu ka diambiak jak di ughangtu. Masau itula ughangtu ka puasau.”

³⁶ Mangku Yesus nceritauka cuntau ini, “Nidau bediau jemau diau ngambiak batan penampit jak di kain empai endak nampiti baju diau bughuak, karnau kain empai itu ka cebagh, lagi pulau kain penampit diau dicebaghka jak di kain empai nidau sesuai ngan kain baju diau bughuak tadi.

³⁷ Luak itu pulau nidau bediau sughang kia diau ngisika ayiak anggur diau empai ke dalam kantung bawuak diau lamau, karnau ayiak anggur diau empaitu ka mecaka kantungtu, mangku anggurau tebuang ngan kantungtu rusak.

³⁸ Ayiak anggur diau empai mesti dimasuakka ke dalam kantung diau empai pulau.

³⁹ Lagi pulau nidau bediau jemau diau la minum ayiak anggur diau lamau endak minum ayiak anggur diau empai. Diau ka bekatau, ‘Ayiak anggur diau lamau itu lemak.’ ”