LUKAS 4 - PEJANJIAN EMPAI CERITAU ILUAK

Yesus dicubaui Iblis

¹ Yesus dikuasaui Rua Allah. Diau dang baliak jak di ayiak Yurdan, Diau dibata'i Rua itu ke padang bungin.

² Di situ Diau mendam empat pulua aghi mangku dicubaui Iblis. Selamau itu Diau nidau makan tuapau-apau. Udim-udimau Diau kelapaghan.

³ Mangku Iblis ngiciak ngan Diau, kataunyau, “Kabani Anak Allah. Ajungla batu ini njadi ruti!”

⁴ Katau Yesus, “Di Injil ditulis, ‘Manusiau idup ukan jak di ruti ajau.’ ”

⁵ Udim itu Iblis mbatak Yesus ke bada Diau tinggi nian, mangku timpau jerang ajau diau nginakka ngan Yesus gegalau kerajauan deniau.

⁶ Katau Iblis, “Gegalau kuasau ngan kekayauan ini ka kuenjuakka ngan Kaba galau, karnau gegalaunyautu aku ngempuau. Mangku aku pacak ngenjuakkanyau ngan sapau kila diau endak kuenju'i.

⁷ Kaba, amun Kabani nyemba aku, gegalaunyautu ka njadi hak Kaba.”

⁸ Katau Yesus, “Dalam Injil tetulis, ‘Kaba mesti nyemba Tuhan, Allah kaba. Diau ajau mesti kaba semba.’ ”

⁹ Udim itu Yesus dibata'i Iblis ke Yerusalim, ditepiakkanyau di mubungan Ghuma Allah, mangku katau Iblis, “Kabani Anak Allah. Numbanla Kaba jak di sini ke bawa,

¹⁰ karnau di Injil ditulis luak ini, ‘Allah ka ngajung malaikat-malaikat nyayia Kaba iluak-iluak.’

¹¹ lagi pulau ditulis, ‘Malaikattu ka nyanggak Kaba, mangku keting Kaba endiak tuantuak ke batu.’ ”

¹² Yesus nimbal, katauNyau, “Adau pulau ditulis, ‘Jangan ncubaui Tuhan, Allah kaba!’ ”

¹³ La udim ncubaui Yesus, Iblis pegi jak di Diau, mangku endak nunggu masau diau iluak.

Yesus mulaika kerjauNyau di Galilia

¹⁴ Yesus baliak ke Galilia dikuasaui Rua Allah. CeritauNyau tesiar ke manau-manau di sekitar itu.

¹⁵ Diau ngajagh di ghuma sembayang, mangku jemau muji Diau galau.

Yesus nidau diterimau di Nasarit

¹⁶ Diau sampai di Nasarit, bada Diau diasua, mangku luak biasaunyau aghi Sabat Diau masuak ghuma sembayang. Diau betegak endak mbacauka Injil,

¹⁷ dienjuakka kitab nabi Yesaya. Satu dibuka'Au, Diau dapat ayat ini:

¹⁸ “Rua Tuhan adau di Aku, karnau Diau la netapka Aku endak ngiciakka ceritau iluak ngan jemau serik-sarau. Diau ngajung Aku ngebarka, bansau jemau tetangkap ka diluputka ngan jemau butau ka pacak nginak. Diau ngajung Aku nulung jemau diau dipasau

¹⁹ ngan ngatauka, masaunyau la sampai Tuhan nulung umatAu.”

²⁰ Udim itu Yesus nggulungka kitabtu, dibaliakkaNyau ngan petugas, mangku Diau duduak. Matau gegalau jemau di ghuma sembayangtu ngina'i Diau galau.

²¹ Mangku Diau mulai ngiciak ngan ughangtu, katauNyau, “Saghini isi kitab Injil tadi la ditepati, satu kapu dighi ndengaghkanyau.”

²² Gegalau jemau itu nyetujui Yesus sampai kemangan, karnau katau-katau diau dikiciakkaNyautu iluak nianan, mangku ughangtu bekatau, “Ukanau Diauni anak Yusup?”

²³ Mangku Yesus ngiciak ngan ughangtu, katauNyau, “Cengki kapu dighi ka ngiciakka pepata ini ngan Aku, ‘Duktur ghadukala diri kaba sendighi’, kerjaukala pulau di bada asal Kaba ini gegalaunyau diau kami dengagh Kaba kerjauka di Kapernaum.”

²⁴ KatauNyau pulau, “Ngenian katauKu ini, nidau bediau nabi diau diregaui di dusunau.

²⁵ Ingatkala, katauKu ini benagh pulau: Timpau nabi Elia banyak tinau merandau di Israil, timpau nidau bediau ujan selamau tigau taun enam bulan, timpau kemaghau panjang di gegalau nenggeritu, mangku nidau bediau makanan.

²⁶ Empuak luak itu, Elia nidau diajung pegi njenguak sala sughang tinau jemau Israil itu, anyautu diau diajung njenguak sughang randau di Sarpat di nenggeri Sidun.

²⁷ Luak itu pulau timpau nabi Elisa banyak jemau Israil buidapan ja'at diau mbayauka, anyautu nidau sughang kia jak di ughangtu dighaduka lain jak di Na'aman, jemau Siria itu.”

²⁸ Ndengagh kici'anNyautu ughang di ghuma sembayang mara kematila.

²⁹ Ughangtu betegak ngisitka Yesus keluagh, dibata'inyau pasigh badas, bada kuta itu ditegakka, endak ditulakkanyau ke badas.

³⁰ Anyautu Yesus lalu di tetengaan jemau banyak itu, mangku Diau pegi.

Jemau diau diarung Iblis

³¹ Udim itu Yesus pegi ke Kapernaum, kuta di Galilia. Di situ Diau ngajagh di ghuma sembayang masau aghi Sabat.

³² Ughang di situ kemangan nian ndengagh ajaghanNyau, karnau Diau ngajagh ngan kuasau.

³³ Di ghuma sembayang itu adau sughang jemau diau diarung iblis. Jemau itu tepekiak-pekiak,

³⁴ kataunyau, “Ui Kaba, Yesus, jemau Nasarit. Endak tuapau ngan kami? Kaba ke sini endak mbenasauka kami? Aku keruan Kaba. Kabani jemau suci diau diajung Allah.”

³⁵ Mangku Yesus mbentak diau, katauNyau, “Diam, keluaghla jak di jemau ini!” Iblistu mbanting-bantingka jemau tadi di pugan jemau banyak, mangku larat jak di jemautu, dikit kia nidau diapau-apauka.

³⁶ Jemau kemangan galau, mangku ngiciak sughang ngan diau lain, kataunyau, “Ui, hibat nianan kici'anNyautu. Ngan kuasau Diau ngajung rua-rua ja'at keluagh, mangku diau ngeluagh pulau.”

³⁷ Mangku ceritau Yesus itu tesiar di gegalau daira itu.

Yesus meghadui mentuau Simun Pitrus ngan jemau lainau

³⁸ Udim itu Yesus ngeluagh jak di ghuma sembayang, mangku pegi ke ghuma Simun. Mentuau tinau Simun Pitrus dang buidapan demam, mangku Yesus dipintak nulungi diau.

³⁹ Yesus pegi guak tinau itu endak meghaduka demamau, mangku demamautu ghadu. Tinautu bangun cecepat nepi'i mendahautu.

⁴⁰ Matau-aghi la padam, banyak jemau mbatak jemau buidapan njenguak Yesus. Idapannyau bemecam-mecam. Yesus nepiakka tanganAu di bilang palak ughangtu, mangku diau ghadu.

⁴¹ Iblis-iblis pulau ngeluagh jak di banyak jemau sampai mekiak-mekiak, kataunyau, “Kaba Anak Allah.” Mangku Yesus marai iblis itu, nidau ngajung diau ngiciak, karnau iblistu keruan, bansau Diautu Rajau Penyelamat.

Yesus ngajagh di dusun-dusun lain

⁴² Matau-aghi la tumbua, Yesus ngeluagh dusun pegi ke bada diau suni. Anyautu jemau banyak ndala'i Diau. Mangku la betemu, ughangtu mintak, supayau Yesus jangan ninggalka ughangtu.

⁴³ Anyautu Yesus bekatau, “Di dusun-dusun lain Aku mesti ngiciakka pulau ceritau iluak, bansau Allah laka merinta. Itula sangkan Aku diajung ke deniau.”

⁴⁴ Mangku Diau ngiciakka ceritau iluak di ghuma-ghuma sembayang di gegalau daira Yudia.