LUKAS 21 - PEJANJIAN EMPAI CERITAU ILUAK

Sughang randau ngenjuakka tanci batan endak Allah

¹ Di Ghuma Allah Yesus ngina'i jemau kayau masuakka tanci dalam bada tanci batan endak Allah.

² Diau nginak pulau sughang randau diau serik-sarau masuakka duau butiak tanci tembagau di bada itu.

³ Mangku Yesus bekatau, “Ngenian, banyakla randau serik ini masuakka tanci sangkan gegalau jemau lain tadi.

⁴ Gegalau ughangtu ngenjuakka tanci jak di belebihan retaunyau. Anyautu randau ini, empuak diau serik-sarau, ngenjuakka gegalaunyau diau adau di diau, diau mesti digunaukanyau batan endak idupau.”

Ghuma Allah ka rubua

⁵ Adau jemau diau ngiciakka kualapan Ghuma Allah diau diperiasi batu alap-alap ngan dandanan diau dienjuakka ngan Allah. Mangku Yesus ngiciak ngan ughangtu, katauNyau,

⁶ “Nanti ka sampai masaunyau, gegalaunyau diau kamu kinak ini ka dirubuaka. Nidau bediau sutiak kia batu di sini diau ka tinggal tepasang di badahau.”

Tandau antak ka kiamat

⁷ Anak-buaHau betanyau ngan Yesus, kataunyau, “Guru, kebilau titu ka tejadi? Tuapau tandaunyau, bansau la masaunyau titu ka tejadi?”

⁸ Yesus bekatau, “Sepepadaula, jangan kamu tetipu. Banyak jemau ka datang makai namauKu ngan bekatau, ‘Akula diau’ lagi, ‘La masaunyau’. Jangan kamu ngikut ughangtu.

⁹ Amun ndengagh adau perang ngan pelawanan, jangan kamu tegagau. Gegalaunyautu mesti tejadi kudai. Empuak luak itu ukan retiau, deniau laka kiamat.”

¹⁰ Mangku Yesus neruska kici'anNyau, “Bangsau ka melawan bangsau, nenggeri diau sutiak melawan nenggeri diau lain.

¹¹ Di manau-manau ka adau gempau diau besak kematila ngan idapan diau cepat minda ngan kelapaghan. Ka adau setu diau nakutka ngan tandau diau nyelia di langit.

¹² Antak ka gegalaunyautu tejadi, kamu ka ditangkap, disiksau, mangku kamu ka diadili di ghuma sembayang ngan dimasuakka ke jil. Kamu ka dibata'i ngadap rajau ngan penguasau-penguasau, karnau kamu percayau ngan Aku.

¹³ Itula kesempatan kamu ngiciakka ceritau iluak jak di Allah.

¹⁴ Ingatkala nian: Jangan kamu ghegak ngan setu diau kamu kiciakka endak mbenaghka diri kamu.

¹⁵ Akunila ka ngenjuakka ngan kamu katau-katau ngan kepintaran, mangku nidau sughang kia jak di musua kamu pacak melawan ngan nyalaka kamu.

¹⁶ Mangku kamu ka diseraka enduak-bapak kamu, ading-beghading kamu, denga-sanak kamu, ngan kantin-kantin kamu. Separau jak di kamu ka dibunua.

¹⁷ Kamu ka diluatka gegalau jemau, karnau kamu percayau ngan aku.

¹⁸ Anyautu selambagh kia gumbak jak di palak kamu nidau ka diapau-apauka.

¹⁹ Amun kamu ka beta'an ngan sabar, kamu ka selamat.”

Yerusalim ka runtua

²⁰ “Amun kamu nginak Yerusalim dikepung tentera, kamu ka keruan, bansau nidau lamau agi kutatu ka diancurka.

²¹ Masau itu jemau diau di Yudia mesti belaghi ke gunung. Jemau diau adau di kuta mesti ninggalka kuta. Jemau diau di dusun-dusun jangan masuak ke kuta,

²² karnau itula masau pembalasan, mangku ditepati gegalaunyau diau ditulis dalam Injil.

²³ Ka celakau tinau-tinau diau dang ngandung ngan tinau diau minumi budak keciak masau itu. Nenggeri ini ka adau sengsarau nian, karnau Allah ka ngukum bangsau ini.

²⁴ Separau ka dibunua ngan pedang, separau agi ka dibata'i luak anak kawalan ke gegalau deniau. Yerusalim ka dipija'i jemau diau nidau percayau ngan Allah, enggut abis masau diau ditetapka Allah batan endak ughangtu.”

Tandau Anak Manusiau ka datang

²⁵ “Ka adau tandau-tandau di matau-aghi, di bulan ngan bintang-bintang. Di deniau bangsau-bangsau ka penakut ngan bingung ngadapi muni umbak laut.

²⁶ Manusiau ka takut kematila, karnau setu diau ka tejadi di gegalau deniauni, karnau kuasau langit ka kacau-balau.

²⁷ Masau itula jemau ka nginak Anak Manusiau datang dalam aban ngan kuasau ngan terang besak.

²⁸ Amun gegalaunyautu mulai tejadi, bangunla ngan katangka palak kamu, karnau jerang agi kamu ka diselamatka.”

Ceritau batang aghau

²⁹ Mangku Yesus ngiciakka ngan ughangtu cuntau ini, katauNyau, “Kina'ila batang aghau ngan gegalau batang lain.

³⁰ Amun di batang itu mulai kina'an daun mudau, kamu keruan, bansau laka musim panas.

³¹ Luak itu pulau, amun kamu nginak gegalaunyautu tadi tejadi, kamu ka keruan, bansau nidau lamau agi Allah ka merinta luak rajau.

³² Keruanila, gegalaunyautu ka tejadi, antak ka jemau mbak kini mati galau.

³³ Langit ngan deniau ka lengit, tapitu kici'anku nidau ka lengit, ka tetap selelamaunyau.”

Sepepadaula ngan maju bedu'a

³⁴ “Sepepadaula, jangan kamu banyak merupuakka kerjau deniauni, jamu-jamuan ngan memabu'an, mangku aghi Tuhan jangan ndatangi kamu endiak keruan. Karnau luak kenau perangkap,

³⁵ aghitu ka datang njenguak gegalau jemau di deniauni.

³⁶ Sepepadaula ngan maju bedu'a, mangku kamu kuat ngadapi gegalaunyau diau ka tejaditu, mangku kamu pacak ngadap Anak Manusiau.”

³⁷ Yesus ngajagh di Ghuma Allah aghi siang, mangku malamau Diau ngeluagh pegi ke Bukit Saitun ngan mendam di situ.

³⁸ Idang akap banyak jemau datang ke Ghuma Allah endak ndengaghka Yesus ngajagh.