LUKAS 17 - PEJANJIAN EMPAI CERITAU ILUAK

Jangan nyesatka jemau lain

¹ Yesus ngiciak ngan anak-buaHau, katauNyau, “Cetau ka adau jemau diau mbuat jemau lain bedusau. Anyautu celakaula jemau diau ngerjaukanyau.

² Iluakla batu besak digerintungka di liaghau, mangku dicapakka dalam laut, sangkan nyesatka sala sughang jemau diau litak.

³ Karnau itu, sepepadaula!” “Amun kantin kaba mbuat dusau, tegughila diau. Amun diau ngubai jak di dusaunyau, ma'apkala diau.

Ma'apkala kantin kaba

⁴ Lagi amun diau mbuat sala ngan kaba tujua kali saghi, mangku tujua kali diau datang njenguak kaba ngan bekatau, ‘Ma'apkala aku, aku la besala,’ kaba mesti ma'apka diau.”

Kuasau iman

⁵ Mangku rasul-rasul mintak ngan Tuhan, “Teguakala iman kami.”

⁶ Tuhan nimbal, “Misalau kamu adau iman sebesak mulan sawi ajau, kamu pacak ngiciak ngan batang besak ini, ‘Tecabutla mangku tetanamla di laut,’ mangku diau na'atinyau.”

Tugas sughang anak-bua

⁷ “Misalau sughang jak di kamu adau budak diau ngerjauka sawa ngan nyayia bebiri. Amun budaktu baliak jak di sawa ngan jak di padangan, apu kamu ka ngiciakka, ‘Mela, makan!’?

⁸ Cengki nidau! Tapitu kamu ka bekatau, ‘Tepiakkala makanan batan endak aku. Surumla baju diau beresia, nepi'i aku, penarau aku makan. La udim itu kabatu makan.’

⁹ Cengki budaktu nidau nanti dipuji, karnau diau cuman nuruti perinta tuanau.

¹⁰ Luak itu pulau kamu. Amun kamu la ngerjauka gegalaunyau diau la diajungka ngan kamu, kiciakkala, ‘Kamini anak-bua biasau. Kami cuman ngerjauka setu diau diajungka ngan kami.’ ”

Yesus meghadui sepulua ughang buidapan ja'at

¹¹ Yesus dang bejalan ngancamka Yerusalim, Diau melalui entaghau Samaria ngan Galilia.

¹² Yesus dang masuak sebua dusun, Diau didatangi sepulua ughang buidapan ja'at. Ughangtu betegak jak di jawua,

¹³ mangku tegauk, “Ui, Guru, Yesus, sialkala kamini!”

¹⁴ Satu Yesus nginak ughangtu, Diau bekatau, “Pegila, ancakkala badan kamu ngan imam.” Ughangtu dang di jalan, idapannyau ghadu.

¹⁵ Sughang jak di ughangtu, satu nginak diau la ghadu, ngelipat ngan ngagungka Allah.

¹⁶ Mangku diau nunduak di adapan Yesus ngan beterimau-kasia ngan Diau. Jemau itu jemau Samaria.

¹⁷ Yesus bekatau, “Ukanau tadi sepulua ughang diau dighaduka? Di manau diau sembilan agi?

¹⁸ Ngapau cuman jemau asing ini diau ngelipat beterimau-kasia ngan Allah?”

¹⁹ Mangku Diau bekatau ngan jemau tadi, “Betegakla, bejalanla. Kaba ghadu karnau percayau.”

Masau Allah datang endak merinta

²⁰ Adau jemau Parisi betanyau ngan Yesus, “Kebilau Allah endak merinta?” Yesus nimbal, “Amun Allah merinta, nidau kina'an ngan jemau,

²¹ lagi pulau jemau nidau pacak bekatau, ‘Mela nginak, ini diau!’ ngan ‘Di situ diau!’, karnau Allah la mulai merinta di guak kapu dighi.”

²² Udim itu Yesus bekatau ngan anak-buahau, “Ka sampai masaunyau kamu endak nginak saghi jak di aghi-aghi Anak Manusiau, anyautu kamu nidau pacak ngina'au.

²³ Nantitu jemau ka ngiciakka ngan kamu, ‘Kina'i di sini! Kina'i di situ!’ Jangan pegi! Jangan ngikuti jemautu!

²⁴ Karnau luak kilat diau besinagh jak di ujung ke ujung, luak itula nanti, amun Anak Manusiau ka datang.

²⁵ Anyautu Diau mesti banyak penanggungan kudai ngan nidau diterimau jemau mbak kini.

²⁶ Amun Anak Manusiau datang nanti, deniau ka semegi ngan saman Nua:

²⁷ Jemau makan ngan minum, nika ngan dinikaka, enggut Nua masuak perawu besak, mangku ayiak merampus ngan jemau mati galau.

²⁸ Luak itu pulau timpau saman Lut: Jemau makan-minum, njual-beli, nanam ngan negakka ghuma.

²⁹ Anyautu satu Lut ngeluagh jak di Sudum, aghi itu ujan api ngan belirang tughun jak di langit, mangku jemau mati galau.

³⁰ Luak itula pulau nanti, masau Anak Manusiau dinyatauka.

³¹ Aghi itu jemau diau dang duduak di berendau jangan masuak ke dalam endak ngambiak dandanannyau diau di dalam ghuma. Luak itu pulau jemau diau dang di sawa jangan baliak ke dusun.

³² Ingatkala ceritau bini Lut!

³³ Jemau diau beusaha ngilakka nyawaunyau ka kelengitan nyawaunyau. Anyautu jemau diau kelengitan nyawaunyau ka nyelamatkanyau.

³⁴ Percayaula, malam itu adau ughang duau dang tiduak sekatil, diau sughang ka dibata'i, diau sughang agitu ka ditinggalka.

³⁵ Adau tinau ughang duau dang nutuak ghebuak setabangan, diau sughang ka dibata'i, diau sughang agi ka ditinggalka. [

³⁶ Adau ughang duau dang ngerjauka sawa, diau sughang ka dibata'i, diau sughang agi ka ditinggalka.]”

³⁷ Anak-buahau betanyau ngan Yesus, “Tuhan, di manau titu tejadi?” Yesus nimbal, “Di manau adau buntang di situ adau anjing.”