KULUSI 1 - PEJANJIAN EMPAI CERITAU ILUAK

¹ Jak di aku, Paulus, diau dijadika rasul Yesus Keristus karnau kendak Allah ngan pulau jak di kantin kitau Timutius.

² Batan endak umat Allah diau percayau ngan Keristus di Kulusi. Kami bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai.

Du'a terimau-kasia

³ Amun kami bedu'a ndu'aka kamu, kami maju beterimau-kasia ngan Allah, Bapak Tuhan kitau Yesus Keristus,

⁴ karnau kami la ndengagh ceritau kamu percayau ngan Yesus Keristus ngan kamu nyayangi gegalau umat Allah.

⁵ Kamu ngerjauka titu, karnau kamu ngaghapka setu diau disediauka Allah batan endak kamu di sergau. Kamu la ndengagh titu, masau ceritau iluak diau benagh dikiciakka ngan kamu.

⁶ Ceritau iluak jak di Allahtu la tesiar di gegalau deniau, mangku ngenjuakka setu diau iluak ngan jemau. Luak itu pulau kamu, jak kamu empai ndengagh ceritautu senitu ngan nerimau keilu'an Allah ngenian.

⁷ Gegalaunyautu la dikiciakka Ipapras ngan kamu. Diautu kantin sekerjau kami diau kami sayangi. Diau rajin bekerjau batan endak Keristus endak nulung kamu.

⁸ Jak di diautu kami ndengagh ceritau kamu sangi sayangi ngan kuasau Rua Allah.

⁹ Itula sebapau jak ndengagh ceritau kamu, kami maju ndu'aka kamu. Kami mintak ngan Allah, supayau kamu dienjuakka pengertian endak ngeruani kendak Allah nian.

¹⁰ Mangku kamu pacak idup nurut kendak Allah ngan maju melemakka atiAu, mangku ngan tuapau kila kamu pacak ngerjauka diau iluak ngan tamba ngeruani setu diau benagh ceritau Allah.

¹¹ Mangku kamu diteguaka ngan kuasau Allah diau agung endak nanggungka gegalaunyau ngan ngaligh ngan riang.

¹² Mangku kamu beterimau-kasia ngan Allah Bapak, karnau Allahtu njadika kamu pantas nerimau setu diau disediaukaNyau batan endak umatAu di bada diau terang.

¹³ Diautu la ngilakka kitau jak di kuasau iblis mangku ngaliaka kitau dalam kuasau Ana'Au diau disayangi.

¹⁴ Karnau Diau kitau la ditebus, retiau dusau kitau la diabiska.

Kerjau Keristus

¹⁵ Keristus itu gambaran diau nyatau jak di Allah diau nidau kina'an. Diau anak tuau, pentingla Diau sangkan gegalaunyau diau dijadika.

¹⁶ Allah ngajung Diautu njadika gegalaunyau diau adau di sergau ngan di deniau, empuak diau kina'an empuak diau nidau kina'an, lagi pulau gegalau rua diau bekuasau ngan merinta. Gegalaunyautu dijadika karnau Keristus batan endak Keristus.

¹⁷ Antak ka gegalaunyau adau, Keristus la adau, ngan pulau gegalaunyau adau karnau Diau.

¹⁸ Diautu kepalak jemau Keristen. Diautu anak tuau diau dulu sekali ngulang idup jak di mati, mangku pentingla Diau sangkan gegalaunyautu.

¹⁹ Gegalau sipat Allah adau galau di Diau.

²⁰ Mangku karnau Diau, Allah ndamaika ngan diriAu gegalaunyau diau adau di sergau ngan di deniau. Allah ngerjauka titu ngan carau Ana'Au mati di kayu salip.

²¹ Senitu kamu jawua jak di Allah. Kamu melawan Diau, karnau perembak ngan rupu'an kamu ja'at.

²² Mbak kini kamu la seilu'an ngan Diau karnau Ana'Au mati. Ngan carau itu kamu pacak dibatak ngadap Allah ngan ati beresia, nidau bediau sala ngan nidau becelakau.

²³ Karnau itu kamu mesti maju percayau ngan tegua, jangan sampai ninggalka aghapan diau dienjuakka ngan kamu, masau kamu ndengagh ceritau iluak. Ceritau itu la dikiciakka ngan gegalau deniau. Batan endak itula aku, Paulus, bekerjau.

Kerjau Paulus batan endak jemau Keristen

²⁴ Mbak kini aku riang sengsarau batan endak kamu. Mangku ngan sengsarautu aku nepati di badanku setu diau lum ditanggung Keristus batan endak jemau Keristen. Ughangtu umpamau badanAu.

²⁵ Allah ngajung aku bekerjau batan endak jemau Keristen endak ngiciakka gegalau ceritau iluak ngan kamu.

²⁶ Ceritautu diresiauka Allah buabad-abad, mbak kini la dinyatauka ngan umatAu.

²⁷ Allah endak, supayau ughangtu keruan ceritau diau diresiaukaNyautu iluak ngan agung nian batan endak gegalau manusiau. Resiaunyau ini: Keristus adau di ati kamu, mangku kamu adau aghapan bulia ngikut meghasauka keagunganNyau.

²⁸ Diau itula kami kiciakka ngan bilang jemau, amun kami ngingatka ngan ngajagh ughangtu ngan pengertian, mangku bilang jemau njadi sempernau karnau seghundak ngan Keristus.

²⁹ Batan endak itula aku bekerjau mati-matian. Aku beusaha ngan gegalau tenaga diau dienjuakka Keristus ngan aku diau kuat bekerjau di aku.