IPISUS 6 - PEJANJIAN EMPAI CERITAU ILUAK

Carau idup anak-beghanak

¹ Budak keciak ta'atila pejadi kamu, luak diau pantas kamu kerjauka karnau percayau ngan Keristus.

² “Regauila pejadi kamu.” Ini perinta diau dulu sekali adau janji.

³ Janjiau luak ini, “mangku kamu riang ngan umur panjang di deniau.”

⁴ Kamu diau la njadi bak, jangan kamu mbuati anak kamu njadi mara. Anyautu besakkala diau njadi ta'at ngan ajaghan Tuhan.

Carau idup budak ngan tuanau

⁵ Kamu, budak-budak, ta'atila perinta tuan kamu diau adau di deniauni ngan takut. Kerjaukala titu ngenian, luak ta'at ngan Keristus.

⁶ Jangan ajau, amun dikinak, endak dipuji manusiau, tapitu luak budak Keristus diau na'ati kendak Allah ngan riang.

⁷ Kerjaukala kerjau kamu ngan ati riang luak jemau diau bekerjau batan endak Tuhan ukan batan endak manusiau.

⁸ Ingatkala, bansau bilang jemau, empuak budak empuak ukan budak, ka nerimau balasan jak di Tuhan, amun diau ngerjauka setu diau iluak.

⁹ Kamu, tuan-tuan, mesti luak itu pulau ngan budak-budak kamu. Jangan ngancam. Ingatkala, bansau Tuhan kamu ngan Tuhan ughangtu adau di sergau. Diau nidau milia rupau.

Pakaian jak di Allah

¹⁰ Mangku kamu mesti tegua dalam Tuhan ngan kuasau jak di Tuhan.

¹¹ Kenaukala gegalau pakaian diau dienjuakka Allah ngan kamu, mangku kamu pacak ta'an melawan tipuan iblis.

¹² Kitau bejuang ukan melawan manusiau, anyautu melawan kekuatan iblis diau nguasaui masau diau ja'at ini. Kitau melawan kekuatan rua ja'at diau nguasaui awang-awang.

¹³ Karnau itu kenaukala gegalau pakaian jak di Allah, mangku masau diau ja'at kamu pacak melawan serangan musua. Mangku amun kamu la bejuang enggut pengabisan, kamu nidau mundur.

¹⁴ Kamu mesti maju siagau. Kenaukala ceritau Allah diau benagh njadi bebat ngan kerjau diau benagh njadi baju besi kamu.

¹⁵ Kesukauan ngiciakka ceritau iluak diau ndamaika njadi sepatu kamu.

¹⁶ Pakaila iman kamu njadi penangkis. Ngan imantu kamu pacak madamka pana buapi jak di iblis.

¹⁷ Ambiakla keselamatan njadi tupi besi ngan katau Allah njadi pedang diau dienjuakka Rua Allah.

¹⁸ Kerjaukala gegalaunyautu sampai bedu'a mintak tulung ngan Allah. Di gegalau kerjau kamu bedu'ala luak Rua Allah mimpin kamu. Kamu mesti maju siagau ngan jangan nyera. Du'akala maju gegalau umat Allah.

¹⁹ Du'akala pulau aku, supayau amun aku ngiciak, Allah ngenjuakka aku katau diau tepat, mangku aku ngiciakka resiau ceritau iluak ngan beghani.

²⁰ Aku njadi ajungan batan endak ceritau iluak itu, mbak kini aku dalam jil. Du'akala aku, mangku aku beghani ngiciakka ceritau iluaktu, luak aku mesti ngiciakkanyau.

Pesan pengabisan

²¹ Tikikus, kantin kitau diau ngelapan bekerjau batan endak Tuhan, ka ngiciakka ceritau aku ngan kamu, mangku kamu keruan luak manau ngan aku.

²² Batan endak itula aku ngajung diau njenguak kamu, mangku kamu keruan ceritau kami, mangku ati kamu riang.

²³ Aku bedu'a, supayau Allah Bapak ngan Tuhan kitau Yesus Keristus ngenjuakka damai ngan kamu gegalau jemau Keristen, ngan nulung kamu sangi sayangi ngan maju percayau.

²⁴ Aku bedu'a, supayau Allah iluak ngan gegalau kamu diau nyayangi Tuhan kitau Yesus Keristus ngan sayang diau nidau ka abis-abis.