IPISUS 4 - PEJANJIAN EMPAI CERITAU ILUAK

Jemau percayau umpamau badan Keristus

¹ Itula sebapau, aku sughang kawalan diau dikawalka karnau bekerjau batan endak Tuhan. Mangku aku mintak nian, supayau kamu diau la dipilia Allah idup sesuai ngan piliantu.

² Kamu mesti maju ngensian, iluak, ngaligh, sangi sayangi ngan sangi terimau.

³ Usahakala nian idup bedamai, supayau kesatuan diau dienjuakka Rua Allah nidau beghuba.

⁴ Cuman adau sutiak badan ngan sutiak Rua. Luak itu pulau kamu dipilia batan endak ngaghapka setu diau semegi.

⁵ Tuhan gi sughang, iman semecam, baptisan semecam.

⁶ Allah gi sughang pulau diau njadi Bapak gegalau jemau. Diautu nguasaui gegalaunyau, bekerjau di gegalaunyau ngan adau di gegalaunyau.

⁷ Kitau sesughangan dienju'i pengenjuak nurut kendak Keristus.

⁸ Dalam Injil ditulis, “Masau Diau nayiak ke bada diau tinggi sekali, Diau banyak mbatak kawalan. Diau ngenjuakka pengenjuak ngan manusiau.”

⁹ Tuapau retiau, “Diau nayiak”? Titu bereti Diau pulau tughun ke bada diau endap sekali di deniauni.

¹⁰ Diau la tughun, mangku Diautu pulau la nayiak ke bada diau tinggi nianan jak di gegalau langit, mangku Diau adau di gegalaunyau.

¹¹ Mangku tuapau retiau, “Diau ngenjuakka pengenjuak ngan manusiau”? Adau diau dipilia njadi rasul, adau diau njadi nabi. Adau diau dipilia ngiciakka ceritau iluak. Adau diau dipilia mimpin jemau Keristen, adau pulau diau ngajagh jemau Keristen.

¹² Gegalaunyau dikerjaukaNyau, supayau umat Allah didandani galau, mangku pacak bekerjau batan endak Tuhan, mangku badan Keristus, diautu jemau percayau, diteguaka.

¹³ Ngan carau luak itu gegalau kitau njadi seghundak, karnau kitau semegi percayau ngan Keristus ngan ngeruani diau benagh ceritau Anak Allah. Mangku kitau njadi jemau percayau diau la wagat diau tamba lamau tamba sempernau luak Keristus.

¹⁴ Mangku kitau ukan agi luak budak keciak diau diumbang-ambingka ngan dibatak ke situ ke sini karnau bemecam-mecam ajaghan jak di jemau diau cak calak. Ughangtu nyesatka jemau ngan tipuan.

¹⁵ Anyautu kitau mesti nyatauka setu diau benagh ngan maju sangi sayangi. Mangku gegalau kitau tamba lamau tamba sempernau luak Keristus diau ngepala'i kitau.

¹⁶ Diautu mimpin kitau galau, mangku gegalau badan tesusun iluak ngan sendi-sendi tesusun pulau. Mangku amun bilang anggutatu bekerjau ngan semestiau, gegalau badantu ka tumbua ngan diteguaka njadi wagat karnau sangi sayangi.

Idup empai seghundak ngan Keristus

¹⁷ Karnau itu demi namau Tuhan aku mintak nian, supayau kamu jangan agi idup luak jemau diau nidau keruan Allah ngan maju merupuakka setu diau nidau begati.

¹⁸ Rupu'an ughangtu la nyimpang. Ughangtu nidau meghasauka idup diau dienjuakka Allah, karnau ughangtu bigal ngan melawan.

¹⁹ Ughangtu nidau meghasau maluan agi, mangku ughangtu nuruti gegalau serilau ngan idup kumua sekendak atiau.

²⁰ Anyautu Keristus diau kamu keruani ukan luak itu.

²¹ Kamu la ndengagh ceritau Diau. Kamu la njadi anak-buaHau, la diajagh ceritau sipat Allah diau adau di Diau.

²² Karnau itu capakkala manusiau lamau ngan carau idup senitu diau dirusakka serilau diau sesattu.

²³ Ati ngan rupu'an kamu mesti beghuba njadi empai galau.

²⁴ Kamu mesti njadi manusiau empai diau dijadika nurut gambaran Allah mangku idup ngan carau diau benagh ngan beresia.

²⁵ Karnau itu, jangan agi mbu'ung. Kiciakkala diau benagh sughang ngan diau lain, karnau kitau angguta badan Keristus galau.

²⁶ Amun kamu mara, jangan enggut bebuat dusau. Jangan mara sesaghian,

²⁷ mangku iblis nidau pacak mbuat kamu bedusau.

²⁸ Jemau diau pemaling jangan agi maling. Diau mesti bekerjau nian, mangku bulia pengidupan diau benagh ngan pacak nulung jemau diau kurangan.

²⁹ Jangan kiciakka kici'an kumua. Kiciakkala katau diau meriangka ngan nulung jemau. Kici'an luak itu nimbulka keilu'an ngan jemau diau ndengaghau.

³⁰ Jangan madakka Rua Allah. Kamu la ditandaui ngan Ruatu njadi hak Allah. Ruatu njadi jaminan batan endak kitau, bansau aghi kitau diselamatka ka sampai.

³¹ Lengitkala gegalau peghasauan purik, mara ngan dendam. Jangan tegauk-gauk ngan nggelakka. Jangan agi adau peghasauan luat ngan peghasauan diau ja'at lainau.

³² Anyautu kamu mesti iluak, sial, sangi sayangi ngan sangi ma'apka luak Allah ngampuni kamu karnau Keristus.