IPISUS 3 - PEJANJIAN EMPAI CERITAU ILUAK

Kerjau Paulus batan endak jemau ukan Yahudi

¹ Itula sebapau akuni, Paulus, dijilka karnau Yesus Keristus batan endak kepentingan kamu diau ukan jemau Yahudi.

² Cengki kamu la ndengagh, bansau Allah la nugaska aku bekerjau batan endak kamu karnau keilu'an atiAu.

³ Allah la nyatauka resiau rencanauNyau ngan dikiciakka ngan aku. Ceritau itu tadi la kutuliska dikit.

⁴ Amun kamu mbacaunyau, kamu ka keruan resiau Keristus luak aku ngeruaninyau.

⁵ Timpau senitu resiautu nidau dikiciakka ngan jemau, anyautu mbak kini la dinyatauka Rua Allah ngan rasul-rasul ngan nabi-nabiAu.

⁶ ResiauNyau luak ini: karnau ceritau iluak itu, mangku jemau ukan Yahudi ngikut meghasauka keilu'an Allah, mangku njadi angguta badan diau semegi ngan nerimau setu diau dijanjika Allah karnau Yesus Keristus.

⁷ Allah ngenju'i aku kerjau endak nceritauka ceritau iluak, karnau Diau iluak ngan aku. Tugastu dienjuakka ngan aku karnau kuasauNyau diau neguaka aku.

⁸ Jak di umat Allah diau inau akuni diau inau sekali. Anyautu Allah la nunjuakka keilu'anNyau ngan aku. Diau pulau ngenjuakka ngan aku kerjau iluaktu endak ngiciakka ngan jemau ukan Yahudi ceritau iluak ngiciakka keilu'an Yesus Keristus diau nidau ka abis-abis.

⁹ Diau pulau nugaska aku ngiciakka ngan gegalau jemau, luak manau Allah diau njadika gegalau deniauni ngerjauka rencanauNyau diau diresiauka senitu.

¹⁰ Diau ngerjauka titu, supayau mbak kini jak di jemau Keristen gegalau pengulu ngan penguasau di awang-awang ka ngeruani gegalau pengertian Allah.

¹¹ RencanauNyau la adau jak di penembai, mangku diajungAu Yesus Keristus, Tuhan kitau, ngerjaukanyau.

¹² Karnau kitau percayau ngan Keristus ngan seghundak ngan Diau, mangku kitau beghani ngiciak ngan Allah, karnau kitau percayau nian.

¹³ Karnau itu aku mintak nian, supayau kamu jangan ghegak karnau sengsarauku batan endak kamu. Gegalaunyautu batan endak keilu'an kamu.

Du'a Paulus

¹⁴ Itula sebapau aku nunduak di adapan Bapak di sergau.

¹⁵ Jak di Diau bilang pemili di sergau ngan di deniau nerimau namau sesughangan.

¹⁶ Aku bedu'a, supayau Allah diau kayau ngan agung sekali neguaka ati kamu ngan RuaHau.

¹⁷ Mangku ati kamu njadi bada Keristus karnau kamu percayau ngan Diau, mangku gegalau kerjau kamu dikerjauka karnau nyayangi.

¹⁸ Aku bedu'a, supayau kamu ngan gegalau umat Allah pacak ngeruani alaka libaghau ngan panjangau ngan tinggiau ngan dalamau sayang Keristus.

¹⁹ Mangku kamu meghasauka sayang itu, empuak nidau pacak dikeruani rupu'an manusiau. Mangku kamu dibimbingAu idup menau carau Allah,

²⁰ karnau kuasau Allah bekerjau dalam ati kitau. Banyak tegalau dikerjauka Allah sangkan diau pacak kitau du'aka ngan rupuakka.

²¹ Allah mesti maju diagungka jemau Keristen karnau Yesus Keristus. Tepujila Allah enggut selelamaunyau. Nyela nian. Amin.