IBRANI 9 - PEJANJIAN EMPAI CERITAU ILUAK

Bada diau suci di deniau ngan di sergau

¹ Janji diau dulu adau carau sembayang ngan bada sembayang diau dibuat jemau.

² Adau kima ditegakka, mangku bagian mukau dikiciakka Bada Suci. Di situ adau tiang lampu ngan mija ngan ruti enju'an batan endak Allah.

³ Bagian dalam di baling tabir adau bada diau dikiciakka Bada Mahasuci.

⁴ Di bada itu adau mija bekerban jak di emas bada nyilapka keminyan. Mangku adau pulau Peti Pejanjian diau dilapisi emas galau. Dalam petitu adau guci emas buisi Mana, ruti jak di sergautu, ngan tungkat Harun diau la betunas, mangku pulau duau bua batu tulis diau ditulisi perinta Allah.

⁵ Di pucu'au adau duau kerub, benatang sergau diau nunjuakka keagungan Allah. Benatangtu adau sayap diau nukupi peti tadi, bada ngabiska dusau. Gegalaunyautu nidau pacak kitau kiciakka mbak kini ngan neghagi.

⁶ Luak itula gegalaunyautu diatur. Idang aghi imam masuak ke bada suci kimatu endak ngerjauka tugasau.

⁷ Diau masuak ke bada diau dalam sekali di kimatu Imam Besak, cuman sekali ajau setaun. Titu dikerjaukanyau ngan mbatak dagha diau dienjuakka ngan Allah batan endak diriau ngan umatau endak ngabiska dusau diau nidau disajauka.

⁸ Ngan carau luak itu Rua Allah nyatauka, bansau jalan masuak ke bada diau Mahasucitu lum tebukak, selamau bada sebela mukau kimatu gi adau.

⁹ Titu nggambarka masau mbak kini. Retiau bansau enju'an ngan kerban benatang diau dikerbanka ngan Allahtu nidau pacak mberesiaka ati ngan sempernau jemau diau ngerbankanyau.

¹⁰ Gegalaunyautu cuman ngiciakka makanan minuman ngan mecam-mecam carau mberesiaka diriau, cuman peraturan di luagh ajau diau dikerjauka enggut Allah mbuat gegalaunyau empai.

Dagha Keristus

¹¹ Anyautu Keristus la datang njadi Imam Besak batan endak setu diau iluak diau ka datangtu. Kima Tuhan, bada Diau ngerjauka tugasAutu, lebia agung ngan lebia sempernau. Kimatu nidau dibuat manusiau, retiau asalau ukan jak di deniauni.

¹² Diautu masuak ke dalam kimatu di bada diau suci sekali cuman sekali ajau. Masau itu Diau mbatak dagha Diautula, ukan dagha kambing lanang, ukan dagha sapi diau endak dikerbanka. Mangku ngan daghaHautu Diau mbibaska kitau selelamaunyau.

¹³ Dagha kambing ngan sapi lanang ngan abu kerban sapi mudau dipakai endak megheci'i jemau najis, endak dibasua mangku beresia. Amun dagha ngan abutu pacak mberesiaka jemau di luagh nurut peraturan agamau,

¹⁴ apau agi dagha Keristus. Karnau Rua diau selelamaunyau Keristus nyeraka diriAu njadi kerban diau nidau becacat batan endak Allah. DaghaHautu mberesiaka ati kitau jak di kerjau diau nidau begati, mangku kitau pacak nyemba Allah diau idup.

¹⁵ Karnau kerjau Keristustu Allah mbuat pejanjian diau empai, mangku jemau diau la dipilia Allah pacak nerimau setu diau la dijanjikaNyautu. Keristus la mati endak mbibaska jemau jak di salahau diau dibuat masau pejanjian diau dulu masia dipakai.

¹⁶ Amun adau surat peninggalan, mesti adau pulau buktiau, bansau jemau diau mbuatautu la mati.

¹⁷ Surattu nidau belaku, masau jemau diau mbuatau gi idup. Surattu cuman pacak dipakai, amun jemaunyau la mati.

¹⁸ Itula sebapau pejanjian diau dulu pulau disahka ngan dagha.

¹⁹ Musa ngiciakka gegalau perinta Allah ngan jemau Israil. Udim itu diau ngambiak dagha anak sapi ngan dagha kambing lanang diundakka ngan ayiak, mangku dipegheciakka di kitab ukum Taurat ngan di gegalau jemau Israil pakai ghumput isup ngan bulu bebiri abang,

²⁰ sampai bekatau, “Inila dagha diau ngesahka pejanjian Allah batan endak kamu diau mesti kamu turuti.”

²¹ Mangku kima ngan gegalau dandanan diau dipakai endak sembayang dipegheci'i ngan dagha carau luak itu.

²² Nurut ukum Taurat ampir gegalaunyau diberesiaka ngan dagha. Mangku dusau cuman pacak diabiska, amun adau dagha ditumpaka.

²³ Gegalaunyautu nggambarka setu diau adau di sergau, mangku mesti diberesiaka ngan carau luak itu tadi. Anyautu setu diau adau di sergau ngan kerban diau lebia iluak jak di itu.

²⁴ Keristus nidau masuak ke bada suci diau dibuat manusiau diau cuman gambar jak di bada suci diau sebenaghau. Diautu masuak sergau nian, mangku mbak kini Diau ngadap Allah batan endak kepentingan kitau.

²⁵ Idang taun imam besak masuak ke bada diau suci sekali mbatak dagha benatang. Tapitu Keristus masuak ngerbanka diriAu ukan beulang-ulang.

²⁶ Misalau Keristus semegi ngan imam besak tadi, bereti jak deniau dijadika Diau mesti rajin sengsarau. Anyautu tenyatau mbak kini masau pengabisan ini Diau datang sekali ajau endak ngabiska dusau ngan carau ngerbanka diriAu.

²⁷ La ditetapka, bansau manusiau mati cuman sekali ajau, udim itu diadili.

²⁸ Luak itu pulau Keristus ngerbanka diriAu cuman sekali ajau endak ngabiska dusau banyak jemau. Mangku Diau ka datang agi ukan endak nanggungka dusau agi, tapitu endak nyelamatka jemau diau nunggu Diau datang.