IBRANI 7 - PEJANJIAN EMPAI CERITAU ILUAK

Imam Melkisidik

¹ Melkisidiktu rajau kuta Salim ngan imam Allah diau Mahabesak. Masau Abraham baliak jak di perang ngalaka rajau-rajau, Melkisidiktu datang nyungsung diau endak ndu'aka diau,

² mangku dienjuakka Abraham bagi sepulua sebagi jak di gegalaunyau diau dighebutinyau. Reti namau Melkisidiktu rajau keadilan, mangku pulau rajau damai, karnau diau rajau Salim.

³ Diautu nidau bediau bak ngan mak ngan nidau bediau pengadau. Nidau pulau keruan, kebilau diautu adau, kebilau diau mati. Diautu luak Anak Allah, imam selelamaunyau.

⁴ Kitau nginak, pangkatautu tinggi nian. Mangku Abraham, niniak puyang kitau, ngenjuakka ngan diau bagi sepulua sebagi jak di gegalau retau bendau diau dighebutinyautu diau beregau sekali.

⁵ Dalam ukum Taurat ditetapka, bansau pengadau Liwi diau njadi imam mesti nerimau bagi sepulua sebagi jak di pulian jemau Israil, empuak ughangtu denga-sanak, pengadau Abraham galau.

⁶ Melkisidiktu ukan pengadau ughangtu. Anyautu diau nerimau bagi sepulua sebagi jak di Abraham ngan ndu'akanyau, empuak Abrahamtu la nerimau janji jak di Allah.

⁷ Nyela nian, jemau diau ndu'aka lebia tinggi pangkatau jak di jemau diau didu'akatu.

⁸ Biasaunyau imam diau nerimau bagi sepulua sebagi cuman manusiau diau ka mati. Tapitu nurut Injil, Melkisidik diau nerimau bagi sepulua sebagitu maju idup.

⁹ Mangku pacak dikiciakka, bansau Liwi diau nerimau bagi sepulua sebagi jak di jemau Israil, ngenjuakka pulau bagi sepulua sebagi masau Abraham ngenjuakkanyautu.

¹⁰ Empuak Liwi lum adau, bulia dikiciakka la adau dalam badan Abraham, puyangautu, masau Abraham betemu ngan Melkisidik.

Yesus luak imam Melkisidik

¹¹ Karnau imam-imam Liwi ukum Taurat dienjuakka ngan jemau Israil. Anyautu imamtu nidau pacak ngerjaukanyau ngan sempernau. Karnau itu mesti adau imam lain diau nurut carau imam Melkisidik, ukan jak di rumbungan Harun.

¹² Mangku amun kedudukan imamtu beghuba, ukum Taurat mesti beghuba pulau.

¹³ Diau dikiciakkatu Tuhan kitau. Diau jak di jungku lain. Nidau sughang kiala jak di jungku itu diau la njadi imam.

¹⁴ La keruan galau, bansau Tuhan kitau asalau jak di pengadau Yahudi, mangku Musa nidau kekela ngiciakka jungku itu, masau diau ngiciakka ceritau imam.

¹⁵ Setu diau dikiciakkatu tamba jelas agi, karnau adau sughang imam lain nurut carau Melkisidik.

¹⁶ Diautu dijadika imam ukan karnau peraturan manusiau, tapitu karnau kuasauNyau ngan idupAu diau nidau ka abis.

¹⁷ Ceritaunyau la dikiciakka di Injil, “Kaba ka njadi imam selelamaunyau nurut carau Melkisidik.”

¹⁸ Peraturan diau lamau nidau dipakai agi, karnau nidau kuat ngan nidau begunau.

¹⁹ Ukum Taurattu nidau pacak nyempernauka. Mangku mbak kini kitau dienju'i aghapan diau lebia iluak agi, mangku kitau pacak masighi Allah.

²⁰ Lagi pulau gegalaunyautu diteguaka ngan sumpa Allah. Anyautu nidau bediau sumpa luak itu, masau imam-imam itu tadi ditetapka.

²¹ Yesustu ditetapka njadi imam pakai sumpa Allah, katauNyau ngan Diau, “Tuhan la besumpa, nidau ka beghuba agi, ‘Kabani imam selelamaunyau.’ ”

²² Ngan carau luak itu Yesus njadi jaminan pejanjian diau lebia iluak agi.

²³ Lagi imam diau laintu banyak, karnau ughangtu mati mangku nidau pacak neruska tugasau.

²⁴ Anyautu Yesus idup selelamaunyau, mangku tugasAu njadi imam nidau dienjuakka ngan jemau lain.

²⁵ Itula sebapau selelamaunyau Yesus pacak nyelamatka jemau diau masighi Allah, diantat ngan Diau. Diautu adau selelamaunyau endak mintak ngan Allah batan endak ughangtu.

²⁶ Imam Besak luak Yesus itula diau kitau perluka. Diautu beresia, nidau bediau sala ngan dusauNyau. Diau diasingka jak di jemau bedusau, mangku Diau ditinggika ke bada diau tinggi di sergau.

²⁷ Diautu nidau luak imam besak lain diau idang aghi bekerban ngan Allah karnau dusaunyau. Udim itu diau ngenjuakka kerban karnau dusau jemau. Yesustu ngenjuakka kerban cuman sekali ajau, masau Diau nyeraka diriAu njadi kerban.

²⁸ Ukum Taurattu senitu netapka jemau diau adau banyak kekilapan njadi imam besak. La udim itu Allah bejanji ngan sumpa, bansau Diau netapka Ana'Au njadi Imam Besak diau sempernau selelamaunyau.