IBRANI 3 - PEJANJIAN EMPAI CERITAU ILUAK

Pentingla Yesus sangkan Musa

¹ Kantin-kantinku jemau Keristen, kamu pulau dipilia Allah. Rupuakkala nian ceritau Yesus. Diautu diajung Allah njadi Imam Besak di agamau diau kitau percayaui.

² Diautu ta'at ngan Allah diau milia Diau endak bekerjau batan endak Diau, luak pulau Musa senitu ta'at ngerjauka tugasau di ghuma Allah.

³ Diregauila tukang negakka ghuma sangkan ghuma diau ditegakkanyautu. Luak itu pulau pantasla Yesus diregaui sangkan Musa.

⁴ Nyela bilang ghuma adau jemau diau mbuatau. Mangku diau mbuat gegalaunyau Allah itula.

⁵ Musatu pekerjau ghuma Allah diau ta'at. Diau ngiciakka setu diau ka dinyatauka Allah masau diau ka datang.

⁶ Tapi Keristus itu Anak diau ngepala'i ghuma Allahtu ngan ta'at. Mangku kitau inila ghuma Allah, amun kitau tegua ngan maju percayau ka bulia setu diau kitau aghapka.

Benasau karnau nidau percayau

⁷ Mangku luak la dikiciakka Rua Allah, “Amun kamu ndengagh suarau Allah mbak kini,

⁸ jangan ngeghaska ati luak niniak puyang kamu, masau ughangtu melawan Allah, nguji Allah di padang bungin.

⁹ ‘Di situ niniak puyang kamu ncubaui Aku, ngan carau nguji Aku, empuak ughangtu la nginak kerjauKu

¹⁰ empat pulua taun lamaunyau.’ Itula sebapau Aku mara ngan ughangtu ngan bekatau, ‘Ughangtu maju enggup ngikut Aku, maju enggup na'ati perintaKu.’

¹¹ Mangku Aku mara ngan besumpa, ‘Ughangtu nidau ka masuak ke nenggeritu, mangku nidau bulia gheghadu di badaKu.’ ”

¹² Kantin-kantinku, sepepadaula, supayau di guak kamu jangan adau sughang kiala diau mbuat ja'at ngan nidau percayau mangku ngelipat ninggalka Allah diau idup.

¹³ Anyautu sangi tegughila kamu idang aghi, semasau gi pacak dikiciakka “mbak kini”, supayau jangan adau jak di kamu diau ngeghaska atiau karnau ditipuka dusau.

¹⁴ Kitau la bulia bagian ngan Keristus, amun kitau maju tegua percayau enggut mati luak senitu.

¹⁵ Ini diau ditulis di Injil, “Amun mbak kini kamu ndengagh suarau Allah, jangan ngeghaska ati luak niniak puyang kamu, masau ughangtu melawan Allah.”

¹⁶ Sapau jemau diau la ndengagh suarau Allah, mangku mara ngan Diau? Apu ukan gegalau ughangtu dipimpin Musa ngeluagh jak di Mesir?

¹⁷ Mangku ngan sapau Allah mara selamau empat pulua taun? Apu ukan ngan jemau diau bedusau? Mangku ughangtu mati galau di padang bungin.

¹⁸ Masau itu Allah besumpa, “Ughangtu nidau ka masuak nenggeritu, nidau pulau pacak gheghadu di badaKu.” Mangku sapau diau dikiciakkatu? Apu ukan jemau diau nidau ta'attu?

¹⁹ Mbak kini kitau ngerti, bansau ughangtu nidau masuak karnau nidau percayau.