IBRANI 2 - PEJANJIAN EMPAI CERITAU ILUAK

Ceritau selamat diau hibat

¹ Itula sebapau kitau mesti meratika nian ajaghan diau la kitau dengagh, mangku kitau jangan ngikut anyut.

² Katau Allah diau la dikiciakka malaikat ngan niniak puyang kitau benagh nian, mangku jemau diau melanggarau ngan nidau ta'at diukum ngan ukuman diau setimpal.

³ Apau agi ngan ceritau selamat. Hibatla ceritau itu sangkan katau Allah tadi! Amun kitau nidau meratika nian ceritau selamattu, cetau kitau ka diukum. Tuhan itula diau dulu sekali ngiciakka ceritau selamattu, mangku jemau diau la ndengaghau senitu la mbuktika ngan kitau, bansau ceritautu benagh.

⁴ Lagi pulau Allah neguaka kici'an ughangtu ngan tandau nyelia ngan nyatauka kuasauNyau ngan ngenjuakka Rua Allah ngan jemau nurut kenda'Au.

Yesus mimpin kitau endak diselamatka

⁵ Ukan ngan malaikat Allah la ngenjuakka kuasau endak merinta deniau empai diau ka datang, deniau diau dang kitau kiciakka.

⁶ Di Injil ditulis luak ini, “Sapau sebenaghau manusiau, mangku Dighitula ngingatkanyau? Ughangtu cuman manusiau, anyautu Dighi nyanaukanyau.

⁷ Gi jerang ajau Dighi mbuat kuasaunyau kurang jak di kuasau malaikat. Mangku dienjuakka ngan diau pangkat tinggi diau agung ngan diregaui,

⁸ dienjuakka kuasau nguasaui gegalaunyau.” Amun dikiciakka gegalaunyau ka dikuasaui manusiau, itu bereti nidau bediau setu diau nidau dikuasauinyau. Anyautu mbak kini lum kina'an ngan kitau, bansau gegalaunyau dikuasauinyau.

⁹ Diau kitau kinak itu Yesus diau bekuasau. Gi jerang ajau kuasauNyau dibuat kurang jak di kuasau malaikat, supayau Diau sengsarau ngan mati batan endak gegalau manusiau, karnau Allah sayang ngan kitau. Mbak kini kitau nginak Diau la dienjuakka pangkat tinggi diau agung ngan diregaui, karnau Diau la sengsarau enggut mati.

¹⁰ Allah itu njadika gegalaunyau batan endak diriAu. Sepantasau Diau njadika Yesus sempernau ngan carau Diau sengsarau, mangku dibata'Au banyak jemau endak diagungka. Diautu pulau mbukak jalan mangku ughangtu selamat.

¹¹ Yesus diau mberesiaka jemau jak di dusaunyau ngan jemau diau diberesiakatu gi sughang Bapa'au, Diautu Allah. Itula sebapau Diau nidau maluan ngaku'i ughangtu ading-beghadingAu,

¹² katauNyau, “Aku ka ngiciakka ceritau Dighi ngan ading-beghadingKu. Aku ka ngagungka Dighi di guak umat Dighi.”

¹³ Lagi pulau, “Aku percayau nian ngan Allah.” Ngan pulau, “Inila Aku ngan anak-bua diau la dienjuakka Allah ngan Aku.”

¹⁴ Jemau diau dikiciakka anak-buaHautu manusiau diau ka mati. Mangku Yesus njadi semegi ngan jemau, idup luak jemau, mangku karnau Diau matitu Iblis diau nguasaui mauttu la dikalaka.

¹⁵ Ngan carau luak itu Diau mbibaska jemau diau seumur idup njadi budak karnau takut mati.

¹⁶ Mangku ngenian ukan malaikat diau disanaukaNyau, tapitu pengadau Abraham.

¹⁷ Itula sebapau Diau mesti njadi semegi nian ngan manusiau, mangku Diau njadi Imam Besak diau iluak ngan nyialka jemau ngan pacak dipercayaui, bekerjau batan endak Allah. Mangku dusau manusiau pacak diabiska.

¹⁸ Mangku mbak kini Diau pacak nulung jemau diau dicubaui, karnau Diau pulau la sengsarau ngan dicubaui.