IBRANI 12 - PEJANJIAN EMPAI CERITAU ILUAK

Majula percayau

¹ Mangku kitauni banyak nian cuntau, jemau diau percayau tadi. Karnau itu mela kitau pulau ncapakka gegalaunyau diau mbeghati kitau ngan dusau diau maju melekat ngan kitau. Mela kitau maju betanding ngan tekun petandingan diau kitau ikuti.

² Mela kitau ngerjauka titu ngan maju merupuakka Yesus. Diau itula mbuat kitau percayau, mangku Diautu pulau nulung kitau maju percayau. Yesustu ta'an sengsarau, nidau nyanauka, bansau mati di kayu saliptu setu diau maluka. Diau cuman ngingatka riang diau ka dighasaukaNyau nanti. Mbak kini Diau duduak di sebela kanan Allah.

³ Rupuakkala maju sengsarau Yesustu ngadap jemau bedusau diau melawan Diau ngan luat kematila, mangku kamu nidau tekedan ngan maju adau aghapan.

⁴ Kamu lum bejuang melawan jemau bedusau, lum enggut mati dibunua.

Allah itu bak kitau

⁵ Jangan kamu melupauka tegughan Allah diau dikiciakka ngan kamu diau njadi anak-ana'Au. “Ui anakKu, peratikala iluak-iluak ajaghan Tuhan. Jangan kaba keciak ati, amun ditengul Tuhan.

⁶ Karnau Tuhan ngajagh bilang jemau diau disayangiNyau. Diau mbaduk bilang jemau diau diaku'iNyau ana'Au.”

⁷ Terimaula badukan jak di Allah njadi ajaghan jak di bak, karnau nidau bediau sughang kia anak diau nidau diajagh ba'au.

⁸ Amun kamu nidau diajagh luak gegalau anak lain, bereti kamu ukan ana'Au nian, tapitu luak anak kampang.

⁹ Kitau adau bak di deniauni diau ngajagh kitau, mangku kitau meregauinyau. Apau agi Bapak kitau di sergau, cengki kitau mesti tunduak ngan Diau, supayau kitau idup.

¹⁰ Bak kitau di deniauni ngajagh kitau masau jerang ajau, nurut setu diau dighasauka iluak. Anyautu Allah ngajagh kitau batan endak keilu'an kitau, mangku kitau njadi beresia luak Diau.

¹¹ Nyela, amun kitau diukum, kitau nidau riang tapitu nangis. Anyautu ngan kitau diau la diajagh, ukumantu mbuat kitau idup nurut kendak Allah, mangku kitau idup ngan damai.

¹² Karnau itu tegangkala tangan kamu diau litak ngan palak entuat diau gemetaghtu!

¹³ Dataghkala jalan kamu, mangku keting kamu diau kincut nidau tegesur, tapitu tamba kuat.

Petua ngan peringatan

¹⁴ Beusahala idup damai ngan gegalau jemau. Idup kamu mesti beresia batan endak Tuhan. Nidau sughang kiala pacak nginak Tuhan, amun idupau nidau luak itu.

¹⁵ Jagauila, supayau jangan adau diau njawuaka diriau jak di keilu'an Allah, supayau jangan adau akagh diau beracun tumbua di guak kamu, mangku nimbul kekacauan ngan merusak banyak jemau karnau racunau.

¹⁶ Jangan adau diau menaugawia. Jangan adau diau nidau meregaui Allah luak Isau. Diautu anak tuau. Mangku diau njual ha'autu karnau cuman makanan sepiring ajau.

¹⁷ Kamu keruan, bansau udim itu diau endak didu'aka luak anak tuau, anyautu ditulak, nidau bediau agi jalan endak ngilu'i salahau, empuak mintak sampai nangis.

¹⁸ Kamu nidau ngadapi setu luak diau diadapi jemau Israil senitu. Ughangtu ngadapi setu diau pacak dikecakka ngan dighasauka, itula gunung Sinai ngan api besak diau maghaktu, keleman kakup ngan angin nyaghu,

¹⁹ muni terumpit ngan suarau nyaghing. Masau ughangtu ndengagh kici'annyau, ughangtu mintak nian, supayau jangan ngiciak agi ngan ughangtu.

²⁰ Ughangtu nidau ta'an ndengagh perinta ini diau dikiciakka suarau tadi, “Bilang jemau ngan benatang diau ngecakka gunung ini mesti disipati ngan batu enggut mati.”

²¹ Setu diau dikinak jemau Israiltu nakutka nian, mangku katau Musa, “Aku takut nian ngan gemetagh.”

²² Anyautu diau kamu adapitu bukit Siun ngan kuta Allah diau ngenjuakka idup, Yerusalim di sergau ngan beribu-ribu malaikatau.

²³ Kamu ngikut tunggalan diau riang nian, tunggalan anak-anak tuau diau namaunyau la ditulis di sergau. Kamu betunggal ngan jemau senitu diau la disempernauka. Kamu ngadap Allah, akim gegalau manusiau.

²⁴ Kamu ngadap Yesus diau mbuat janji empai ngan dipegheciakka dagha mangku njamin setu diau lebia iluak jak di dagha Abil.

²⁵ Karnau itu, sepepadaula, jangan adau diau enggup ndengagh diau ngiciaktu. Jemau diau enggup ndengaghka jemau diau ngiciakka katau Allah di deniauni nidau pacak melaghika diriau jak di ukuman. Apau agi kitau diau ndengaghka diau ngiciak jak di sergau. Amun kitau enggup ndengaghkaNyau, manau ka adau kitau nidau diukum.

²⁶ Masau itu adau gempau karnau suarauNyau. Anyautu mbak kini Diau bejanji, “Sekali agi ka adau gempau karnau Aku, ukan cuman di deniau, tapitu di langit pulau.”

²⁷ Katau tadi “sekali agi” nunjuakka, bansau gegalau deniau diau dijadikatu ka digugak ngan digentika, mangku ka tinggal setu diau nidau pacak digugak.

²⁸ Itula sebapau kitau mesti beterimau-kasia ngan Allah, karnau kitau la nerimau bada di manau Allah merinta diau nidau pacak diambiak jak di kitau. Kitau mesti meregaui ngan nyemba Allah ngan takut ngan carau diau dikenda'iNyau diau melemakka atiAu.

²⁹ Karnau Allah kitau luak api diau mutungka.