IBRANI 11 - PEJANJIAN EMPAI CERITAU ILUAK

Jemau diau percayau

¹ Amun percayau nian, kitau yakin nian ngan setu diau kitau aghapka, kitau yakin nian ngan setu diau nidau kitau kinak.

² Karnau percayau nian, jemau senitu diceritauka di Injil.

³ Karnau percayau, mangku kitau ngerti, bansau langit ngan deniau dijadika Allah ngan kici'anNyau, mangku setu diau kitau kinak dijadika jak di setu diau nidau kina'an.

⁴ Karnau percayau, mangku Abil ngenjuakka kerban ngan Allah diau lebia iluak jak di kerban Kain. Itula sebapau Abil diterimau Allah njadi jemau diau benagh, karnau Allah nerimau kerbanau ngan riang. Karnau percayau nian, diau maju ngiciak, empuak la mati.

⁵ Karnau percayau, mangku Inuk nidau mati. Diau tuangkat, dibatak guak Allah. Nidau sughang kia nginak diau agi, karnau la tuangkat. Antak ka diau tuangkattu, la dikiciakka, bansau diautu melemakka ati Allah.

⁶ Amun nidau percayau, nidau ka adau Allah riang ngan jemau. Karnau jemau diau datang ngadap Allah mesti percayau, bansau Allahtu adau, ngan ngenjuakka upa ngan jemau diau ndala'i Diau ngenian.

⁷ Karnau percayau, mangku Nua nerimau petunjuak jak di Allah ceritau setu diau ka jerang agi tejadi diau lum kina'an. Nuatu ta'at ngan Allah, mangku diau mbuat sebua kapal besak endak nyelamatka diriau ngan anak-biniau. Ngan carau luak itu Nua itu dibenaghka, karnau percayau nian, tapitu deniau diukum.

⁸ Karnau percayau, mangku Abraham ta'at, masau diau dipilia ngan diajung pegi ke nenggeri diau Allah janjika ngan diau. Mangku Abraham bejalan, nidau keruan ka ke manau diau.

⁹ Karnau percayau, diau njadi jemau asing di nenggeri diau dijanjika Allahtu. Badahau di kima. Luak itu pulau Isak ngan Yakub diau ngikut nerimau janjitu pulau.

¹⁰ Mangku Abrahamtu nungguka kuta diau direncanauka ngan ditegakka Allah ngan pelapiak diau kuat.

¹¹ Karnau percayau, diautu ngan Sara adau anak, empuak ughang duautu la tuau nian. Diautu percayau nian, bansau Allah ka nepati janjiAu padau masaunyau.

¹² Masau itu diau luak jemau tigha kari matiau. Empuak luak itu di diau banyak pengadau, nidau kebilangan banya'au luak bintang di langit ngan bungin di tepi laut.

¹³ Gegalau jemautu percayau mangku mati, nidau nerimau setu diau dijanjika Allahtu, cuman ngina'au jak di jawua mangku riang. Ughangtu ngaku'i, bansau ughangtu jemau asing ngan merantau di deniauni.

¹⁴ Jemau diau ngiciak luak itu nyatauka, bansau diau dang ndalak bada diau njadi ha'au.

¹⁵ Ukan bada diau la ditinggalka ughangtu diau dirupuakkatu. Misalau dirupuakka nian, cengki ughangtu la ngelipat ke bada itu.

¹⁶ Anyautu ughangtu meghinduka bada diau lebia iluak, diautu bada diau di sergau. Itula sebapau Allah nidau maluan dikiciakka Allah ughangtu, karnau Allah la nyediauka sutiak kuta batan endak ughangtu.

¹⁷ Karnau percayau, mangku Abraham ngenjuakka Isak njadi kerban, masau diuji Allah. Ngan Abraham itula Allah bejanji, mangku diau pulau rila nyeraka ana'au diau gi sughang itula,

¹⁸ empuak la dikiciakka ngan diau, “Pengadau diau asalau jak di Isaktu ka dikiciakka pengadau kaba.”

¹⁹ Diautu yakin, bansau Allah pacak ngidupka jemau mati, mangku pacak dikiciakka, Isak la ngulang idup jak di mati dienjuakka ngan ba'autu.

²⁰ Karnau percayau, mangku Isak ndu'aka Yakub ngan Isau batan endak idupau nanti.

²¹ Karnau percayau, mangku Yakub masau laka mati ndu'aka duau anak Yusup, nyandar di pangkal tungkatau sampai nyemba Allah.

²² Karnau percayau, mangku Yusup, masau diau laka mati, ngiciakka ceritau jemau Israil ngeluagh jak di Mesir, bemanat ngiciakka luak manau mesti dikerjauka ngan tulangau.

²³ Karnau percayau, mangku pejadi Musa nyemunikanyau jak empai adau tigau bulan lamaunyau. Pejadiautu nginak, bansau diautu anak diau alap, mangku ughangtu nidau takut melawan perinta rajau.

²⁴ Karnau percayau, mangku masau Musa la besak enggup dikiciakka anak jak di anak tinau rajau Mesir.

²⁵ Galakla diau ngikut sengsarau ngan umat Allah sangkan jerang ajau beriang-riang karnau idup diau bedusau.

²⁶ Musa nganggap beregaula digelakka karnau Rajau Penyelamat diau dijanjika Allahtu sangkan bulia gegalau retau Mesir, karnau diau ngaghapka upa nanti.

²⁷ Karnau percayau, mangku Musa ninggalka Mesir, nidau takut dimarai rajau. Diau maju ajau luak nginak Allah diau nidau kina'antu.

²⁸ Karnau percayau, mangku Musa mbuat Paska, diajungau supayau dagha dipegheciakka di duaghau ghuma jemau Israil, mangku malaikat kematian nidau mbunua anak tuau ughangtu.

²⁹ Karnau percayau, mangku jemau Israil pacak nyembeghangi Laut Abang luak bejalan di tana keghing, tapitu jemau Mesir tebenak di laut, masau ughangtu ncubau nyembeghang pulau.

³⁰ Karnau percayau, mangku dinding Yiriku rubua, la udim dikelilingi jemau Israil selamau tujua aghi.

³¹ Karnau percayau, mangku Rahab, pelacurtu, nerimau mematau jemau Israil ngan iluak, mangku nidau ngikut tebunua ngan jemau diau melawan Allah.

³² Aku pacak ajau maju ngiciak, anyautu masaunyau gi dikit. Lum pulau aku ngiciakka Gidiun, Barak, Simsun, Yipta, Daud, Samuil ngan nabi-nabi.

³³ Karnau percayau, mangku ughangtu la ngalaka rajau-rajau. Ughangtu ngerjauka setu diau benagh, mangku nerimau setu diau dijanjika. Adau diau nukup mulut setuau.

³⁴ Adau diau madamka api besak kematila. Adau diau luput jak di matau pedang. Adau diau litak, mangku njadi kuat. Adau diau kuat beperang, mangku ngalaka tentera jemau asing.

³⁵ Karnau percayau, mangku jemau tinau ngulang dapat agi jemau diau la mati. Adau pulau diau sukau disiksau ngan mati, enggup dibibaska, karnau endak diidupka agi ngan idup diau lebia iluak.

³⁶ Adau pulau diau digelakka, dipeciti, dikebat ngan rantai ngan dimasuakka dalam jil.

³⁷ Adau diau disipati ngan batu enggut mati. Adau diau ditetak ngan gergaji. Adau diau dibunua ngan pedang. Adau diau nidau bebada ngan makai baju jak di bawak bebiri ngan kambing. Ughangtu serik-sarau, nanggung ngan disiksau.

³⁸ Deniauni ukan bada diau pantas batan endak ughangtu. Bada ughangtu di padang bungin ngan di bukit, di gua ngan di tebuak tana.

³⁹ Gegalau ughangtu diceritauka di Injil karnau percayau. Anyautu ughangtu lum nerimau setu diau dijanjikatu,

⁴⁰ karnau Allah merencanauka setu diau lebia iluak batan endak kitau. RencanauNyau, supayau ughangtu njadi sempernau serempak ngan kitau.