GALATIA 2 - PEJANJIAN EMPAI CERITAU ILUAK

Paulus diaku'i rasul diau lain

¹ Empat belas taun udim itu aku ngulang ke Yerusalim ngan Barnabas ngan Titus ngikut pulau.

² Aku pegi ke Yerusalim, karnau Allah la nyatauka ngan aku, bansau aku mesti pegi. Aku betemu ngan pengulu-pengulu jemau Keristen di situ, mangku aku ngiciakka ceritau iluak diau kukiciakka ngan jemau bangsau lain, supayau jangan kerjauku empuak senitu empuak mbak kini nidau bediau retiau.

³ Titus diau ngantini aku sughang jemau Yunani. Empuak luak itu diau nidau dipasau endak disunat.

⁴ Nyela, adau jemau diau endak masau carau itu. Ughangtu cak jemau Keristen ngan masuak nidau dikeruani luak mematau. Ughangtu endak ngeruani ngan ngalangi kebibasan diau adau di kitau, karnau kitau idup seghundak ngan Yesus Keristus. Ngan carau luak itu ughangtu endak mbudakka kitau agi.

⁵ Anyautu kami nidau nyera dikit kia ngan ughangtu, karnau kami endak njagaui, supayau ceritau iluak diau benaghtu nidau diuba batan endak kamu.

⁶ Empuak luak itu, nidau bediau setu diau dituntut jak di aku ngan jemau diau dianggap beregau. - Amun aku, nidau penting apu ughangtu beregau apu nidau, karnau Allah nidau milia rupau.

⁷ Mangku jemau diau dianggap beregautu ngaku'i, bansau Allah la nugaska aku ngiciakka ceritau iluak ngan jemau nidau besunat, semegi luak Diau la nugaska Pitrus ngiciakka ceritau iluaktu ngan jemau besunat.

⁸ Allah njadika Pitrus rasul batan endak jemau besunat. Diautu pulau njadika aku rasul batan endak jemau nidau besunat.

⁹ Yakubus, Pitrus ngan Yuhanis diau njadi pengulu jemau Keristen ngaku'i, bansau aku la ditugaska luak itu. Mangku ughangtu bejabat tangan ngan aku ngan Barnabas njadi tandau tetuju, bansau kami pegi endak bekerjau di guak jemau ukan Yahudi, ngan ughangtu pegi bekerjau di guak jemau Yahudi.

¹⁰ Ughangtu cuman mintak, supayau maju nyanauka jemau serik. Mangku aku riang ngerjaukanyau.

Paulus negughi Pitrus

¹¹ Masau Pitrus berayak ke Antiukia, aku negughi diau ngan terang-terangan, karnau diau sala nian.

¹² Penembaiau diau makan serempak ngan jemau diau nidau besunat. Mangku adau jemau jak di anak-bua Yakubus datang, diau njawuaka diriau jak di jemau ukan Yahudi, enggup makan agi serempak ngan ughangtu karnau takut ngan jemau Yahuditu.

¹³ Mangku jemau Yahudi lainau ngikut perembak diau ca'autu. Barnabas pulau ngikut perembak ughangtu.

¹⁴ Satu aku nginak, perembak ughangtu nidau sesuai ngan ceritau iluak diau benaghtu, mangku aku bekiciak ngan Pitrus di adapan gegalau jemau, “Amun dighi sughang jemau Yahudi la idup luak jemau ukan Yahudi, ngapau dighi mbak kini endak masau jemau lain idup luak jemau Yahudi?”

Gegalau jemau diselamatka, karnau percayau ngan Keristus

¹⁵ Nyela, kami jemau Yahudi karnau bak kami jemau Yahudi. Kami ukan jemau bedusau jak di bangsau lain.

¹⁶ Empuak luak itu kamu keruan, bansau nidau sughang kiala dibenaghka karnau nuruti ukum agamau, tapitu gegalau jemau dibenaghka karnau percayau ngan Yesus Keristus. Itula sebapau kamini pulau percayau ngan Keristus, supayau kami dibenaghka karnau percayau ngan Keristus ukan karnau na'ati ukum agamau. Karnau nidau sughang kiala dibenaghka karnau nuruti ukum agamau.

¹⁷ Kamini ngaghapka dibenaghka ngan carau idup seghundak ngan Keristus, mangku tenyatau kami pulau jemau bedusau luak jemau ukan Yahudi. Tuapau retiau ini? Apu Keristus mbuat kami bedusau? Nidau ka adau!

¹⁸ Amun aku mulai negakka agi setu diau la kuleghak, mangku aku nyatauka diriku pelanggar ukum Taurat.

¹⁹ Aku la mati batan endak ukum Taurat karnau ukum Taurattu, mangku aku idup batan endak Allah. Aku la disalipka ngan Keristus.

²⁰ Mbak kini ukan agi aku diau idup, tapitu Keristus idup dalam diriku. Mangku mbak kini aku idup karnau percayau ngan Anak Allah diau la nyayangi aku ngan nyeraka nyawauNyau batan endak aku.

²¹ Aku nidau nulak keilu'an Allahtu. Misalau jemau dibenaghka karnau ukum Taurat, kematian Keristus nidau bediau retiau.