3 YUHANIS 1 - PEJANJIAN EMPAI CERITAU ILUAK

¹ Gayus diau kusayangi. Aku, sughang tuau jemau Keristen, nyayangi kaba nian.

² Aku bedu'a, mangku kaba sihat ngan gegalaunyau iluak ngan kaba, semegi luak jiwa kaba iluak.

³ Aku riang nian, karnau adau jemau datang nceritauka kaba ngan aku, bansau kaba maju idup sebenaghau di adapan Allah, karnau nyela kabatu maju ta'at ngan ajaghan Allah.

⁴ Aku riang ndengagh, bansau anak-buaku idup nurut ajaghan Allah. Titula mangku aku riang nian.

Gayus digunjungka

⁵ Kantinku diau kusayangi. Kaba rajin nulungi kantin-kantin kitau jemau Keristen, lagi jemau diau lum kaba keruani kaba tulung pulau.

⁶ Ughangtu la ngiciakka ngan jemau Keristen di sini, bansau kaba iluak ngan ughangtu. Tulungla jemau luak itu, mangku diau pacak melajuka pejalanannyau. Ngan carau luak itu kaba melemakka ati Allah.

⁷ Ughangtu bejalan endak nceritauka Yesus. Ughangtu ngerjaukanyau, anyautu nidau nerimau tuapau-apau jak di jemau diau nidau keruan Allah.

⁸ Itula sebapau kitauni mesti nulung kantin kitau diau ngerjauka titu, mangku kitau ka ngikut dalam kerjau ughangtu endak ngiciakka ceritau diau benagh jak di Allah.

Perembak Diutrepis diau ja'at

⁹ Aku la nulis surat ngan jemau Keristen di situ, anyautu Diutrepis endak njadi pengulu jemau Keristen, enggup nuruti aku.

¹⁰ Nanti amun aku datang, aku ka ngakaghka gegalau peremba'au diau la dikerjaukanyautu. Diautu pembu'ung ngan mburuakka kami. Ukan itu ajau, diau pulau enggup nerimau jemau Keristen diau datang, lagi pulau negahi jemau diau endak nerimau ughangtu, mangku ngeluaghka jemau tadi jak di kumpulan jemau Keristen.

Dimetrius dipuji

¹¹ Kantinku diau kusayangi. Jangan menau diau ja'at. Penaula diau iluak. Jemau diau bebuat iluak asalau jak di Allah. Jemau diau bebuat ja'at nidau ngeruani Allah.

¹² Bilang ughang muji Dimetrius. Karnau kerjaunyau diau benaghtu diau dipuji. Kami pulau muji diau. Mangku kaba keruan, bansau kici'an kamini pacak dipercayaui.

Pesan

¹³ Banyak diau endak kukiciakka ngan kaba, anyautu iluakla jangan pakai surat.

¹⁴ Aku ngaghap nidau lamau agi ka betemu ngan kaba, mangku kitau pacak ngiciak.

¹⁵ Tuhan iluak ngan kaba. Kantin-kantin di sini bepesan ngan kaba. Sampaikala pesanku ngan bilang ughang kantin kitau.