2 TIMUTIUS 3 - PEJANJIAN EMPAI CERITAU ILUAK

Keadaan jemau masau pengabisan saman

¹ Ingatla, masau pengabisan saman ka adau banyak penanggungan.

² Manusiau ka merupuakka diriau ajau ngan tetancian, ka geduak ngan langguak, galak nggelakka jemau, melawan pejadi, nidau terti beterimau-kasia, nidau buagamau,

³ nidau sayang, nidau endak seilu'an ngan jemau, galak ngarutka jemau, kejam, garang, meluatka setu diau iluak,

⁴ nidau pacak dipercayaui, nidau panjang rupu'an, kiciak besak, galakla nuruti serilau deniau sangkan nuruti kendak Allah.

⁵ Ughangtu nuruti kewajiban agamau, anyautu nidau endak keruan kuasaunyau. Jawuhila jemau luak itu.

⁶ Adau jak di ughangtu diau masuak ghuma jemau, mangku mikati jemau tinau diau nidau percayau nian ngan banyak dusaunyau ngan dikuasaui bemecam serilau.

⁷ Tinautu maju endak ngeruani gegalaunyau, anyautu nidau kekela ngeruani ajaghan diau benagh.

⁸ Luak Yanis ngan Yamberis melawan Musa senitu, luak itula pulau ughangtu melawan ajaghan diau benagh. Rupu'an ughangtu la rusak ngan nidau percayau agi.

⁹ Ughangtu nidau ka maju buasil, karnau kerjau ughangtu ka dikeruani gegalau jemau, luak la dighasauka Yanis ngan Yamberis.

Petua ngan Timutius

¹⁰ Anyautu kabatu la ngikuti ajaghanku, carau ngan tujuan idupku. Kaba la nginak carau aku percayau ngan nyayangi jemau. Kaba pulau keruan aku ngaligh ngan tekun.

¹¹ Kaba la nginak aku dianiayau ngan nanggung. Kaba keruan gegalaunyau diau tejadi di aku di Antiukia ngan Ikunium ngan Listera. Kaba keruan gegalaunyau diau kutanggungka. Anyautu jak di gegalaunyautu Tuhan la ngilakka aku.

¹² Nyela, bilang jemau diau endak idup ta'at ngan Allah ngan idup seghundak ngan Yesus Keristus ka dianiayau.

¹³ Jemau ja'at ngan jemau penipu ka tamba ja'at. Ughangtu nipuka jemau, awuak ughangtu pulau tetipu.

¹⁴ Anyautu kaba mesti maju nuruti ajaghan diau benagh diau la diajaghka ngan kaba diau kaba percayaui nian, karnau keruan sapau guru kaba.

¹⁵ Ingatkala, bansau jak di keciak kaba la keruan Injil. Injiltu pacak ngenjuakka ngan kaba pengertian endak ngajaghka jalan selamat, amun percayau ngan Yesus Keristus.

¹⁶ Gegalaunyau diau ditulis di Injiltu jak di Rua Allah. Gegalaunyautu begunau endak ngajaghka diau benagh, endak nyatauka diau sala, endak ngilu'i perembak ngan ngajagh jemau nuruti kendak Allah.

¹⁷ Mangku bilang jemau Keristen didandani batan endak gegalau kerjau diau iluak.