2 TIMUTIUS 2 - PEJANJIAN EMPAI CERITAU ILUAK

Tentera Keristus diau ta'at

¹ Timutius, anakku, kaba mesti kuat karnau keilu'an diau dienjuakka ngan kitau karnau seghundak ngan Yesus Keristus.

² Ajaghan diau la kaba dengagh jak di aku di mukau jemau banyak mesti kaba percayauka ngan jemau diau pacak dipercayaui ngan cakap ngajagh jemau.

³ Ikutla sengsarau luak tentera Yesus Keristus diau ta'at.

⁴ Sughang tentera diau dang bejuang nidau merupuakka diriau ngan pengidupannyau, karnau diau endak melemakka ati kumandanau.

⁵ Jemau diau ngikut betanding nidau ka dapat juara, amun nidau na'ati peraturan tandingtu.

⁶ Petani diau bekerjau mati-matian, diautu behak dulu sekali meghasauka asil kerjaunyautu.

⁷ Rupuakkala setu diau la kukiciakka itu. Tuhan ka ngenjuakka ngan kaba pengertian endak ngerti gegalaunyau.

⁸ Ingatkala ceritau Yesus Keristus, pengadau Daud, diau la idup agi jak di mati luak ceritau iluak diau kukiciakkatu.

⁹ Ikak ngiciakka ceritau iluaktu aku sengsarau, lagi dirantai luak bandit. Anyautu katau Allah nidau pacak dirantai.

¹⁰ Itula sebapau aku nanggungka gegalaunyautu ngan ngaligh batan endak jemau diau dipilia Allah, mangku ughangtu pulau pacak diselamatka Yesus Keristus ngan meghasauka keagunganNyau selelamaunyau.

¹¹ Kici'an ini benagh nian, “Amun kitau mati ngan Diau, kitau ka idup pulau ngan Diau.

¹² Amun kitau beta'an, kitau ka merinta ngan Diau. Amun kitau nidau endak ngaku'i Diau, Diau pulau nidau ngaku'i kitau.

¹³ Amun kitau nidau setia, Diau maju setia, karnau Diau nidau pacak nidau ngaku'i diriAu.”

Anak-bua diau dipuji

¹⁴ Ingatkala gegalaunyautu ngan jemau. Ajungla ughangtu di adapan Allah, supayau jangan bebala, karnau nidau bediau gunaunyau, cuman ngacauka jemau diau ndengaghau.

¹⁵ Usahakala, supayau kaba dianggap pantas bekerjau batan endak Allah, mangku nidau nanti maluan karnau kerjau kaba. Anyautu ajaghka nian ajaghan diau benaghtu.

¹⁶ Jawuhila kici'an mbu'ung diau nidau begunau. Kici'an luak itu cuman mbuat jemau tamba ja'at.

¹⁷ Ajaghan ughangtu meghatau luak pughu. Di antarau ughangtu temasuak Himenius ngan Pilitus.

¹⁸ Ughangtu la nyimpang jak di ajaghan diau benagh ngan ngacauka kepercayauan jemau ngan kici'an, bansau kitau la udim diidupka.

¹⁹ Anyautu pelapiak diau tegua diau dibuat Allah nidau pacak diguraka. Di pucu'au ditandaui luak ini, “Tuhan keruan jemau Diau empu.” ngan “Jemau diau ngaku'i ngan nyemba Tuhan mesti mandak ngerjauka setu diau ja'at.”

²⁰ Di ghuma diau besak adau bemecam-mecam dandanan. Adau diau dibuat jak di emas ngan pirak, adau pulau diau dibuat jak di kayu ngan tana. Diau ini digunauka batan endak kerjau idang aghi. Diau tadi digunauka batan endak tujuan diau penting.

²¹ Jemau diau mberesiaka diriau jak di kerjau diau ja'at njadi luak dandanan diau alap. Diau ka pantas digunauka tuanau batan endak gegalau kerjau diau penting.

²² Karnau itu jawuhila serilau anak mudau. Usahakala idup diau iluak, nurut kendak Allah, sayang ngan jemau ngan idup bedamai. Kerjaukala titu ngan idup seghundak ngan jemau diau ngaku'i namau Tuhan ngan ati diau beresia.

²³ Jangan ngikut bebala ngan jemau bigal mbalaka setu diau nidau begunau. Kaba keruan, gegalaunyautu cuman mbuat jemau belagau.

²⁴ Jemau diau bekerjau batan endak Tuhan nidau bulia bebala. Diau mesti iluak ngan gegalau jemau ngan pacak ngajagh jemau ngan ngaligh,

²⁵ ngajaghi jemau diau galak melawan. Asauku Tuhan endak nulung, mangku jemautu ngubai jak di peremba'au ngan keruan ajaghan diau benagh.

²⁶ Ngan carau luak itu jemautu njadi jagau ngan luput jak di jeghat iblis diau la nangkap diau, masau diau ngikuti kendak iblistu.