2 TESALUNIKA 3 - PEJANJIAN EMPAI CERITAU ILUAK

Du'akala kami

¹ Mangku, kantin-kantinku, du'aka kami. Bedu'ala, supayau katau Allah cepat tesiar mangku diterimau ngan iluak, luak diau la tejadi guak kamu senitu.

² Bedu'ala, supayau Allah nyelamatka kami jak di pengacau ngan jemau ja'at, karnau nidau gegalau jemau percayau ngan ceritau Tuhan.

³ Tuhan pacak dipercayaui nian. Diau ka neguaka ati kamu ngan njagaui kamu jak di diau ja'at.

⁴ Kami percayau nian ngan Tuhan, bansau kamu nidau ka mandak ngerjauka setu diau kami kiciakka ngan kamu.

⁵ Kami bedu'a, supayau Tuhan nulung kamu, mangku kamu terti nian kasia Allah ngan carau Keristus nanggung ngan ngaligh.

Bilang jemau mesti bekerjau

⁶ Ui kantin-kantinku, ngan kuasau Tuhan Yesus Keristus kami ngajung kamu, supayau kamu njawuhi bilang jemau percayau diau malas bekerjau ngan nidau nuruti ajaghan diau kami ajaghka ngan kamu.

⁷ Kamutu keruan, kamu mesti menau carau kami. Kami nidau malas, masau kami adau di guak kamu.

⁸ Kami nidau makan makanan jemau ngan nidau dibayighi. Siang-malam kami bekerjau mbanting tulang, supayau kami jangan merugika sughang kia jak di kamu,

⁹ ukanau karnau kami nidau behak mintak tulung ngan kamu, anyautu kami endak njadi penauan batan endak kamu.

¹⁰ Lagi masau kami gi adau di guak kamu, kami la ngajagh kamu luak ini: Jemau diau enggup bekerjau, jangan diajung makan.

¹¹ Kami ngiciakka itu, karnau kami la ndengagh, bansau adau jemau jak di kamu diau idup malas, nidau ngerjauka tuapau-apau lain jak di ngiciakka jemau.

¹² Jemau luak itu kami ngajung nian dalam namau Tuhan Yesus Keristus, supayau ughangtu neman bekerjau, mangku bulia pengidupan.

¹³ Mangku kamu, jangan kamu puas bebuat iluak.

¹⁴ Amun adau jemau diau enggup nuruti setu diau kami kiciakka dalam surat ini, sepepadaula ngan jemautu. Jangan sekantin ngan diau, mangku diau maluan.

¹⁵ Anyautu jangan nganggap diau musua, tapitu tegughila diau luak adiak-sanak.

Pesan pengabisan

¹⁶ Kami bedu'a, supayau Tuhan maju ngenjuakka damai ngan kamu, empuak luak manau ajau. Aku bedu'a, supayau Tuhan nyertaui gegalau kamu.

¹⁷ Pesan jak di aku, Paulus. Inila tulisanku. Luak inila tandau tanganku di gegalau suratku.

¹⁸ Aku bedu'a, supayau Tuhan kitau Yesus Keristus iluak ngan gegalau kamu.