2 TESALUNIKA 2 - PEJANJIAN EMPAI CERITAU ILUAK

Jemau Ja'at antak ka Tuhan datang

¹ Ceritau Tuhan kitau Yesus Keristus datang ngan ceritau kitau ditunggalka ngan Diau, inila diau kami ajungka nian ngan kamu:

² Jangan kamu mura bingung ngan ghegak, karnau adau ceritau aghi Tuhan la sampai, enta ceritautu asalau jak di katau rua, enta jak di ajaghan, enta jak di surat diau dikiciakka asalau jak di kami.

³ Empuak luak manau, jangan kamu ditipuka jemau, karnau antak ka aghitu sampai, banyak jemau ka ngelipat ngan melawan Allah. Mangku ka adau sughang Jemau Ja'at diau ditetapka masuak ke nerakau.

⁴ Jemautu ka melawan ngan ninggika diriau lebia tinggi jak di gegalaunyau diau disemba manusiau ngan gegalaunyau diau dianggap manusiau allah. Lagi diau ka duduak di Ghuma Allah ngan ngiciakka diautu Allah.

⁵ Baghia kamu nidau teghingat agi, bansau gegalaunyautu la kukiciakka ngan kamu. Masau itu aku gi adau guak kamu.

⁶ Mangku kamuni keruan setu diau na'ani jemautu ngerjauka gegalaunyautu. Nanti masaunyau diau la ditetapka Allah, Jemau Ja'attu ka dinyatauka.

⁷ Kuasau diau ngerjauka keja'atan itu la mulai bekerjau ngan carau diresiaukanyau, anyautu masia dita'ani. Amun diau na'aninyautu la dijawuaka,

⁸ Jemau ja'attu kina'an. Mangku amun Tuhan Yesus datang, Diau ka mbunua Jemau Ja'attu ngan nyawau jak di mulutAu, Diau ka mbenasaukanyau ngan keagunganNyau.

⁹ Jemau Ja'attu ka datang ngan kuasau Iblis, mangku diau ka ngadauka gegalau mecam tandau nyelia ngan bemecam tipuan.

¹⁰ Diau ka makai gegalau mecam tipuan diau ja'at ngan jemau diau ka benasau. Ughangtu ka benasau nian, karnau ughangtu enggup nerimau, nidau meregaui ceritau benagh jak di Allah diau pacak nyelamatka ughangtu.

¹¹ Itula sebapau Allah ngajung kuasau diau nyesatka ughangtu, mangku ughangtu percayau ceritau diau mbu'ung.

¹² Ikak itula gegalau jemau diau nidau percayau ngan setu diau benagh, galak mbuat ja'at ka diukum.

Kamu dipilia batan endak diselamatka

¹³ Kantin-kantinku diau disayangi Tuhan. Kami sepantasau beterimau-kasia ngan Allah karnau kamu, karnau jak di penembai Allah milia kamu batan endak diselamatka karnau kerjau Rua Allah diau njadika kamu umatAu diau beresia, lagi pulau karnau kamu percayau ceritau diau benagh jak di Allah.

¹⁴ Batan endak itula kamu diajak karnau ceritau iluak diau la kami kiciakka ngan kamu, mangku kamu ngikut meghasauka keagungan Yesus Keristus, Tuhan kitau.

¹⁵ Karnau itu majula percayau ngan maju nuruti ajaghan diau la kami ajaghka ngan kamu, empuak diau kami kiciakka, empuak diau kami tuliska.

^16-17 Kami bedu'a, supayau Tuhan kitau Yesus Keristus ngan Allah Bapak kitau melemakka ngan neguaka ati kamu, mangku kamu pacak ngerjauka ngan ngiciakka setu diau iluak. Allah nyayangi kitau. Diau maju neguaka nian ngan ngenjuakka aghapan diau iluak ngan kitau, karnau Allahtu iluak.