2 PITRUS 2 - PEJANJIAN EMPAI CERITAU ILUAK

Guru diau nyesatka

¹ Masau baghini la adau cak nabi di guak umat Allah. Luak itu pulau di guak kamu ka adau guru diau nyesatka. Ughangtu ka ngajaghka ajaghan diau nidau benagh diau mbenasauka jemau. Ughangtu nidau ngaku'i penguasau diau la nebus ughangtu. Ngan carau luak itu ughangtu sala sendighi, sangkan cepat diukum.

² Banyak jemau ka ngikuti carau idup ughangtu diau dikuasaui serilaunyau. Mangku ikak kerjau ughangtu banyak jemau ka nggelakka jalan diau benagh.

³ Ughangtu selak, mangku ughangtu ndalak untung jak di kamu ngan ngiciakka ceritau mbu'ung. Anyautu ukuman ughangtu la lamau ditetapka. Ughangtu ka cepat diukum mangku benasau.

⁴ Malaikat diau bedusau nidau dienangka Allah bibas jak di ukuman, dicapakka ke nerakau. Malaikattu dimasuakka ke tebuak tana diau keleman endak dita'an di situ enggut masau pengukuman.

⁵ Luak itu pulau deniau timpau senitu nidau Allah enangka bibas jak di ukuman. Allah mbuat ayiak merampus di deniau, mangku jemau diau ja'at mati galau. Cuman Nua delapan beghanak diselamatka, karnau Nua ngiciakka ceritau diau benagh.

⁶ Luak itu pulau ngan kuta Sudum ngan Gumura. Allah mbenasauka kuta itu ngan api, mangku njadi peringatan batan endak jemau ja'at di masau la udim itu.

⁷ Anyautu Lut diselamatkaNyau, karnau diau jemau benagh. Luttu nanggung nian nginak perembak jemau diau nidau senangaian, nidau endak keruan ukum, tapitu ngikut serilaunyau ajau.

⁸ Lut mendam di guak jemau luak itu. Idang aghi diau nginak ngan ndengagh perembak jemau diau ja'attu, mangku atiau diau benaghtu meghasau sengsarau.

⁹ Tuhan pacak nyelamatka jemau diau benagh, amun adau pencubauan. Diau pacak pulau na'an jemau diau ja'at endak disiksau di aghi pengadilan nanti,

¹⁰ terutamau jemau diau nuruti serilaunyau diau nidau senangaian ngan nggelakka kuasau Allah. Ughangtu geduak ngan beghani nian mangku nidau takut nggelakka malaikat diau agung di sergau.

¹¹ Bekuasaula malaikattu sangkan guru diau ja'attu. Empuak luak itu, malaikat nidau mburuakka ughangtu ngan katau nggelakka di adapan Allah.

¹² Anyautu guru tadi luak benatang diau cuman idup endak ditangkap ngan dibunua. Ughangtu nidau berupuak, cuman ngikut serilaunyau ajau. Ughangtu nggelakka setu diau nidau dikeruaninyau, mangku ikak peremba'au diau ja'attu ughangtu ka benasau luak benatang ganas.

¹³ Ughangtu ka sengsarau karnau upa keja'atan. Ughangtu ngerjauka tuapau kila diau melemakka atiau, dikerjauka aghi siang endak nuruti serilaunyau ajau. Amun ughangtu duduak ngan kamu di jamuan, ughangtu maluka karnau mabuak ngan serilau.

¹⁴ Ughangtu dikuasaui serilau menaugawia, nidau kekela puas mbuat dusau. Ughangtu mikati jemau diau nidau tegua percayau. Ughangtu la tebasi selak. Ughangtu jemau meghakau!

¹⁵ Ughangtu enggup ngikut jalan diau benagh, mangku ughangtu sesat. Ughangtu milia jalan diau diturut Biliam ngan Biur senitu diau galak nerimau upa jak di kerjau diau ja'at.

¹⁶ Anyautu Biliamtu ditegughi nian jak di keja'atannyautu, masau keledaiau diau bisu ngiciak ngan suarau manusiau. Mangku nabitu tepasau mandak jak di kerjaunyau diau bigaltu.

¹⁷ Guru ja'attu luak matau-ayiak diau keghing, luak aban diau ditiup angin nyaghu. Allah la nyediauka bada diau keleman nian batan endak ughangtu.

¹⁸ Ughangtu muji diriau ngan kici'an bigal. Ngan serilau diau nidau senangaian ughangtu mikati jemau diau empai bibas jak di guak jemau diau idupau sesat.

¹⁹ Guru tadi njanjika kebibasan ngan jemau, awuak ughang itula dibudakka kerjau diau merusakka manusiau, karnau amun jemau dikalaka, mangku diau njadi budak setu diau ngalakanyautu.

²⁰ Amun sughang jemau la keruan Tuhan ngan Rajau Penyelamat kitau Yesus Keristus, diau la bibas jak di kuasau deniau diau merusakka manusiau. Anyautu amun diau ngulang agi dikuasauinyau, mangku diau tamba pansan agi jak di senitu.

²¹ Iluakla jemau itu, amun nidau kekela keruan jalan diau benagh sangkan ngeruaninyau ngan nidau nuruti perinta Allah diau dienjuakka ngan diau.

²² Kerjau ughangtu luak diau dikiciakka dalam pantun ini, “Anjing ka makan agi setu diau dimuntakanyau. Kaput diau la dimandika ka ngulang agi bekubang di licak.”