2 PITRUS 1 - PEJANJIAN EMPAI CERITAU ILUAK

¹ Jak di Simun Pitrus, budak ngan rasul Yesus Keristus, batan endak jemau diau percayau semegi luak kami, karnau la dibenaghka Allah ngan Yesus Keristus, Rajau Penyelamat kitau.

² Aku bedu'a, supayau Allah iluak nian ngan kamu ngan maju ngenjuakka damai, mangku kamu maju tamba keruan Allah ngan Yesus, Tuhan kitau.

Kamu dipilia Allah

³ Allah la makai kuasauNyau endak ngenjuakka ngan kitau gegalaunyau diau kitau enda'au, mangku pacak idup alim. Titu dikerjaukaNyau, karnau kitau keruan Keristus diau la milia kitau endak ngikut meghasauka keilu'an ngan keagunganNyau.

⁴ Ngan carau luak itula kitau la nerimau janji diau iluak ngan beregau diau la dijanjikaNyau, mangku kamu pacak bibas jak di serilau diau ja'at diau mbenasauka deniau, mangku kamu ngikut meghasauka sipat Allah.

⁵ Karnau itu kamu beusahala nian, supayau kamu maju percayau ngan Keristus. Mangku percayau kamu ditamba ngan kerjau diau iluak. Kerjau diau iluak ditamba ngan ngeruani kendak Allah.

⁶ Ngeruani kendak Allah ditamba ngan nguasaui diri. Nguasaui diri ditamba ngan tekun. Tekun ditamba ngan ta'at ngan Allah.

⁷ Ta'at ngan Allah ditamba ngan sayang ngan kantin diau suagamau. Sayang ngan kantin kamu ditamba ngan sayang ngan gegalau jemau.

⁸ Amun gegalaunyautu adau galau di kamu, kamu nidau ka malas, mangku buasil ngan tamba ngeruani Tuhan kitau Yesus Keristus.

⁹ Anyautu jemau diau nidau bediau gegalaunyautu diau luak jemau butau, nidau banyak ngerti. Diau nidau teghingat agi, bansau dusaunyau diau senitu la diabiska.

¹⁰ Karnau itu, kantin-kantinku, beusahala nian, supayau pilian Allah di kamu tamba tegua. Amun kamu ngerjauka titu, kamu nidau ka ngelipat.

¹¹ Mangku kamu ka dienju'i nian hak masuak sergau, itu kerajauan diau selelamaunyau jak di Tuhan ngan Rajau Penyelamat kitau Yesus Keristus.

¹² Karnau itu aku maju ngingatka gegalaunyautu ngan kamu, empuak kamu la ngeruaninyau ngan percayau nian ngan ceritau jak di Allah diau la kamu terimautu.

¹³ Semasau aku gi idup, aku meghasau pantas ngingatka gegalaunyautu ngan kamu.

¹⁴ Karnau aku keruan, bansau nidau ka lamau agi aku ka ninggalka deniauni. Tuhan kitau Yesus Keristus la ngiciakkanyau nian ngan aku.

¹⁵ Mangku aku beusaha, supayau amun aku la mati, kamu maju ngingatka gegalaunyautu.

Kami la nginak keagungan Keristus

¹⁶ Masau kami ngiciakka ngan kamu kuasau ngan keagungan Tuhan kitau Yesus Keristus diau ka datangtu, kami nidau nceritauka andai-andai manusiau. Keagungan Keristus itula diau la kami kinak nian ngan matau kaminila.

¹⁷ Kami adau di situ, masau Diau diregaui ngan diagungka Allah Bapak. Masau itu adau suarau jak di Allah diau Mahaagungtu ngiciakka, “Inila AnakKu diau Kusayangi diau melemakka atiKu.”

¹⁸ Kami inila ndengagh suarau itu ngiciak jak di sergau, masau kami adau seghundak ngan Diau di pucuak bukit Allahtu.

¹⁹ Itula sebapau kami tamba percayau nian ngan katau Allah diau la diceritauka nabi. Alaka ilu'au, amun kamu meratika katau itu, karnau katautu luak lampu diau besinagh di bada diau keleman enggut aghi siang ngan luak bintang timur besinagh dalam ati kamu.

²⁰ Diau penting sekali ingatkala nian ini: Katau Allah diau ditulis nabi-nabi dalam Injil nidau bulia diretika nurut pendapat manusiau,

²¹ karnau nidau kekela nabi ngiciakka titu ngan kenda'au sendighi. Anyautu ughangtu dikuasaui Rua Allah mangku ngiciakka katau jak di Allah.