2 KURINTUS 8 - PEJANJIAN EMPAI CERITAU ILUAK

Jemau Keristen nulung jemau serik di Yudia

¹ Kantin-kantinku, kami endak ngiciak ngan kamu ceritau keilu'an Allah ngan jemau Keristen di Makedunia.

² Ughangtu la meghasauka penanggungan diau beghat, anyautu ughangtu maju riang nian ngan ngenjuak nidau dikit nulung jemau, empuak serik nian.

³ Aku la nginak, bansau ughangtu la ngenjuak setu diau adau, lebia agi jak di itu dienjuakka. Ngan setulusau

⁴ ughangtu mintak nian ngan kami, amun bulia ngikut nulung ngenju'i umat Allah di Yudia.

⁵ Ughangtu ngenjuak lebia jak di kami aghapka. Ughangtu nyeraka diriau kudai ngan Allah, mangku pulau ngan kami karnau kendak Allah.

⁶ Karnau itu kami ngajung Titus diau mulai kerjau iluak itu, supayau diudiminyau di guak kamu.

⁷ Keilu'an adau galau di kamu. Carau kamu percayau, carau kamu nyatauka pendapat, carau kamu pengertian, carau kamu nulung jemau ngenian, carau kamu nyayangi kami iluak galau. Karnau itu mbak kini iluakla kamu ngerjauka kerjau diau iluaktu pulau.

⁸ Aku ukan ngiciakka titu endak ngajung kamu, tapitu endak nunjuakka jemau lain diau rajin ngenjuak ngan jemau. Mangku aku endak keruan pulau, apu kamu sayang nian.

⁹ Kamu keruan, bansau kitau disayangi Yesus Keristus, Tuhan kitau. Empuak Diau kayau, Diau njadi serik batan endak kamu, mangku kamu njadi kayau karnau keserikanNyautu.

¹⁰ Nurut pendapatku, iluakla kamu ngudimi kerjau diau la dimulai taun empaini. Kamutu diau dulu sekali nembaika kerjautu.

¹¹ Mbak kini udimila kerjautu. Kerjaukala titu nurut luak manau kamu pacak ngan sukau. Kamu mesti riang ngudiminyau luak kamu riang merencanaukanyau senitu.

¹² Amun kamu sukau ngenjuak, mangku Allah ka nerimau enju'an kamutu nurut setu diau adau di kamu, ukan nurut setu diau nidau bediau di kamu.

¹³ Aku nidau endak mbibaska jemau jak di tugasau mangku mbeghati kamu, anyautu mangku semegi.

¹⁴ Mbak kini kamutu sepantasau ncukupi jemau diau kurangan. Mangku amun ughangtu belebia, ughangtu ka nulung kamu, amun kamu kurang. Ngan carau luak itu kamu sesamau tetulung.

¹⁵ Luak ditulis dalam Injil, “Jemau diau ngambiak banyak nidau belebia. Jemau diau ngambiak dikit nidau kurangan.”

Titus ngan kantinau

¹⁶ Terimau-kasia ngan Allah! Diautu mbuat Titus endak nian nulung kamu luak kami endak nulung kamu.

¹⁷ Nyela, Titus ukan ajau sukau endak nuruti setu diau kami kiciakka, mangku diau endak nian nulung kamu. Ngan kenda'au sendighi diau mutuska endak pegi njenguak kamu.

¹⁸ Serempak ngan diau kami ngajung pulau sughang kantin diau dipuji di gegalau jemau Keristen, karnau kerjaunyau ngiciakka ceritau iluak jak di Allah.

¹⁹ Ukan itu ajau. Diau pulau la dipilia ngantini kami ngerjauka kerjau iluak itu. Diautu nulung kami ngerjaukanyau, mangku Tuhan diregaui ngan diagungka, mangku tebukti kami sukau nulung jemau.

²⁰ Kami sepadau nian, supayau jangan adau jemau diau nyalaka kami nyampaika kumpulan tanci diau banyak itu.

²¹ Kami endak mbuat jujur, ukan cuman di adapan Tuhan, tapitu pulau di adapan jemau.

²² Serempak ngan ughang duautu kami ngajung pulau sughang kantin diau lainau. Kami la rajin nguji diau, tenyatau diau maju galak nulung. Mbak kini diau endak nulung kami nian, karnau besak aghapannyau ngan kamu.

²³ Titustu kantinku diau bekerjau ngan aku batan endak nulung kamu. Kantin diau lain diau pegi serempak ngan diautu diajung jemau Keristen bekerjau endak meregaui Keristus.

²⁴ Mangku kami mintak, supayau kamu nyatauka sayang kamu ngan ughangtu, mangku gegalau jemau Keristen keruan, bansau kamu nyayangi ughangtu nian ngan setu diau kami banggaka ceritau kamutu benagh.