2 KURINTUS 7 - PEJANJIAN EMPAI CERITAU ILUAK

¹ Kantin-kantinku diau kusayangi. Gegalau janji itu batan endak kitau. Karnau itu mela kitau mberesiaka diri kitau jak di gegalaunyau diau ngumuhi ati ngan rua kitau. Kitau mesti takut ngan Allah, mangku kitau pacak idup beresia batan endak Allah.

Paulus riang

² Terimaula kami dalam ati kamu. Kami nidau besala ngan sughang kiala. Nidau sughang kia diau kami rugika. Nidau jak di sughang kiala kami ndalak untung.

³ Aku ngiciak luak itu ukan endak nyalaka kamu. Tadi la kukiciakka, bansau kamu adau di ati kami, mangku kitau sekantin seidup semati.

⁴ Aku percayau nian ngan kamu, aku bangga nian karnau kamu. Empuak kami meghasauka banyak penanggungan, atiku diriangka karnau kamu, mangku aku riang nian.

⁵ Masau kami sampai di Makedunia, kami nidau pulau tenang. Kami maju adau penanggungan, jak di jemau lain bantahan, jak di ati kami ketakutan.

⁶ Anyautu kami beterimau-kasia. Allah meriangka ati jemau diau tekedan. Diau pulau meriangka kami, masau Titus datang.

⁷ Aku riang ukan ajau karnau Titus datang, tapitu pulau karnau diau ngiciakka atiau riang karnau kamu. Diau ngiciakka ngan kami, bansau kamu ghindu nian endak betemu ngan aku, bansau kamu la nyesali kerjau senitu, mbak kini endak mbenaghka aku. Karnau itu aku tamba riang nian.

⁸ Suratku senitu mbuat kamu madak, mangku mbak kini aku nidau nyesal nulis surat itu. Nyela, masau aku nginak, bansau suratkutu mbuat kamu madak, empuak madak kamu cuman jerang, aku nyesal pulau.

⁹ Mbak kini aku riang nian, ukan karnau kamu madak, tapitu karnau kemada'an kamutu mbuat kamu beghuba. Allah ngenda'i kemada'an diau luak itu, mangku kami nidau merugika kamu.

¹⁰ Kemada'an diau jak di Allah ngasilka ati beghuba mangku selamat. Jemau nidau ka nyesali titu. Anyautu kemada'an jak di deniauni kemada'an diau mbenasauka.

¹¹ Cubau kami ngingatka, tuapau asilau di kamu kemada'an jak di Allah. Asilau kamu beusaha nian endak mberesiaka diri jak di pemburu'an. Kamu keghengaman ngan dusau, takut, ghindu, rajin, mangku endak ngukum jemau diau besala. Ngan gegalaunyautu kamu la mbuktika, bansau kamu nidau besala dalam pekarau itu.

¹² Empuak aku la nulis surat itu senitu, kutulis ukan karnau jemau diau besalatu, ukan pulau karnau jemau diau nanggung salatu. Aku nulis surat itu, supayau kamu nyadari diri kamu di adapan Allah, bansau kamu nyanauka kami nian.

¹³ Itula sebapau kami riang. Ukan itu ajau, tapitu kami lebia jak di riang karnau nginak Titus riang pulau, karnau kamu meriangka diau.

¹⁴ Aku la mbanggaka kamu ngan diau. Terimau-kasia kamu nidau maluka aku. Gegalaunyau diau la kami kiciakka ngan kamu benagh. Luak itu pulau setu diau kami banggaka ngan Titus ceritau kamu tenyatau benagh.

¹⁵ Mbak kini diau tamba sayang ngan kamu, karnau diau teghingat, bansau kamu nerimau diau ngan takut nian, mangku ta'at ngan diau.

¹⁶ Aku riang nian, karnau kamu pacak dipercayaui ngan gegalaunyau.