2 KURINTUS 6 - PEJANJIAN EMPAI CERITAU ILUAK

Carau kerjau rasul

¹ Kamini sesamau bekerjau ngan Allah, mangku kami mintak nian, supayau jangan kamu mbuat keilu'an ati Allah diau la kamu ghasauka nidau begunau agi.

² Dalam Injil Allah bekatau, “Masau Aku endak, Aku ka ndengaghka kamu. Masau Aku endak nyelamatka kamu, Aku ka nulung kamu.” Nyela nian, mbak kini la masaunyau, mbak kini masaunyau Diau endak nyelamatkatu.

³ Kami nidau endak, kerjau kami disalaka jemau, mangku kami beusaha supayau nidau bediau tapakan jemau nyalaka kami.

⁴ Anyautu gegalau kerjau kami nunjuakka kami bekerjau batan endak Allah. Kami la nanggungka gegalau sengsarau ngan penanggungan ngan ngaligh nian.

⁵ Kami disaraui, dijilka, disamun. Kami bekerjau mati-matian, rajin nidau tiduak, nidau makan.

⁶ Kami nunjuakka kami ambau Allah, bekerjau ngan jujur, bepengertian, ngaligh ngan iluak. Kami bepaut ngan Rua Allah ngan nyayangi nian.

⁷ Kami ngiciakka ceritau jak di Allah ngan kuasau Allah. Perembak kami diau iluak njadi pakaian kami endak nyerang ngan mbenaghka diri kami.

⁸ Kami diregaui empuak digelakka. Kami dipuji empuak diburuakka. Kami dikiciakka pembu'ung, empuak kamini jujur.

⁹ Kami dianggap nidau tekenal, tapitu dikeruani gegalau jemau. Kami dikiciakka mati, tapitu kina'ila kami idup. Kami diukum, tapitu nidau mati.

¹⁰ Empuak dimadakka, kami maju riang. Empuak kami serik, kami mbuat banyak jemau kayau. Empuak kami nidau bediau tuapau-apau, kami adau gegalaunyau.

¹¹ Kantin-kantin diau kusayangi di Kurintus. Kami la ngiciak ngan terang-terangan ngan kamu. Ati kami la tebukak libagh batan endak kamu.

¹² Kami nidau nukup ati kami batan endak kamu. Cuman kamu diau nukup ati batan endak kami.

¹³ Mbak kini aku endak ngiciak ngan kamu luak ngan anakku. Bukakla pulau ati kamu nian batan endak kami.

Jangan ngikut jemau diau nidau percayau

¹⁴ Jangan kamu endak seghundak ngan jemau diau nidau percayau. Titu nidau iluak. Manau ka adau keilu'an seghundak ngan keja'atan. Manau ka adau jemau diau nuruti kendak Allah ngan jemau diau melawan Allah sesamau bekerjau. Nidau ka adau terang seghundak ngan keleman.

¹⁵ Nidau ka adau Keristus sepakat ngan Iblis. Mangku tuapau diau semegi di antarau jemau diau percayau ngan Keristus ngan jemau diau nidau percayau?

¹⁶ Tuapau ubungannyau Ghuma Allah ngan keramat? Kitau ini Ghuma Allah diau idup. Allahtu bekatau, “Aku ka mendam di guak ughangtu, Aku endak idup seghundak ngan ughangtu. Aku ka njadi Allah ughangtu, mangku ughangtu ka njadi umatKu.”

¹⁷ Karnau itu, “Tinggalkala jemau diau nidau keruan Allah, jawuaka diri kamu jak di ughangtu. Jangan ngecakka setu diau aram, mangku Aku ka nerimau kamu.

¹⁸ Mangku Aku ka njadi Bapak kamu, kamu ka njadi anakKu. Luak itula katau Tuhan diau Mahakuasau.”