2 KURINTUS 3 - PEJANJIAN EMPAI CERITAU ILUAK

Janji diau empai

¹ Apu kami la mulai agi muji diri kami? Apu kami mesti nunjuakka surat pujian ngan kamu luak jemau lain, apu mintak surat pujian ngan kamu?

² Kamu itula surat pujian kami diau ditulis dalam ati kami, mangku pacak dikeruani ngan dibacau gegalau jemau.

³ Mangku la nyatau, bansau kamu surat Keristus diau ditulis karnau kerjau kami. Surat itu ukan ditulis ngan dawat, tapitu ngan Rua Allah diau idup, ukan ditulis di batu, tapitu di ati manusiau.

⁴ Kami ngiciak luak itu, karnau kami percayau nian ngan Allah karnau Keristus.

⁵ Amun kamini ajau, kami nidau sanggup ngerjauka kerjau itu. Anyautu Allah diau nyanggupka kami.

⁶ Diautu pulau mbuat kami sanggup bekerjau batan endak Allah nurut janji empai. Janjitu tegantung ngan Rua Allah ukan ngan ukum diau tetulis. Karnau diau ditulistu mbatak mati, tapitu Rua Allah ngenjuakka idup.

⁷ Masau janji diau mbatak matitu dibuat ngan diukir di batu, keagungan Allah kina'an di dayi Musa. Sinaghau terang nian, mangku jemau Israil nidau ta'an nginak dayi Musa, empuak sinaghtu la mulai pudagh. Amun janji diau mbatak matitu dikiciakka ngan terang diau besinagh luak itu,

⁸ cengki besakla keagungan diau nyertaui janji diau dienjuakka Rua Allah.

⁹ Amun kerjau diau ngukumtu agung luak itu, apau agi keagungan kerjau diau mbuat jemau seilu'an ngan Allah.

¹⁰ Sebenaghau kerjau diau senitu dianggap agung nidau bediau retiau agi, amun dibandingka ngan keagungan mbak kini.

¹¹ Amun kerjau diau ta'an jerang ajau agung luak itu, cengki agungla kerjau diau ta'an selelamaunyau.

¹² Karnau kami adau aghapan luak itu, mangku kami beghani ngiciak luak itu.

¹³ Kami nidau luak Musa nukup dayi ngan selampung, supayau jemau Israil jangan nginak terang Tuhan diau jerangtu padam.

¹⁴ Anyautu rupu'an ughangtu tetutup. Enggut mbak kini rupu'an ughangtu masia tetutup, amun ughangtu mbacau kitab janji diau lamau itu. Rupu'an ughangtu cuman pacak tebukak, amun seghundak ngan Keristus.

¹⁵ Mbak kini pulau amun ughangtu mbacau kitab Musa, rupu'an ughangtu masia tetutup.

¹⁶ Anyautu amun jemau ngulang njenguak Tuhan, mangku rupu'an tebukak.

¹⁷ Karnau Tuhan itu Rua, mangku jemau diau adau Rua Allahtu bibas.

¹⁸ Mangku di kitauni kina'an keagungan Tuhan, karnau rupu'an kitau nidau tetutup, mangku kitau maju diubai njadi luak Diau. Tamba lamau kitau tamba besinagh karnau keagungan diau asalau jak di Tuhan diautu Rua.