2 KURINTUS 2 - PEJANJIAN EMPAI CERITAU ILUAK

¹ Mangku aku la mutuska nidau ka berayak agi ngan kamu, amun kamu kebingungan.

² Karnau amun aku mbingungka kamu, sapau diau pacak meriangka aku, amun ukan jemau diau kubingungkatu?

³ Itula sebapau aku nulis surat senitu ngan kamu. Aku enggup berayak ngan kamu, amun aku ka bingung karnau kamu, awuak kamu diau mesti meriangka aku. Aku percayau, amun aku riang, kamu riang pulau.

⁴ Aku nulis ngan kamu ngan atiku madak nian ngan temas sampai banyak numbanka ayiak-matau. Aku nulis itu, ukan supayau kamu njadi bingung, tapitu supayau kamu keruan, bansau aku sayang nian ngan kamu.

Jemau diau besala mesti dima'apka

⁵ Amun adau jemau diau mbingungka, mangku ukan aku diau dibingungka, tapitu gegalau kamu, senidau-nidaunyau separau jak di kamu. Aku enggup mbesakka.

⁶ Ngan jemau luak itu la cukup ukuman diau la diukumka separau jak di kamu.

⁷ Mangku mbak kini kamu mesti ma'apka ngan neguaka diau, supayau diau jangan putus aghapan karnau kebingungan igau.

⁸ Karnau itu aku mintak, supayau kamu sayang nian ngan diau.

⁹ Nyela, aku nulis surat senitu endak nguji kamu, apu kamu endak ta'at ngan gegalau kici'anku.

¹⁰ Amun kamu ma'apka sala jemautu, aku ma'apkanyau pulau. Amun aku ma'apka, kalu adau diau mesti kuma'apka, itu kukerjauka di adapan Keristus batan endak kamu.

¹¹ Mangku Iblis jangan adau jalan nguasaui kitau, karnau kitau la keruan rencanaunyau.

Paulus keghega'an

¹² Masau aku la sampai di Teruas endak ngiciakka ceritau iluak jak di Keristus, Tuhan la mbukak jalan ngan aku endak bekerjau di bada itu.

¹³ Anyautu aku nidau tenang, karnau nidau betemu ngan kantin kitau Titus. Mangku aku pamit endak pegi ke Makedunia.

Menang karnau Keristus

¹⁴ Aku beterimau-kasia ngan Allah! Diau maju mbatak kami di jalan menang serempak ngan Keristus. Diau makai kami, supayau ceritau Keristus tesebar ke manau-manau luak embau ghum.

¹⁵ Karnau kami luak embau ghum diau asalau jak di Keristus batan endak Allah di guak jemau diau diselamatka ngan diau benasau.

¹⁶ Ngan jemau diau ka benasau kami luak embau busuak diau mbunua. Ngan jemau diau diselamatka kami luak embau ghum diau ngenjuakka idup. Sapau diau pacak ngerjauka tugas ini?

¹⁷ Kami nidau luak banyak jemau diau ndalak untung ngan ngiciakka katau Allah. Tujuan kami iluak, karnau kami diajung Allah endak ngiciakka ceritau itu luak semestiau di adapan Allah, karnau kami seghundak ngan Keristus.