2 KURINTUS 13 - PEJANJIAN EMPAI CERITAU ILUAK

Peringatan

¹ Inila diau ketigau kaliau aku endak datang berayak ngan kamu. Dalam Injil ditulis, “Pekarau mesti dikiciakka duau madak tigau ughang saksi, mangku pekarautu sah.”

² Jemau diau senitu la bedusau ngan gegalau jemau lainau senitu la kuingatka, masau aku berayak ngan kamu keduau kaliau. Mbak kini, penarau aku jawua ngan kamu, aku ngingatka agi, amun aku datang nanti, gegalau ughangtu ka diukum.

³ Mangku kamu bulia bukti diau kamu pintak, bansau Keristus ngiciak ngan aku. Keristustu nidau litak ngan kamu, tapitu Diau ka nunjuakka kuasauNyau di guak kamu.

⁴ Nyela, masau Diau dipakuka di kayu salip, Diau litak, tapitu mbak kini Diau idup karnau kuasau Allah. Nyela, kamini litak pulau karnau seghundak ngan Keristus, anyautu amun buadapan ngan kamu, kami pulau adau kuasau Allah karnau seghundak ngan Keristus.

⁵ Cubau uji diri kamu, apu kamu ngenian idup percayau ngan Keristus. Cengki kamu ka ngeruani, bansau Yesus Keristus adau di ati kamu, lain amun kamu nidau percayau nian.

⁶ Kuaghapka kamu ngeruani, bansau kamini ukanau jemau diau nidau ta'an uji.

⁷ Kami bedu'a ngan Allah, supayau Diau nulung kamu nidau ngerjauka diau ja'at, ukan supayau nyatau, bansau kami ngerjauka tugas kami nian, tapitu supayau kamu ngerjauka kendak Allah, empuak kamini kina'an luak nidau buasil, nidau ngapau-ngapau.

⁸ Kami nidau pacak ngerjauka setu diau belawanan ngan kendak Allah. Kami mesti nuruti kendak Allah.

⁹ Kami riang, amun kami litak ngan kamu kuat. Kami bedu'a pulau, supayau kamu njadi iluak agi.

¹⁰ Itula sebapau aku nulis surat ini, masau aku gi jawua ngan kamu. Mangku amun aku datang guak kamu, aku nidau nanti ngukum nurut kuasau diau dienjuakka Tuhan ngan aku. Aku endak majuka kamu ukan endak ngancurka.

Pesan

¹¹ Mangku, kantin-kantinku, kamu mesti riang ngan beusaha, supayau sempernau. Terimaula gegalau petuaku. Kamu mesti suijauan ngan idup bedamai sughang ngan diau lain. Mangku Allah ka nyayangi kamu ngan ngenjuakka damai ngan kamu.

¹² Sangi pesanka sughang ngan diau lain ngan carau diau iluak. Gegalau umat Allah bepesan ngan kamu.

¹³ Aku bedu'a, supayau Tuhan Yesus Keristus iluak nian ngan kamu, Allah nyayangi kamu ngan Rua Allah nyatuka gegalau kamu.