2 KURINTUS 10 - PEJANJIAN EMPAI CERITAU ILUAK

Paulus mbenaghka kerjaunyau

¹ Aku, Paulus, adau diau endak kukiciakka ngan kamu. Nurut katau jemau akuni nidau beghani, amun buadapan ngan kamu, tapitu beghani, amun jawua. Karnau Keristustu iluak ngan lembut,

² aku mintak nian, jangan masau aku keghas ngan kamu, amun aku datang nanti. Aku la berencanau endak marai jemau diau ngiciakka kami idup nurut deniau.

³ Nyela, kami gi adau di deniau, tapitu kami nidau bejuang nurut carau deniau.

⁴ Pakaian diau kami gunauka dalam peperangan ini ukanau pakaian deniauni, tapitu pakaian diau adau kuasau Allah, mangku binting dirubuaka. Bebalahan kami tangkis.

⁵ Kami merusakka setu diau dibuat jemau geduak endak melawan setu diau benagh ceritau Allah. Kami na'an gegalau rupu'an jemau ngan mbuatau ta'at ngan Keristus.

⁶ Mangku amun kamu la ta'at nian, kami siap endak ngukum jemau diau nidau ta'at.

⁷ Kamu cuman nginak setu diau kina'an jak di luagh ajau. Amun adau sughang diau yakin, bansau diau hak Keristus, diau mesti berupuak agi, mangku nyadari, bansau kamini pulau hak Keristus semegi ngan diautu.

⁸ Aku nidau maluan, amun aku lebia mbanggaka kuasau diau dienjuakka Tuhan ngan kami, karnau kuasau itu dienjuakka batan endak neguaka kamu, ukanau batan endak mbenasauka kamu.

⁹ Aku enggup kamu meghasau ditakuti ngan suratku.

¹⁰ Jemau bekatau, “Surat Paulus itu tegas ngan keghas. Anyautu amun adau guak kitau, diau lemas ngan kici'annyau nidau bediau retiau.”

¹¹ Jemau diau ngiciak luak itu mesti nyadari, bansau amun kami datang guak kamu nanti, kami mbuat semegi ngan setu diau kami tulis dalam surat.

¹² Nyela, kami nidau beghani nyamauka ngan mbandingka kamini ngan jemau diau muji diriau. Alaka bigal ughangtu! Makai diriau njadi ukuran, mangku mbandingka diriau ngan diri ughangtula.

¹³ Kami nidau luak itu. Amun kami bangga, kami nidau lebia jak di batas. Kami maju adau dalam batas kerjau diau ditetapka Allah batan endak kami. Kamu temasuak dalam itu.

¹⁴ Mangku kami nidau di luagh batas daira kerjau kami, masau kami berayak ngan kamu senitu ngan ngiciakka ceritau iluak jak di Keristus ngan kamu.

¹⁵ Kami nidau muji diri kami ngan kerjau jemau diau adau di luagh batas diau ditetapka Allah batan endak kami. Kami ngaghapka kamu tamba percayau ngan Keristus, mangku kami pacak ngerjauka kerjau diau lebia besak agi di guak kamu. Kerjau itu maju adau dalam batas diau ditetapka Allahtu.

¹⁶ Ngan carau luak itu kami pacak ngiciakka ceritau iluaktu di nenggeri jemau. Kami nidau nanti muji diri kami ngan asil kerjau jemau diau dikerjauka di daira ughangtu.

¹⁷ Di Injil ditulis, “Jemau diau bangga, mesti mbanggaka setu diau dikerjauka Tuhan.”

¹⁸ Jemau diau dipuji Tuhan ta'an uji ukan jemau diau muji diriau.