1 YUHANIS 5 - PEJANJIAN EMPAI CERITAU ILUAK

Iman ngalaka deniau

¹ Jemau diau percayau, bansau Yesusla Rajau Penyelamat diau dijanjika Allah, jemautu anak Allah. Mangku jemau diau nyayangi Bapak, nyayangi anak-ana'Au pulau.

² Amun kitau nyayangi Allah ngan ngerjauka perintaHau, mangku kitau keruan, bansau kitau nyayangi anak-anak Allah,

³ karnau nyayangi Allah dibuktika ta'at ngan Allah. Mangku perintaHau nidau segau,

⁴ karnau bilang anak Allah pacak ngalaka deniau diau ja'at ini. Ngan iman kitau ngalakanyau.

⁵ Sapau pacak ngalaka deniauni? Nyela, jemau diau percayau, bansau Yesusla Anak Allah.

Allah ngiciakka Ana'Au

⁶ Yesus Keristus itu la datang ke deniau ngan ayiak baptisanNyau ngan dagha kematianNyau; ukan ajau ngan ayiak, anyautu ngan ayiak ngan dagha. Rua Allah la ngiciakka, bansau itu benagh, karnau Rua itu nidau mbu'ung.

⁷ Ngan tigau carau Diau ngiciakkanyau:

⁸ Rua ngan ayiak ngan dagha. Tigautu ngiciakka setu diau semegi.

⁹ Kitau percayau ngan kici'an manusiau. Anyautu iluakla kici'an Allah. Mangku itula ceritau Allah ngiciakka Ana'Au.

¹⁰ Jemau diau percayau ngan Anak Allah nerimau kici'anNyautu dalam atiau. Anyautu jemau diau nidau percayau ngan Allah nganggap Allah pembu'ung, karnau nidau percayau diau dikiciakkaNyau ceritau Ana'Au.

¹¹ Luak ini kici'antu: Allah la ngenjuakka ngan kitau idup sejati selelamaunyau. Mangku iduptu asalau jak di Ana'Au.

¹² Jemau diau nerimau Ana'Au nerimau idup itu. Jemau diau nidau nerimau Ana'au nidau pulau nerimau idup.

Idup sejati selelamaunyau

¹³ Gegalaunyautu kutuliska ngan kamu diau percayau ngan Anak Allah, supayau kamu keruan, bansau kamu la bulia idup sejati selelamaunyau.

¹⁴ Mangku kitau beghani ngadap Allah, karnau kitau yakin, bansau Diau ka ngabulka du'a kitau, amun setu diau kitau pintak tetuju ngan Diau.

¹⁵ Kitau keruan, Diau ndengaghka kitau, amun kitau mintak ngan Diau. Mangku kitau keruan pulau, Diau la ngenju'i kitau setu diau kitau pintak ngan Diau.

¹⁶ Amun kamu nginak kantin kamu diau Keristen ngerjauka dusau diau nidau ka ndatangka kematian, du'aka ngan Allah, mangku Diau ka ngenjuakka idup ngan jemautu; nyela, jemau diau mbuat dusau nidau ndatangka kematian. Adau pulau dusau diau ndatangka kematian. Ceritau itu nidau kukiciakka, bansau diau mesti bedu'a ngan Allah.

¹⁷ Kerjau ja'at itu dusau galau. Anyautu adau dusau diau nidau ndatangka maut.

¹⁸ Kitau keruan, bansau gegalau jemau diau la njadi anak Allah nidau agi bebuat dusau, karnau Anak Allah njagauinyau, mangku Iblis nidau pacak mbuat tuapau-apau ngan diau.

¹⁹ Kitau keruan, bansau kitauni asalau jak di Allah, empuak gegalau deniauni dikuasaui Iblis.

²⁰ Kitau keruan, bansau Anak Allah la datang ngan ngenjuakka pengertian ngan kitau, mangku kitau ngeruani Allah diau benagh. Kitau idup seghundak ngan Allah diau benagh ngan idup seghundak ngan Ana'Au Yesus Keristus. Diautu Allah diau benagh ngan ngenjuakka idup sejati selelamaunyau.

²¹ Anak-buaku, jawuakala diri kamu jak di diwau-diwau.